Prispodoba od semena, kukolja, muštardovoga zrna, kvasa, skritoga kinča, od đunđa i mreže. Ježuš se vu svojoj domovini za nemar drži.
- Vu onem dnevu izide Ježuš iz hiže i sede si poleg morja.
- I skup spravila se je k njemu vnožina ljudstva tak da je moral v lađu stupiti i tam sedeti, vse pako ljudstvo je stalo na bregu.
- I govoril je njim vnoga vu prilikah rekuvši: „Nut, izišel je sejač sejat.
- I kad bi sejal, nekoje opalo je poleg puta i došle jesu nebeske ptice ter su je pozobale.
- Drugo pako je opalo na pečinu gde ni imalo dosta zemlje i sproti je pognalo zato kajti ni imalo gliboke zemlje.
- Kad je pako Sunce izišlo, zgorelo je i kajti ni imalo korenja, je posehnulo.
- Nekoje pako je opalo med trnje i trnje je zraslo ter je nje zadušilo.
- Nekoje pako je opalo vu dobru zemlju i doprineslo je sad, nekoje stovrsni, nekoje šezdesetvrsni, nekoje tridesetvrsni.
- Koj ima vuha na poslušanje, naj posluhne.“
- I pristupivši vučeniki rekli su njemu: „Zakaj njim govoriš vu prilikah?“
- On odgovorivši reče njim: „Zato, kajti je vam dano znati skrovnosti Kraljestva nebeskoga, njim pako ni dano.
- Ar koj ima, da se njemu i bude obiljuval, koj pako nema, od njega se i ono vzeme kaj ima.
- Ja njim zato vu prilikah govorim kajti glediju, pak ne vidiju i poslušaju, pak ne čuju niti ne razmeju.
- I nad njimi se spunjava proročanstvo Izaijaša koj veli: ʻVi budete čuli, ali ne budete razmeli, vi budete gledali, ali ne budete videli.ʼ
- Ar srce ovoga ljudstva je otvrdelo i z vuhmi jesu teško čuli i svoje oči jesu zaprli da ne bi gda videli z očmi i z vuhmi čuli i srcem razmeli ter se obrnuli i ja nje zvračil.
- Vaše pako oči jesu blažene kajti vidiju i vaša vuha kajti čuju.
- Ar stanovito velim vam da su vnogi proroki i pravični želeli videti ona koja vi vidite i nesu videli i čuti koja vi čujete i nesu čuli.
- Vi anda poslušajte tu priliku od sejača.
- Vsaki koj čuje reč Kraljestva, pak ju ne razme, dojde hudi i otme kaj je v njegvem srcu posejano: ovo je on koj je poleg puta posejan.
- Koj je pako zvrhu pečine posejan, to je on koj reč čuje i nju taki z veseljem prijemlje,
- ali ov nema vu sebi korenja, nego samo za čas trpi. Ako pako za volju reči nastaje traplenje i pregon, sproti se spači.
- Koj je pako v trnje posejan, to je on koj reč čuje, ali skrb ovoga sveta i vkanljivost bogatstva zaduši reč i ostane prez sada.
- Koj je pako v dobru zemlju posejan, to je on koj reč posluša i razme i sad doprinese i čini nekoji stovrsni, nekoji šezdesetvrsni, nekoji pako tridesetvrsni.“
- On je njim drugu priliku naprvo postavil, govoreči: „Spodobno je Kraljestvo nebesko človeku koj je posejal dobro seme na svojem polju.
- Kad bi pak ljudi spali, dojde njegov neprijatel i nadosejal je med pšenicu kukolja i odišel je.
- Kad bi pak zrasla bila trava i sad doprinesla, onda se je pokazal i kukolj.
- Pristupivši pako slugi gospodara, rekli su njemu: ʻGospone, nesi li ti dobro seme posejal na tvojem polju? Otkud anda ima kukolja?ʼ
- I reče njim: ʻNeprijatel človek je to včinil.ʼ Slugi pako rekli su njemu: ʻHočeš li da idemo ter ga van izberemo?ʼ
- I reče: ʻNe, da morebiti izbirajuči kukolja ne ispučete z njim i pšenicu.
