Prilika od dobroga pastira i najemnika. Židovi pitaju Ježuša je li je on Mesijaš. To on valuje i oni ga hočeju kamenuvati.
- „Stanovito, stanovito velim vam: koj vu ovčji hlev ne dohađa čez vrata, nego drugud nuter leze, on je tat i razbojnik.
- Koj pako čez vrata nuter dohađa, on je ovčji pastir.
- Ovomu vratar otpira i ovce njegov glas čuju i on zove lastovite ovce po imenu i nje van ispeljava.
- I kad svoje lastovite ovce van spusti, ide pred njimi i ovce nasleduju njega ar poznaju njegov glas.
- Stranjskoga pako ne nasleduju, nego beže od njega ar one glas stranjskeh ne poznaju.“
- Ovu priliku je njim rekel Ježuš, oni pako nesu razmeli kaj je on njim govoril.
- Ježuš anda reče njim ipak: „Stanovito, stanovito velim vam: ja jesem vrata k ovcam.
- Vsi, kuliko ih je goder došlo, jesu tati i razbojniki i ovce nesu nje poslušale.
- Ja jesem vrata. Ako gdo po meni vlezuje, on se bude zveličil, on bude nuter i van hodil i pašu našel.
- Tat samo zato dohađa da vkradne, zakolje i skonča; ja jesem došel da one imaju žitek ter da obilno imaju.
- Ja jesem dobri pastir.Dober pastir daje svoje živlenje za svoje ovce.
- Najemnik pako, koj ni pastir i kojega ovce nesu lastovite, vidi vuka dohađati, ostavi ovce i beži, a vuk grabi i i razganja ovce.
- Najemnik pako beži ravno zato kajti je najemnik i njemu na ovcah nikaj ni ležeče.
- Ja jesem dobri pastir i spoznajem moje i moje spoznavaju mene,
- kak mene pozna Otec i ja poznam Oca, i ja polažem moje živlenje za moje ovce. Mat 11,27; Luk 10,22.
- I ja imam jošče druge ovce koje nesu iz ove ovčarnice, takaj ove moram pripeljati i budu poslušale moj glas i postane jedna ovčarnica i jeden pastir.
- Zato mene ljubi Otec, kajti ja polažem moje živlenje da nje ipak vzemem.
- Nje nigdo ne jemlje od mene, nego ja nje sam od sebe polažem i ja imam oblast nje položiti i ja imam oblast nje ipak vzeti. Ovu zapoved jesem dobil od mojega Oca.“
- Na to je ipak zbog ovoga govorenja med Židovmi nastala nesloga.
- Vnogi zmed njih rekli su: „On ima vraga i nori; zakaj ga poslušate?“
- Drugi pako jesu rekli: „Ove reči nesu od z vragom opseđenoga. Je li more vrag oči slepeh otpreti?“
- Bil je pako ravno Svetek Cirkvenoga posvetila vu Jeruzalemu i bila je zima.
- I Ježuš je vu Cirkvi po Šalomonovem predvorju hodil.
- Židovi anda opstreju njega i rečeju njemu: „Kak dugo držiš našu dušu vu dvojnosti? Ako ti jesi Krištuš, tak nam očivesto poveđ!“
- Ježuš odgovori njim: „Ja vam povedam, ali vi ne verujete. Dela koja ja činim vu imenu mojega Oca, ova svedočiju od mene.
- Ali vi ne verujete kajti neste zmed mojeh ovec.
- Moje ovce poslušaju moj glas i ja spoznajem nje i one nasleduju mene.
- I ja njim dajem vekivečno živlenje i one naveke ne pogineju i nje iz mojeh ruk nigdo ne strgne.
- Kaj je meni moj Otec dal, je vekše od vsega i to nigdo ne more iz ruk mojega Oca strgnuti.
- Ja i Otec jesmo jedno.“
- Židovi su anda pobirali kamenje da bi ga kamenuvali.
- Ježuš odgovori njim: „Ja jesem vam vnoga dobra dela od mojega Oca pokazal. Zbog kojega zmed oveh del hočete mene kamenuvati?“
- Židovi odgovoriju njemu: „Mi tebe ne kamenujemo zbog dobroga dela, nego zbog blaznosti pokehdob da se načinjaš Bogom premda si človek.“
- Ježuš odgovori njim: „Je li vu vašem Zakonu ni pisano: ‛Ja jesem rekel: ‘Vi jeste bogi!’’ Šolt 81,6.
- Ako ov za Boge oziva one kojem je reč Božja včinjena i Pismo se ne more razmetati,
- kak velite onomu kojega je Otec posvetil i poslal na svet: ‛Ti blazniš!’, kajti sem rekel: ‛Ja jesem Sin Božji?’
- Ako ja ne činim dela mojega Oca, tak mi najte veruvati,
- ako pako ja nje činim, tak verujte delam ako nečete meni veruvati da spoznate i verujete da je Otec vu meni i ja vu Ocu!“
- Iskali su anda njega pograbiti, ali on se je vmeknul njihovem rukam.
- I odišel je ipak prek Jordana, na ono mesto gde je Ivan prvič krstil i ostal je onde.
- I vnogi jesu k njemu dohađali ter rekli: „Ivan zadnjič ni nikakvo znamenje včinil.
- Vsa vendar koja je Ivan od ovoga govoril, jesu istinska.“ I vnogi jesu vu njega veruvali.
