Sleporođeni dobiva vid, a videči postaju slepi.
- I kad bi Ježuš mimo bil prehađal,videl je nekojega človeka koj je bil od narođenja slep
- i njegvi vučeniki jesu njega pitali: „Mešter gdo je zagrešil da se je on slep narodil?“
- Ježuš odgovori: „Niti ov je zagrešil niti njegvi roditeli, nego da se vu njem očituju Božja dela.
- Ja moram opravljati dela onoga koj je mene poslal kak dugo je dan, dojde noč kada nigdo nemre delati.
- Doklam sem ja na svetu, jesem ja svetlost sveta.“
- Ova kad bi on bil zvustil, pljunul je na zemlju i iz sline naredil blato ter je blato naličil na oči njegve
- i rekel njemu: „Hodi, vmi se vu jezeru Siloje (kaj se tolnači ‘Poslani’).“ Odišel je anda i vmil se je ter je došel videči.
- Susedi pako i koji su njega prvlje videli da je bil bogec, jesu rekli: „Je li to ni on koj je sedel i prosil?“ Jedni su rekli: „Ovo je on!“
- Drugi pako: „Zevsema ne, nego je njemu spodoben.“ On sam pako je rekel: „Ja jesem taj isti!“
- Oni anda rečeju njemu: „Kak se jesu tebi oči otprle?“
- On odgovori: „Taj človek koj se zove Ježuš je naredil blato i namazal moje oči i rekel meni: ‛Hodi k splavišču Siloje pak se vmi!’ I ja sem odišel, vmil se ter sem pregledal.“
- I oni rečeju njemu: „Gde je taj isti?“ On reče: „Ja ne znam.“
- Oni pako onoga koj je bil slep dopeljaju k farizejušem.
- Bila je pako sobota kad je bil Ježuš naredil blato i otprl njegve oči.
- Pitali su ga anda ipak farizejuši kak bi bil pregledal. On pako reče njim: „On je meni blato postavil na oči i ja sem se vmil i pregledal.“
- Nekoji anda zmed farizejušev rečeju: „Ov človek koj sobote ne obdržava ni od Boga.“ Drugi pako rečeju: „Kak more grešen človek ova znamenja činiti?“ I bila je med njimi nesloga.
- Rečeju anda ipak slepomu: „Kaj ti veliš od onoga koj je tvoje oči otprl?“ On pako reče: „On je Prorok!“
- Židovi anda nesu veruvali od njega da je bil slep i pregledal doklam nesu pozvali roditele onoga koj je bil pregledal.
- I oni su nje pitali i rekli: „Je li je ovo vaš sin od kojega vi velite da se je slep narodil? Kak anda sada vidi?“
- Njegvi roditeli odgovoriju njim i rečeju: „Mi znamo da je to naš sin i da se je slep narodil.
- Kak pako on sada vidi, to mi ne znamo ali gdo je njegve oči otprl, to mi ne znamo. Pitajte njega! On je pri dobi, on sam naj govori od sebe!“
- Ova su njegvi roditeli rekli kajti se Židovov jesu bojali ar se Židovi vre jesu bili dogovorili da vsakoga koj goder bude njega valuval za Krištuša, iz spravišča van ishitiju.
- Zato su njegvi roditeli rekli: „On je pri dobi, pitajte njega!“
- Oni anda ipak pozoveju onoga človeka koj je bil slep i rečeju njemu: „Daj Bogu diku! Mi znamo da je ov človek grešnik.“
- On pako reče njim: „Je li je grešnik, to ja ne znam, jedino znam da sem bil slep, a sada vidim.“
- Oni anda rečeju njemu: „Kaj ti je on včinil? Kak ti je on otprl oči?“
- On odgovori njim: „Ja sem vam vre povedal i vi jeste čuli,zakaj vi to ipak hočete čuti? Je li i vi takaj hočete njegvi vučeniki postati?“
- Oni su anda njega kleli i rekli: „Ti budi njegov vučenik, mi pako jesmo Mojžeševi vučeniki.
- Mi znamo da je Bog z Mojžešem govoril; otkud pako je ov, to mi ne znamo.“
- On človek odgovori i reče njim: „To je vendar čudnovito da vi ne znate otkud je ov pokehdob je on moje oči otprl.
- Mi pako znamo da Bog ne posluša grešnike, nego ako gdo Bogu služi ter njegvu volju čini, ovoga on posluhne.
- Otkad svet stoji, ne se čulo da bi gdo bil otprl oči sleporođenoga.
- Da ov ne bi bil od Boga, tak nikaj ne bi mogel včiniti.“
- Oni odgovoriju i rečeju njemu: „Ti si ves vu grehih rođen, pak nas ti vučiš?“ I ishitili su njega van.
- Ježuš je čul da su ga van ishitili i kad bi njega bil našel, reče njemu: „Je li ti veruješ vu Sina Božjega?“
- On odgovori i reče: „Gdo je to, Gospone, da ja vu njega verujem?“
- A Ježuš reče njemu: „Ti si ga videl i koj z tobum govori, on je.“
- On pako reče: „Ja verujem, Gospone.“ I on opade dole ter se je njemu vklanjal.
- A Ježuš reče: „Ja sem na ov svet došel na sud da slepi pregledaju, a koji vidiju, slepi postaneju.“
- I nekoji zmed farizejušev, koji su z njim bili, jesu to čuli i rekli njemu: „Jesmo li i mi takaj slepi?“
- Reče njim Ježuš: „Da bi slepi bili, ne bi imali greh. Sad pak velite: ‛Mi vidimo!’ Zato vaš greh ostaje.“
