Ježuš ispričava svoje vučenike koji v sobotu trgaju lati, v sobotu zvrači vsehnjenu ruku i očituje se gosponom sobote. Njegvo krotko posluvanje. On izganja vrage po božanski mogučnosti. Greh proti Duhu Svetemu. Znamenje Jonaša. On vu srce nazad povračajuči se duh nečisti. Rodbina Ježuševa.
- Vu onem vremenu išel je Ježuš v sobotu po strni, vučeniki pako njegvi jesu bili gladni i počeli su trgati lati i jesti.
- Kaj kad bi farizejuši videli, rečeju njemu: „Nut, tvoji vučeniki čine kaj ni slobodno činiti vu sobotu.“
- On pako reče njim: „Je li neste čteli kaj je David včinil kad je bil gladen on i koji su z njim bili?
- Kak je zašel vu Božju hižu i jel sveti kruh kojega jesti ni bilo slobodno njemu niti onem koji su z njim bili, nego samem aldovnikom.
- Ali je li neste čteli vu Zakonu da aldovniki sobotu vu Cirkvi prekršuju ter jesu prez greha?
- Ja pako velim vam da je ovde vekši od Cirkve.
- Da bi pako znali kaj je to: ʻMilosrdnost hoču, a ne aldovʼ, nigdar ne bi bili opsudili nedužne.
- Ar Sin Človečji je takaj sobote gospon.“
- I kad bi odonud bil odišel, došel je vu njihovu sinagogu.
- I, nut, bil je tam nekoj človek koj je imal vsehnjenu ruku i oni pitali su njega govoreči: „Je li je slobodno v sobotu vračiti?“, da bi ga mogli optužiti.
- On pako reče njim: „Gdo bude zmed vas takov človek koj bi imal jednu ovcu i ako ova opadne vu sobotu vu jamu, je li ju ne bude popal i van potegnul?
- Kuliko pako boljši je človek od ovce? Anda je slobodno po sobotah dobro činiti.“
- Onda reče človeku: „Pretegni tvoju ruku!“ i pretegnul ju je i je postala zdrava kak i ta druga.
- Farizejuši pako jesu izišli i držali tolnač proti njemu kak bi ga pogubili.
- Kaj kad bi Ježuš bil spoznal, odišel je odonud i nasleduvala ga je vnožina i vse je zvračil
- i zapovedal je njim da ga ne bi očituvali.
- Da bi se ispunilo kaj je rečeno po Izaijašu proroku govorečem:
- „Nut, ovo je moj sluga kojega si jesem izebral, moj ljubljeni vu kojem se je jako vdobrovoljila moja duša. Na njega položim mojega duha i sud bude nazveščal narodom.
- On se ne bude svadil niti kričal niti nigdo ne bude čul njegov glas na vulicah,
- trstinu nalomljenu ne potere i predivo kadeče ne vgasi doklam ne ispelja sud na obladanje
- i vu njegvem imenu budu se narodi ufali.“
- Onda dopeljan je pred njega nekoj od vraga opseđeni koj je bil slep i nem i zvračil ga je tak da je govoril i videl.
- I osupnulo se je vse ljudstvo i reklo: „Je li to ni Sin Davidov?“
- Kaj kad bi farizejuši bili čuli, rekli su: „Ov ne izganja vrage nego po Belzebubu, vražjem poglavaru.“
- Kajti pako Ježuš je znal njihove misli, reče njim: „Vsako kraljestvo koje je proti sebi razdeljeno opuste i vsaki varaš ali hiža proti sebi razdeljena ne opstane.
- I ako Šatan Šatana izganja, tak je sam proti sebi razdeljen, kak bude anda njegvo kraljestvo opstalo?
- I ako ja po Belzebubu izganjam vrage, po kom nje izganjanju vaši sini? Zato oni sami budu vaši suci.
- Ako pak ja po Božjem Duhu izganjam vrage, tak je anda Kraljestvo Božje k vam došlo.
- Ali, kak more gdo nuter zajti vu hižu jakoga i njegvu posudu z silum oteti ako prvlje ne zveže jakoga? I onda bude njegvu hižu oplenil.
- Koj ni z menum, taj je proti meni i koj ne spravlja z menum, taj rasipava.
- Zato velim vam: vsaki greh i blaznost otpusti se ljudem ali blaznost proti Svetomu Duhu ne otpusti se.
- I koj proti Sinu Človečjemu reče kakvu reč, otpusti se njemu. Koj pako reče proti Svetomu Duhu, njemu se niti na ovem niti vu budučem svetu ne otpusti.
- Ali sadete dobro drevo i sad njegov dober, ali sadete zločesto drevo i sad njegov zločest. Pokehdob se iz sada drevo spoznaje.
- Vi, kačje leglo! Kak morete dobra govoriti pokehdob ste hmanji? Ar iz obilnosti srca govoriju vusta.
- Dober človek iz dobroga kinča svojega srca naprvo donaša dobra, a hmanji človek iz zločestoga kinča naprvo donaša zločesta.
- Velim pako vam da od vsake prazne reči koju budu ljudi govorili, budu od nje na Sudnjem danu račun dali.
- Ar iz tvojeh budeš opravičen i iz tvojeh rečih budeš opsuđen.“
- Onda su njemu nekoji zmed pismoznancev i farizejušev odgovorili i rekli: „Mešter, mi hočemo od tebe znamenje videti.“
- On pako odgovori i reče njim: „Ov hmanji i loterski narod išče znamenje ali se njemu ne bude dalo znamenje, nego znamenje Jonaša proroka.
- Ar kak je bil Jonaš vu trbuhu kita tri dni i tri noči, tak bude Sin Človečji v srcu Zemlje tri dni i tri noči.
- Ljudi Ninivitanci podigneju se gore na sud proti ovomu narodu i budu ga opsudili ar su oni na Jonaševo prodekuvanje pokoru činili. I, nut, ovde je več nego Jonaš.
- Kraljica od Juga podigne se na sud z ovem narodom i bude ga opsudila ar je ona došla od krajov zemlje poslušat Šalomonovu mudrost. I, nut, ovde je več kak Šalomon.
- Kada pako nečisti duh izide iz človeka, ophađa suha mesta, išče počinek i ne najde.
- Onda veli: ʻPovrnem se vu hižu moju, otkud sem van izišel.ʼ I kada dojde, najde nju praznu, z metlami očiščenu i nakinčenu.
- Onda ide i vzeme z sobum sedem drugeh duhov goršeh od sebe i vlezneju ter stanuju onde i poslednja človeka ovoga bivaju gorša od prvešeh. Ravno tak bude i ovomu najgoršemu narodu.“
- Dok bi on jošče govoril ljudstvu, nut, njegva mati i brati stali su vani i iskali su priliku da bi z njim mogli govoriti.
- Reče pako njemu nekoj: „Nut, tvoja mati i tvoja bratja stoje vani i iščeju tebe.“
- On je pako onomu koj mu je to povedal odgovoril i rekel: „Gdo je moja mati i koji su moji brati?“
- I pretegne ruku na svoje vučenike i reče: „Nut, moje matere i mojeh bratov!
- Ar koj goder čini volju mojega Oca koj je na Nebesih, on je moj brat i sestra i mati.“
