Ježuš vuči vu Cirkvi, oslobađa loternu ženu, imenuje sebe svetlost sveta ter se na svoje i na svojega Oca svedočanstvo poziva. Židovom veli da budu vu svojeh grehih vumrli, govori od svoje smrti i Židovi ga blazniju ter ga hočeju kamenuvati.
- Ježuš pako odide na Olivetansku goru,
- a vu jutro rano ipak dojde vu Cirkvu i vse ljudstvo je došlo k njemu i on se sede ter je nje vučil.
- Pisci pako i farizejuši dopeljaju ženu vu lotrovanju zapopađenu i nju postaviju vu sredinu
- ter rečeju njemu: „Mešter, ova žena je sada vu lotrovanju zapopađena.
- Vu Zakonu pako je nam Mojžeš zapovedal takvu kamenuvati. A kaj ti veliš?“ 3Moj 20,18.
- Ovo su pako rekli skušavajuči njega da bi ga mogli optužiti. Ježuš pako prignuvši se dole, z prstom je pisal na zemlji.
- Pokehdob pako oni nesu prestajali njega pitati, podignul se je gore i rekel njim: „Koj je zmed vas prez greha, on naj prvi hiti vu nju kamen.“ 5Moj 17,7.
- I on se je ipak prignul i pisal na zemlji.
- Poklamkam bi pako oni to bili čuli, jeden za drugem jesu van ishađali, počemši od najstarešeh,i ostal je sam Ježuš i žena koja je v sredini stala.
- Podigne se pako Ježuš i reče njoj: „Žena, gde su oni koji su te tužili? Kaj te nigdo ni opsudil?“
- Ona reče: „Nigdo, Gospone!“ Onda reče Ježuš: „Tak te niti ja neču opsuditi, hodi i buduč več naj grešiti!“
- Ježuš je zatem ipak njim govoril i rekel: „Ja jesem svetlost sveta: koj mene nasleduje, on ne hodi vu tmici, nego bude imel svetlost živlenja.“
- Onda njemu rečeju farizejuši: „Ti od samoga sebe svedočiš, tvoje svedočanstvo neje istinito.“
- Ježuš odgovori i reče njim: „Akoprem ja sam od sebe svedočim, tak je vendar moje svedočanstvo istinito ar ja znam otkud sem došel i kam idem, vi pako ne znate otkud ja dohađam, ali kam idem.
- Vi sudite poleg tela, ja pako nikoga ne sudim.
- I ako ja sudim, tak je moj sud istinit ar ja nesem sam, nego ja i Otec koj je mene poslal.
- I vu vašem Zakonu je pisano da dveh človekov svedočanstvo je istinito. 5Moj 17,6; 19,15.
- Vre pako ja jesem koj od samoga sebe svedočim i Otec koj je mene poslal svedoči od mene.“
- Oni anda rečeju njemu: „Gde je tvoj otec?“ Ježuš odgovori: „Vi niti mene ne poznate niti mojega Oca, da bi vi mene poznali, morebiti vi i mojega Oca poznali.“
- Ove reči je Ježuš govoril pri kinčoshranišču kad je vu Cirkvi vučili nigdo ni pograbil ar jošče ni bila došla njegva vura.
- Reče njim anda ipak Ježuš: „Ja othađam i vi me budete iskali i vu vašem grehu vumrli. Kam ja othađam, tam vi ne morete dojti.“
- Rečeju anda Židovi: „Je li bude morebiti samoga sebe vmoril pokehdob veli: ‛Kam ja othađam, tam vi ne morete dojti.’?“
- On pako reče njim: „Vi jeste odzdola, ja jesem odzgora. Vi jeste od ovoga sveta, ja nesem od ovoga sveta.
- Rekel sem anda vam: vi budete vu vašeh grehih vumrli ar ako ne budete veruvali da ja jesem, tak budete vu vašem grehu vumrli.“
- Oni onda rečeju njemu: „Anda gdo si ti?“ Ježuš reče njim: „Početek, koj takaj govorim.
- Ja imam vnoga od vas govoriti i suditi, ali on koj je mene poslal, je istinit i koja od njega jesem čul, ova ja govorim na svetu.“ Rim 3,4.
- I oni nesu spoznali da on Boga imenuje svojem Ocom.
- Reče njim anda Ježuš: „Kada budete izvisili Sina Človečjega, onda budete spoznali da ja jesem i od samoga sebe nikaj ne činim, nego ona govorim koja me je moj Otec navčil.
