Ježuš se zameče vu svojoj domovini. Pošilanje apoštolov. Ivanu Krstitelu da Herodeš glavu odseči. Čudnovito povnoženje pet hlebov. Ježuš hodi po morju, po dotikavanju njegve oprave zvračiju se vnogi betežni.
- I kad bi odonud bil izišel, odišel je vu svoju domovinu i nasleduvali su ga njegvi vučeniki.
- I kad bi sobota bila nastala, je on počel vu sinagogi vučiti. I vnogi koji su ga poslušali, jesu se čudili nad njegvem navukom govoreči: „Otkud su njemu vsa ova? I kakva je to mudrost koja je njemu dana i kak bivaju takva čuda po njegveh rukah?
- Je li to ni drvodelavec, sin Marije, brat pako Jakopov i Jožefov i Judašev i Šimunov? Je li nesu takaj njegve sestre ovde pri nas?“ I oni se vu njem jesu spačili.
- I reče njim Ježuš da prorok nigdi ni prez poštenja, nego lestor vu svojoj domovini i vu svojoj hiži i med svojum rodbinum.
- I ni mogel tam nikakva čuda činiti zvun da je nekuliko betežneh po nastavlanju ruk zvračil.
- I čudil se je nad njihovum nevernostjum i hodil je okolo po vesih i povsud vučil.
- I on je pozval oneh dvanajst i začel je nje pošiljati po dva i dva i dal je njim oblast nad nečistemi duhi.
- I on je njim zapovedal da ne bi nikaj vzeli na put nego samo palicu: ne torbe, ne kruha, niti vu mošnjah penez.
- Nego naj bi si obuli papuče, naj se pako ne bi oblačili vu dve halje.
- I on reče njim: „Kamgoder zajdete vu hižu, onde ostanite doklam odonud proč pojdete.
- I koji goder vas ne primeju niti ne posluhneju vas, izidite odonud i stepite prah iz vašeh nog njim na svedočanstvo.“
- I oni su izišli i prodekuvali da bi pokoru činili
- i vnoge vrage jesu van zegnali i namazali su z oljem vnoge betežne i nje zvračili.
- I čul je Herodeš kralj (ar je njegvo ime očivesno včinjeno) i rekel da se Ivan Krstitel od mrtveh gore stal i zbog to[g] se vjavljaju čuda vu njem.
- Drugi pako jesu rekli da je Elijaš, a drugi su govorili da je Prorok ali kakti koj zmed prorokov.
- Kaj kad bi Herodeš bil čul, reče: „Ivan, kojemu sem ja glavu vzel, on je od mrtveh gore stal.“
- Ar ravno on isti Herodeš je poslal i vlovil Ivana ter njega zvezal vu temnici zbog Herodijašice, žene Filipa svojega brata, kajti si je bil nju za ženu vzel.
- Ar Ivan je rekel Herodešu: „Neje tebi slobodno imati ženu tvojega brata.“
- Herodijašica pako je njega nastoruvala i hotela ga je vmoriti i ni mogla
- ar se Herodeš je bojal Ivana kajti je znal da je pravičen i svet človek i on ga je čuval i kad ga je poslušal, vnoga je včinil ar je njega rad poslušal.
- I kad bi prikladen dan bil došel, dan Herodeševoga narođenja, dal je on poglavarom i vojvodam i prvešem iz Galileje večerju.
- I kad bi kči Herodijašice nuter bila stupila i plesala ter se dopala Herodešu kak takaj onem koji su z njim pri stolu sedeli, reče kralj dekliču: „Prosi od mene kaj hočeš i dam tebi!“
- I on je njoj prisegel: „Da, kaj goder budeš mene prosila, dam tebi, makar polovicu mojega kraljestva.“
- Ona pako, kad bi van bila izišla, reče svojoj materi: „Kaj bi prosila?“ Ona pako reče: „Glavu Ivana Krstitela!“
- I ona je mahom nuter odišla z hitrostjum k kralju i prosila govoreča: „Hoču da mi taki daš na zdeli glavu Ivana Krstitela.“
- I ražalostil se je kralj, ali zbog prisege i zbog oneh koji su z njim pri stolu sedeli ni hotel nju ražalostiti,
- nego je poslal hahara i zapovedal da donese njegvu glavu na zdeli. I odsekel mu je glavu vu temnici
- i donesel je njegvu glavu na zdeli i nju dal dekliču, deklič pako je nju dala svojoj materi.
