- Bližnjemu tvojemu, kojega si prijatel, ne postani neprijatel ar hmanjemu i vsakomu grešniku koj je nenaviden i dvojezičen dojde za del spočitanje i opšanost.
- Ne izvišavaj se vu mišlenjih duše tvoje kakti junec da ne bi morebiti bedastoča krepost tvoju zatrla,
- da ne poje listje tvoje i ne skonča sad tvoj i da ne budeš kakti suho drevo v puščini zapuščen.
- Ar nespametna duša onoga v kojem prebiva pogubi ter ga neprijatelom na osmeh da i zapelja ga v nesreču nepobožneh.
- Slatka reč napravi vnogo prijatelov i potiši neprijatele i dobroga človeka mili jezik vu dobru obiluje.
- Imaj vnogo takoveh koji budu z tobum v miru, ali zmed jezero imaj lestor jednoga tolnačnika.
- Ako si hočeš jednoga za prijatela izebrati, primi ga onda kada si ga vu traplenju skušal i naj mu se lehko zaufati.
- Ar vnogi je prijatel do svojega vremena, ali na dan traplenja ne bude ostal.
- Takaj je prijatel koj se na neprijatela premeni i je prijatel koj bude odurjavanje, svađe i spočitavanja razglasil.
- Nekoj je prijatel doklam pri stolu sedi i na den potrepčine ne bude ostal.
11.*Germ. r. 11. On bude pri sreči tvoji kak ti i bude med domačemi tvojemi zaufano delal. Ako prijatel stalen ostane, drži ga kak tebi skupjednakoga i naj med domačemi tvojemi zaufano dela.
12.*r. 12. Ako budeš ponizen, bude proti tebi ter se bude pred obličajem tvojem skril. Ako se bude pred tobum ponižuval i (v času) pred obličajem tvojem zakrival, budeš z njim jednako dobro prijatelstvo imel.
- Odluči se od neprijatelov tvojeh i pred prijateli tvojemi pazi se.
- Prijatel verni je jaka obramba, koj pako njega je našel, našel je kinča.
- Prijatelu vernomu ni prispodobe, zlato i srebro ni vredno z njegovum dobrum vernostjum na vagu položeno biti.
- Prijatel verni je vračtvo živlenja i nevmrtelnosti i koji se Boga boje, budu ga našli.
- Koj se Boga boji, bude takaj dobroga prijatela imel ar kakov je on, takov bude takaj prijatel njegov.
- Sinko, od mladosti tvoje prijemlji navuk i budeš do sedih lasih mudrost našel.
- Pristupi k njoj kak on koj orje i seje i čakaj na njejin dober sad.
- Ar se budeš vu obdelavanju njejinem malo trudil ali v kratkem budeš od njejinega sada jel.
- Kak ljuta je mudrost nevučenem ljudem, šupeljak ne bude vu njoj opstal.
- Ona je njim kakti teški kamen k skušanju i ne budu se mudili othititi nju.
- Ar mudrost (zdenec) vučenosti je kakti ime njejine [….], (skrita) i retkem znana, kojem pakoje znana, pri njih ostane doklam je k pogledu Božjemu zapelja.
- Sinko, posluhni i primi razumni tolnač ter ne zavrzi tolnača mojega.
- Postavi noge tvoje vu spone njejine i vrat tvoj vu ogrljaj,
- podloži ramena tvoja i nosi ju ter naj tebi ne dodihavaju veze njejine.
- Pristupi k njoj z celem srcem tvojem i iz vse moči tvoje drži pute njejine.
- Zveđaj nju i bude očituvana tebi i kada ju dobiš, ne zapusti ju.
- Ar k poslednjemu budeš vu njoj pokoj našel i ona bude tebi na veselje postala.
- Onda budu spone njejine tebi jaka obramba i močna potpornja i ogrljajci njejini oblačilo dično
- ar vu njoj je živlenja lepota i spone njejine jesu zdravja privezi.
- Ti se budeš z njum kakti z oblačilom dike odel i kakti veselja punu korunu na se postavil.
- Sinko moj, ako mene budeš posluhnul, budeš se navčil i ako prilagodiš srce tvoje, budeš muder postal.
- Ako budeš vuho tvoje prignul, budeš navuk zadobil i ako te veselilo bude poslušati, budeš muder postal.
- Postavi se med spravišče stareh mudreh i pridruži se iz srca k mudrosti njihovi da budeš čul vse kaj se od Boga govori ter da njihova hvale puna prirečja tebi neznana ne ostaneju.
- I kada zagledaš mudroga, otpravi se k njemu zarana i slede vrat njegoveh naj tere noga tvoja.
- Premišljavaj zapovedi Božje i misli tvoje naj budu prez prestanka v naredbah Božjeh i on (Bog) bude dal tebi srce i želenje mudrosti dano bude tebi.