- I on koj je mene poslal, je z menum i on mene ne pušča samoga ar ja vsigdar činim kaj su njemu povoljna.“
- Ova kad bi on bil rekel, vnogi su vu njega veruvali.
- Ježuš anda reče onem Židovom koji su vu njega veruvali: „Ako vi ostanete vu mojem govorenju,za istinu budete moji vučeniki.
- I budete spoznali istinu i istina včini vas slobodne.“
- Oni odgovoriju njemu: „Mi jesmo Abrahamovo pokolenje niti nigdar nikomu nesmo služili. Kak ti veliš: ‛Vi postanete slobodni’?“
- Ježuš odgovori njim: „Stanovito, stanovito velim vam: vsaki koj čini greh, je sluga greha.
- Sluga pako ne ostaje naveke vu hiži, sin pako ostaje naveke.
- Ako li vas anda Sin včini slobodne, tak budete istinski slobodni.
- Ja znam da vi jeste Abrahamovi sini, ali vi mene iščete vmoriti kajti se vas moje govorenje prijemlje.
- Ja govorim kaj sem pri mojem Ocu videl, a vi činite kaj ste pri vašem Ocu videli.“
- Oni odgovoriju i rečeju njemu: „Naš otec je Abraham.“ Reče njim Ježuš: „Ako ste vi Abrahamovi sini, tak takaj dela Abrahamova činite.
- Sad pako iščete vi mene vmoriti, človeka koj sem vam povedal istinu koju sem čul od Boga – to ni Abraham činil.
- Vi činite dela vašega oca.“ Oni anda rečeju njemu: „Mi nesmo rođeni iz praznosti, mi imamo jednoga oca: Boga.“
- Reče njim anda Ježuš: „Da bi Bog bil vaš Otec, tak bi vi mene zaisto ljubili ar ja jesem iz Boga izišel i došel, ar ja nesem od samoga sebe došel, nego on je mene poslal.
- Zakaj ne poznajete moje govorenje? Kajti vi moje reči ne morete poslušati.
- Vi imate vraga za ocai hočete poleg poželenja vašega oca činiti. Ov je bil ljudomorec od početka i ni opstal vu istinikajti vu njem ni istine. Kada on govori laž, tak govori iz svojega lastovitoga ar je on lažec i otec laži.
- Ako pako ja istinu govorim, tak mi ne verujete.
- Gdo zmed vas more mene zbog kakvoga greha potvoriti? Ako vam ja istinu govorim, zakaj mi ne verujete?
- Koj je iz Boga, on Božje reči posluša; vi nje zato ne poslušate kajti neste iz Boga.“
- Židovi anda odgovoriju i rečeju njemu: „Je li mi ne govorimo prav da ti jesi Samaritanec ter da vraga imaš?“
- Ježuš odgovori: „Ja nemam vraga, nego poštujem mojega Oca, a vi mene ne opoštenujete.
- Ništarmanje ja ne iščem moje dike, je koj ju išče i sudi.
- Stanovito, stanovito velim vam: ako gdo obdržava moje reči, on ne bude naveke videl smrti.“
- Rečeju anda Židovi: „Sada spoznajemo da imaš vraga. Abraham i proroki jesu pomrli, a ti veliš: ‛Ako gdo obdržava moje reči, on ne bude naveke kušal smrti!’
- Jesi li ti anda vekši od našega oca Abrahama koj je vumrl? I proroki jesu pomrli. Kaj ti iz samoga sebe činiš?“
- Ježuš odgovori: „Ako ja samoga sebe dičim, tak moja dika ni nikaj – moj Otec je koj mene diči, od kojega vi govorite da je vaš Bog.
- Ali vi ne poznate njega, ja pako poznam njega. I ako bi ja rekel: ‛Ja njega ne poznam’, tak bi ravno takov lažec bil, kaki vi jeste. Ja poznam njega i obdržavam njegve reči.
- Abraham, vaš otec, je se veselil da bude videl moj dan – on je njega videl ter se je raduval.“
- Rečeju anda njemu Židovi: „Ti jošče nemaš pedeset let, pak si videl Abrahama?“
- Reče njim Ježuš: „Stanovito, stanovito, velim vam: prvlje neg je bil Abraham, ja jesem.“
- Pobirali su anda kamenje da bi vu njega hitali, Ježuš pako je se skril i izišel iz Cirkve.
