Del XI.

1. Mudrost poniznoga bude podignula glavu njegovu i vu sredini velikašev bude njega posadila.
2. Ne hvali človeka zaradi lepote njegove niti ne zametavaj človeka iz viđenja njegovoga.
3. Pčela je med letečemi najmenša, ali sad njejin je najslajši.
4. Zaradi oblačila tvojega ne gizdaj se i na dan časti tvoje ne izvišavaj se ar samoga Višnjega dela jesu čudnovita, odičena, zakrita i neznana.
5. Vnogi krvoloki jesu sedeli na stolici kraljevski i korunu nosil je on od kojega se ni sumljilo.
6. Vnogi mogučni jesu bili potpunoma zatreni i odičeni bili su drugem vu ruke predani.
7. Ne kudi nikoga doklam ga ne ispitaš i kada ga ispitaš, pravično pokaraj.
8. Predi nego čuješ, ne odgovori reč i vu sredini govorenja ne prigodi se govoriti.
9. Ne svadi se zaradi one stvare koja na te ne spada i pri sudu grešnikov ne sedi.
10. Sinko, čini tvoji naj ne budu vu vnogeh i ako budeš bogat, ne budeš prost od greha ar ako pojdeš za njim (bogatstvom), ne budeš stignul i ako pred njim (siromaštvom) budeš išel, ne budeš vušel.
11. Nepobožen človek dela, žuri se i muči se i z tem menje je obilneši.
12. Drugi človek je kesen, pomoči potreben, prez moči i kruto siromah
13. i na njega se oko Božje dobrotivno ogleda i podigne njega iz poniznosti njegove i izvisi glavu njegovu i vnogi se zvrhu njega čudiju i hvaliju Boga.
14. Dobro i zlo, živlenje i smrt, siromaštvo i bogatstvo dohađa od Boga.
15. Mudrost, navuk i znanje Zakona je od Boga. Ljubav i puti dobreh jesu takaj od njega.
16. Pomenjka i slepota jez grešniki skup stvorjena i koji se vu zlih veseliju, budu vu zlu ostareli.
17. Dar Božji ostane pravičnem i kaj od njega dohađa, bude naveke napredek imelo.
18. Je nekoj koj obogate skupo delajuč i to je del plače njegove
19. vu tom da veli: „Našel sem meni počinek i sada se lestor blaga mojega vuživati hoču“,
20. i ne zna da bude vreme prešlo i smrt se bude približala i bude drugem vsa ostavil ter vumrl.
21. Ostani v tvojem (z Bogom načinjenem) zavezu i od njega se (v srcu) razgovarjaj i staraj se vu ispunjenju onoga kaj ti je zapovedano.
22. Ne ostajaj vu delih grešnikov. Zaufaj se pako na Boga i ostani na mestu tvojem.
23. Ar Bogu je lehko siromaka hitro bogatoga načiniti.
24. Blagoslov Božji žuri se pravičnomu za plaču i v kratkem času napredek njegov sad doprinaša.
25. Ne reci: „Kaj meni potrebno (truditi se) i kaj se iz toga dobra nadejati imam?“
26. Ne reci: „Meni je to moje zadosta i kaj se meni bude napotlam zla zgodilo?“
27. Vu dobreh dnevih ne pozabi na zlo i vu zleh dnevih ne pozabi na dobro
28. ar Bogu je lehko na dan smrti vsakomu poleg delih njegoveh povrnuti.
29. Vura hmanja čini da se na najvekše razveselenje pozabi i pri smrti človeka budu dela njegova otkrita.
30. Pred smrtjum nikoga ne hvali ar iz sinov svojeh bude človek spoznan.
31. Ne vpeljaj vsakoga človeka vu hižu tvoju ar vkanljivec vnoge zasede dela.
32. Ar kak iz gnjiloga osrčja smrad ishađa i kak je jerebica v spružnicu napeljana i divja koza v pruglo, ovak je i srce gizdavcev i kakti prigledavec videči opadanje bližnjega svojega.
33. Ar dobra vu zla obračajuči zasede čini i nad izebranemi nahađa znamenjku.
34. Od jedne iskre velik ogenj nastaje i od jednoga vkanljivca veliki pomor se napravi, človek pako grešni zasede dela da krv preleje.
35. Čuvaj se pred hudodelnikom ar zla snuje da morebiti tebe k vekivečnemu osmehu ne čini.
36. Pusti k sebi tuđinu i on bude tebe po nepokoju potkopal ter iz lastovitosti tvoje otujil.