Del XX.

1. Kak bolše je pokarati i ne braniti onomu koj vu molitvi (pregrešenje svoje) spoznati hoče kak srditi se.
2. Kak škoplenik kada poželi devici divojačtvo vzeti,
3. tak je on koj z silum krivični sud čini.
4. Kak dobro je na pokaranje pokazati spokorjenje! Ar tak se budeš svojvoljnomu grehu vugnul.
5. Jeden muči i bude za mudroga znajđen i odurjavanja vreden je koj prokšen je vu govorenju.
6. Jeden muči kajti ne zna govoriti i jeden muči kajti zna kada je prikladno vreme.
7. Človek muder bude mučal tja do vremena, razvuzdan pako i nerazumen ne gleda na vreme.
8. Koj vnogo rečih ima, bude dušu svoju vrazil i gdo si krivično oblast jemlje, bude oduren.
9. Razvuzdan človek ima vu zlu sreču i kaj on znajde, je njemu na škodu.
10. Je dar koj ni hasnovit i je dar kojega plača je dvojvrsna.
11. Je koj zaradi (prevelike) časti bude pomenšan i je koj zaradi poniznosti bude izvišen ali glavu zdignul.
12. Je koj za malu cenu vnoga kupi ter vendar sedemkrat tuliko plača.
13. Muder sebe po rečih ljubljenoga čini, bedakov pako prijetnost bude se razlejala.
14. Dar nespametnoga ne bude tebi hasnovit ar on sedmemi očmi (na povračanje) gledi.
15. Malo bude dal i vnoga bude spoganjal i otpiranje vust njegoveh je kakti ogenj koj se raširuje.
16. Denes posudi, a zutra vre nazad terja: takov človek bude oduren.
17. Bedak ne bude imel prijatela i dobrote njegove ne budu prijetne.
18. Ar koji kruh njegov jeju, jesu vkanjljivoga jezika. Kuliko krat i kuliki budu zesmehavali njega?
19. Ar on ne delji po pravi pameti niti ono kaj bi moral obdržati niti ono kaj ne bi moral obdržati.
20. Opadanje lažljivoga jezika je kak onoga koj na tla opadne: tak bude opadanje hmanjeh naglo došlo.
21. Človek siten je kakti pripovest prazna: ona bude gusto vu vustah razvuzdaneh,
22. prirečje iz vust bedaka bude se zavrglo ar on je ne pove ob pravem času.
23. Je kojemu pomenjkanje brani grešiti i vu pokoju svojem podbadal se bude.
24. Je koj zgubi dušu svoju zaradi sramote i zaradi nespametne osobe zgubi nju: on bude zaradi ludskoga poštuvanja sebe pogubil.
25. Je koj zaradi sramote obeča prijatelu ter si ga prez potreboče neprijatela čini.
26. Laž je človeku mrska opšanost i je po gustom vu vustih razvuzdanih.
27. Gorši je tat kak na laži privčen človek, obodva pako budu pogublenje za del odvečtva prijeli.
28. Zadržavanje ljudih lažljiveh je prez poštenja i sramota njihova je z njimi prez prestanka.
29. Muder po rečih svojeh bude sebe izdal i človek pameten bude se velikašem dopal.
30. Koj zemlju svoju obdelava, bude vnogo žitka na kup spravil i koj pravicu dela, bude sam izvišen, koj se pako velikašem dopada, bude se krivici vugnul.
31. Prikazi i dari zaslepe sucom oči ter njih kakti neme čine da ne moreju pokarati.
32. Mudrost zakrita i kinči zakopani, kakovu hasen obodvoje doprinašaju?
33. Bolši je on koj nerazumnost svoju zakriva kak človek koj mudrost svoju zataja.