Nahranenje četiri jezera ljudih. Farizejuši potrebuju znamenje. Ježuš odgovarja od farizejuškoga i herodijanskoga kvasa. Zvračenje slepoga. Petrovo valuvanje. Ježuš prenazvešča svoje muke, pokaruje Petra koj ga od njih zdržati hoče ter nazvešča križ i zatajenje.
- Vu oneh dnevih, kad bi ipak velika vnožina ljudstva skupa bila i ne bi imali kaj jesti, skup zebral je on svoje vučenike i reče njim:
- „Milo mi je ovoga ljudstva ar nut vre tri dni jesu pri meni i nikaj nimaju kaj bi jeli.
- I ako nje otpustim tešče k njihovem hižam, omlahaveju na putu ar nekoji zmed njih jesu izdaleka došli.“
- I odgovoriju njemu njegvi vučeniki: „Otkud bi mogel gdo nje zasititi z kruhom vu puščini?“
- I opita nje: „Kuliko hlebov kruha imate?“ A oni jesu rekli: „Sedem.“
- I zapovedal je ljudstvu dole posesti na zemlju. I vzeme sedem hlebov, zahvali, razlomi je i podelji je svojem vučenikom da bi pred nje vrgli. I vrgli jesu pred ljudstvo.
- I imali su jedno malo ribic i nje je blagoslovil i zapovedal da se pred nje postaviju.
- I jeli su i zasitili se i nabrali su kaj je bilo preostalo od falacev sedem košar.
- Oneh pako koji su jeli, je bilo okolo četiri jezera ljudih i otpuščal je nje.
- I sproti je stupil vu ladju z svojemi vučeniki i došel je vu krajnju Dalmanute.
- I izišli su farizejuši i počeli su se z njim pregovarjati. I potrebuvali su od njega znamenje iz Nebes i skušavali su njega.
- On pako, zdehnuvši vu duhu, reče: „Zakaj potrebuje ov narod znamenje? Stanovito velim vam da se ovomu narodu nikakvo znamenje ne bude dalo.“
- I on je nje ostavil ter ipak stupil vu ladju i odišel je prek na drugu stran.
- I oni su pozabili z sobum kruha vzeti i nesu imali več z sobum vu ladji nego samo jeden hleb.
- I zapovedal je njim govoreči: „Vidite i čuvajte se od kvasa farizejušev i od kvasa Herodešovoga.“
- I premišljavali jesu jeden proti drugomu govoreči: „Kaj kruha nemamo!“
- Kaj kad bi spoznal bil Ježuš, reče njim: „Zakaj se starate kaj kruha nemate? Jošče ne spoznajete niti ne razmete? Jošče zaslepljeno imate vaše srce?
- Oči imajuči ne vidite? I vuha imajuči ne čujete? I ne spomenujete se
- kad sem pet hlebov kruha razlomil med pet jezer, kuliko košar puneh jeste nabrali falatov?“ I veliju njemu: „Dvanajst.“
- „Kad sem pako sedem hlebov kruha med četiri jezera razdeljil, kuliko košar puneh jeste onda nabrali falatov?“ I veliju njemu: „Sedem.“
- I reče njim: „Kak anda jošče ne presižete?“
- I došli su vu Betšajidu i dopeljaju k njemu nekojega slepoga i prosiju ga da bi se doteknul.
- I prijemši slepoga za ruku, ispelja ga van iz sela i pljuvnuvši v njegve oči, položi svoje ruke na njega i pita ga je li kaj vidi.
- I gore pogledavši, reče: „Vidim ljudi hoditi kakti drevje.“
- Zatem je ipak položil ruke na njegve oči i on je počel videti i zvračen je bil tak da je vsa bistro videl.
- I pošlje njega vu svoju hižu govoreči: „Hodi vu tvoju hižu i ako vu selo nuter pojdeš, tak nikomu ne poveđ.“
- I izišel je Ježuš i njegvi vučeniki vu gradišča Cezareje Filipove. I na putu je pital svoje vučenike govoreči njim: „Za koga me ljudi drže?“
- Oni su pak odgovorili govoreči: „Nekoji za Ivana Krstitela, drugi za Elijaša, drugi pako kakti za jednoga zmed prorokov.“
- Onda veli njim: „Vi pako za koga me držite?“ Odgovori Peter i reče njemu: „Ti si Krištuš!“
- I on se je njim zagrozil da ne bi komu od njega povedali.
- I počel je nje navučati da je potrebno Sinu Človečjemu vnoga trpeti i od starešeh i poglavarov aldovničkeh i piscev zavrženomu i vmorjenomu biti i po treh dnevih gore stati.
- I on je tu reč očivesto govoril. Peter pako je njega nastran otpeljal i počel ga je karati.
- A on se obrne, pogleda svoje vučenike i zagrozi se Petru govoreči: „Othađaj za menum, Šatan, ar ti ne razmeš koja su Božja, nego koja su človečja!“
- I kad bi skup zezval bil ljudstvo skupa z svojemi vučeniki, reče njim: „Koj goder hoče mene nasleduvati, naj zataji samoga sebe i naj vzeme na se svoj križ ter me tak naj nasleduje.
- Ar koj hoče svoje živlenje opčuvati, pogubi nje; koj pako za volju mene i evangelijuma pogubi svoje živlenje, on nje obdrži.
- Ar kaj hasni človeku ako ves svet dobi, svoju pako dušu pogubi?
- Ali kakvu zamembu bude dal človek za svoju dušu?
- Ar koj se goder zbog mene i mojeh rečih bude sramuval pred ovem loternem i grešnem narodom, pred njim se takaj bude sramuval Sin Človečji kada dojde z svetemi angelmi vu veličanstvu svojega Oca.“
- I reče njim: „Stanovito velim vam da jesu nekoji med ovde stoječemi koji ne budu okusili smrti dok ne budu videli dojti Kraljestvo Božje vu zmožnosti.“
