Del XIX.

1. Delavec pijanec ne bude obogatil i koj zameče mala, po malo opade.
2. Vino i žene činiju da mudri otpadeju i razumni zametljivi postaneju,
3. koj se pajdaši z kurviši, bude nesramen, gnjiloči i črvom bude on za del odvečtva i bude drugem na osebujnu peldu postavljen i duša njegova bude iz broja (živeh) odvržena.
4. Koj brzo veruje, je lehkosrčen i bude ponižen, dapače zvun toga bude za takovoga držan koj sam proti sebi greši.
5. Koj se nad nepravednostjum veseli, bude se zametaval i koj odurjava pokaranje, ovoga se živlenje prikračuje, a koj odurjava jezičljivost, pogašuje hmanjicu.
6. Koj sam proti sebi greši, bude se kajal i koj se v hmanjici raduje, bude se zametal.
7. Ne ponavljaj hmanju i oštru reč i ne budeš ponižen.
8. Ne poveđ misli tvoje prijatelu i neprijatelu i ako kakov greh imaš, naj ga otkriti.
9. Ar on bude tebe poslušal i na te pazil i kada bude (govoril) kak da bi greh izgovarjal, bude tebe odurjaval i ovak bude zmir poleg tebe.
10. Čul si kakovu reč proti bližnjemu tvojemu? Naj ostane ona vu tebi zakopana i zanesi se da te ne bude raspuknula.
11. Bedak doklam čujenu reč van ne vrže, je kakti žena koja v porodu skuči.
12. Kaj je v stegnu zabođena strelica, to je reč vu srcu bedaka.
13. Pokaraj prijatela, morebiti ni razmel i bude rekel: „Nesem včinil“, ali ako je včinil, da ne bude opet činil.
14. Pokaraj bližnjega da ne bi morebiti povedal ali ako je povedal, da ne bi morebiti ponovil.
15. Pokaraj prijatela ar vnogikrat je kaj zlaganoga.
16. I ne veruj vsakoj reči: nekoji jesu koji z jezikom pregrešiju, ne pako z srcem.
17. Ar gdo je koj ne bi bil z jezikom zagrešil? Pokaraj bližnjega predi nego mu se groziš.
18. I daj mesto strahu Višnjega kajti vsa mudrost je strah Božji i ona vuči bojati se Boga i cela mudrost vu ispunenju zapovedi stoji!
19. Šegavost hmanjice ni mudrost i zmišlenje grešnikov ni razumnost.
20. Je hmanjica koja je prokletstva vredna i je nerazumen pri kojem je (samo) pomenjkanje mudrosti.
21. Bolši je človek koj malo mudrosti i razumnosti nego strah (Božji) ima kak on koj obiluje z razumnostjum ter zapoved Višnjega prekršuje.
22. Je stanovita preskrbljivost, ali ona je krivična.
23. I nahađa se koj stanovitu reč izgovori i istinu poveda. Drugi se pako nedostojno ponižuje, a srce njegovo puno je prevare,
24. jeden je koj se od velike poniznosti preveč podlaže, drugi pako na tla gledi i drži se kak da ne bi videl ono kaj je neznano
25. i ako se zaradi slabeh močih ne ufa grešiti, vendar ako bude čas zlo činiti našel, bude zlo činil.
26. Iz pogleda spozna se človek i razumen se spozna iz spodobe obraza.
27. Oblačilo telovno, smeh zubih i hod človeka pokažuju njega.
28. Pokaranje ni istinsko koje vu srditosti opšanljivca biva i je sud koj se ne nahađa pravičen i nahađa se koj muči i ov je razumen.