- Kaj kad bi njegvi vučeniki bili čuli, došli su i vzeli su njegvo telo i položili su nje vu grob.
- I apoštoli se jesu skup zebrali k Ježušu i nazvestili su njemu vsa koja su včinili i vučili.
- I reče njim: „Hote vi sami poseb vu kakvo pusto mesto i počinite se jedno malo.“ Ar oneh koji su prihađali i othađali je vnogo bilo i niti jesti nesu imali časa.
- I stupili su vu ladju i odišli poseb vu pusto mesto
- i videli su nje othađati i vnogi su ga poznali i iz vseh varošev tam se pešice jesu skup zdrčali i prestigli su nje.
- I kad bi Ježuš van bil izišel, videl je vnožinu ljudstva i smiluval se je njim ar su bili kakti ovce koje nemaju pastira i počel je nje vučiti vnoga.
- I kad bi vre vnogo vur bilo, pristupili su k njemu njegvi vučeniki govoreči: „Ovo mesto je pusto i vre je kesno.
- Otpusti nje da idu vu okolo ležeča sela i vesi kupiti si jestvine koje bi jeli.“
- On pako odgovori i reče njim: „Dajte vi njim jesti!“ A oni veliju njemu: „Mi čemo iti i za dvesto denjarov kupiti kruha i damo im jesti.“
- On pako reče njim: „Kuliko hlebov kruha imate? Hote i poglejte!“ I kad bi bili pregledali, rekli su: „Pet hlebov i dve ribe.“
- I zapovedal je njim da bi oni vse po skupčinah dole na zelenu travu posadili.
- I oni su dole seli na jate po sto i po pedeset.
- I kad bi bil vzel teh pet hlebov kruha i te dve ribice, pogledal je gore vu nebesa, blagoslovil i razlomil kruhe ter nje je dal svojem vučenikom da bi je med nje podeljili i te dve ribice je med vse razdeljil.
- I vsi su jeli i zasitili su se.
- I pobrali su falacev, koji su preostali od kruha i od rib, dvanajst puneh košar.
- Bilo ih je pako, koji su jeli, pet jezer mužev.
- I sproti je prisilil svoje vučenike stupiti vu ladju da bi se naprvo pred njim prepeljali prek morja proti Betšajidi doklam bi on raspuščal ljudstvo.
- I kad bi nje bil raspuščal, odišel je na goru molit.
- I kad bi večer bil nastal, bila je ladja na sredini morja, a on sam na suhom.
- I videl je nje da se z veslarenjem jesu jako trudili (ar im je bil suprotiven veter) i okolo četrte nočne straže došel je k njim hodeči po morju i hotel je mimo njih prejti.
- A oni, kak su ga videli hodečega po morju, štimali su da je kakov sumrak i ves glas jesu kričali.
- Ar su ga vsi videli i prestrašili su se. I sproti je z njimi govoril i rekel njim: „Zaufajte se, ja jesem, najte se bojati!“
- I stupil je k njim vu ladju i vtišil se je veter. I oni se jošče bolje vu sebi jesu osupnuli
- ar oni nesu razmeli od kruhov kajti je njihovo srce bilo zaslepljeno.
- I kad bi se bili prek morja prepeljali, došli su vu zemlju Genezaret i pristupili su k brodu.
- I kad bi bili izišli iz ladje, mahom su ga prepoznali.
- I oni su vsu ovu državu optekli i počeli su na posteljah okolo nositi one koji si zlo čutili jesu gde su čuli da se on zadržava.
- I kamgoder je zašel, vu sela ali vu vesi ali vu varaše, na vulice jesu devali betežne i njega prosili da bi se neg kraja njegve halje doteknuli – i koji goder su se ga doteknuli, jesu ozdraveli.