- Pustete obodvoje rasti do žetve i vu vremenu žetve rečem žnjačem: ‘Poberite najprvič kukolj ter ga povežite vu snope na požganje, a pšenicu spravete vu moj škedenj!’ʼ“
- Drugu priliku je njim naprvo postavil govoreči: „Spodobno je Kraljestvo nebesko muštardovomu zrnu koje vzemši človek posejal je na svojem polju.
- Koje zaisto je najmenjše med vsem semenjem, ali kada zraste, vekše je od vsake povrtelji i postane drevo tak da ptice nebeske dohađaju i na njegveh svržih prebivaju.“
- Drugu priliku reče njim: „Spodobno je Kraljestvo nebesko k kvasu kojega vzemši žena je zamesila vu tri drevenke melje doklam se je vse zakvasilo.“
- Vsa ova je govoril Ježuš vu prilikah ljudstvu i prez prilik nikaj im ni govoril
- da bi se ispunilo kaj je bilo rečeno po proroku govorečemu: „Budem otpiral moja vusta u prilikah i očitujem zakrita od postanka sveta.“
- Onda otpustivši Ježuš od sebe ljudstvo, išel je vu hižu i pristupili su k njemu njegvi vučeniki govoreči: „Rastolnači nam priliku od kukolja na polju.“
- On pako odgovorivši reče njim: „Koj dobro seme seje, je Sin Človečji.
- Polje pako je svet. Dobro pako seme, to su sini Kraljestva, kukolj pako, to su sini Hudobnoga.
- Neprijatel pako koj ga je posejal je vrag. Žetva pako je skončanje sveta. Žnjači pako jesu angeli.
- Anda, kak se goder kukolj pobira ter se z ognjem zežge, ravno tak bude o skančanju sveta.
- Sin Človečji pošlje svoje angele i pobereju iz njegvoga Kraljestva vse spačke i one koji činiju krivicu.
- I hitiju nje vu ognjenu peč. Onde bude plač i škripanje zubih.
- Onda se pravični budu svetili kakti Sunce vu kraljestvu svojega Oca. Koj ima vuha na poslušanje, naj posluša.
- Spodobno je Kraljestvo nebesko kinču na polju skritomu kojega on človek koj ga je našel skrije i od veselja zbog njega ide i proda vsa koja ima i kupi ono isto polje.
- Ipak je spodobno Kraljestvo nebesko človeku trgovcu koj išče drage đunđe,
- kad pako najde jednoga dragoga đunđa, ide i proda vsa koja ima i kupi njega.
- Ipak je spodobno Kraljestvo nebesko mreži koja se hita vu morje ter vsakojačke fele rib zavjimlje.
- Koju kad je puna, van zvlečeju i pri bregu sedeči dobre izbiraju vu posude, zločeste pako van pohitaju.
- Ovak bude o skančanju sveta: izideju angeli i razlučiju zločeste od pravičneh
- i hitiju nje vu ognjenu peč, onde bude plač i zubih škripanje.
- Jeste li razmeli vsa ova?“ Rečeju njemu: „Jesmo!“
- Reče njim: „Zato je vsaki pismoznanec koj je zvučen vu Nebeskem kraljestvu spodoben človeku hižnomu gospodaru koj iz svojega kinča nova i stara naprvo donaša.“
- I včinjeno je, kad bi dokončal bil Ježuš ove prilike, odišel je od ovud.
- I kad bi došel vu svoju domovinu, vučil je nje vu njihoveh sinagogah tak da su se čudili i govorili: „Otkud je ovomu ova mudrost i moč?
- Je li ni ov sin drvodelavca? Je li se ne zove njegva mati Marija, a njegvi brati Jakop i Jožef i Šimun i Judaš?
- I njegve sestre je li nesu vse pri nas? Otkud su anda njemu vsa ova?“
- I oni se vu njem jesu spačuvali. Ježuš pako reče njim: „Neje prorok prez poštenja, nego vu svojoj domovini i vu svojoj hiži.“
- I ni včinil onde vnogo čud zbog njihove nevernosti.
