Ponizni budu izvišeni. Dečinska čud. Opomenek da se deca naj ne spačiju. Prilika od ovce koja je bila zabljudila. Red kojem se bratinsko pokaranje zvršavati mora. Oblast ključev apoštolom predana. Kuliko puti mora se opraščati.
- Vu onoj vuri pristupili su vučeniki k Ježušu govoreči: „Kaj štimaš, gdo je najvekši vu Kraljestvu nebeskem?“
- Ježuš pako dozove k sebi nekojega dečareca i postavi njega oposred med nje
- i reče: „Stanovito velim vam: ako se ne obrnete i ne postanete kakti deca, ne zajdete vu Kraljestvo nebesko.
- Anda, koj se goder ponizi kakti ov dečarec, on je najvekši vu Kraljestvu nebeskem.
- I koj jednoga takvoga maloga prijemlje vu mojem imenu, on mene prijemlje.
- Koj pako jednoga zmed oveh maleh, koji vu me veruju, bude spačil, tomu bi bolje bilo da bi mu se za njegov vrat obesil melinski kamen i vtopil vu morskoj gljublini.
- Jaj svetu zbog spačkih! Potrebno je pako da bivaju spačke. Ništer manje, jaj onomu človeku po kojem dojde spačka.
- Ako pako tebe tvoja ruka ali tvoja noga spačuje, odreži ju i hiti od sebe. Ar tebi je bolje da oknjasten ali plantav vlezneš vu žitek, nego da bi dve ruke ali dve noge imal ter se bi hitil vu vekivečni ogenj.
- I ako tebe tvoje oko spačuje, spehni nje i hiti od sebe. Ar tebi je bolje da ti z jednem okom vlezneš vu žitek, nego da bi dva oka imal ter se hitil vu peklenski ogenj.
- Pazete da nijednoga zmed oveh maleh ne zamečete. Ar velim vam da njihovi angeli vu Nebesih vsigdar gledaju lice mojega Oca koj je na Nebesih.
- Ar Sin Človečji je došel zveličiti kaj je bilo poginulo.
- Kaj se vam vidi? Da bi koj človek imal sto ovec, pak bi jedna zmed njih zabljudila, je li ne ostavi devedeset i devet na gorah i ide iskat onu koja je zabljudila?
- I ako se pripeti da ju najde, stanovito velim vam da se zvrhu nje bolje veseli nego zvrhu devedeset i deveteh koje nesu zabljudile.
- Ravno tak ni volja vašega Oca, koj je na Nebesih, da bi neg jeden zmed oveh maleh poginul.
- Ako pako zagreši proti tebi tvoj brat, hodi i pokaraj ga med tobum i med njim samem, ako te posluhne, dobil si tvojega brata.
- Ako te pak ne posluhne, vzemi z sobum jošče jednoga ali dva da vu dveh ali treh svedokov vustih opstoji vsaka reč.
- Ako pako niti nje ne posluhne, tak poveđ cirkvi i ako niti cirkvu ne posluhne, naj ti bude kakti poganin i očivesni grešnik.
- Stanovito velim vam: koja goder zavežete na Zemlji, budu zavezana i vu Nebu i koja goder odvežete na Zemlji, budu odvezana i vu Nebu.
- Ipak velim vam: ako se dva zmed vas na Zemlji zjediniju zvrhu kakvoga goder dugovanja za koje budu prosili, tam im se bude dalo od mojega Oca, koj je na Nebesih.
- Ar gde se goder dva ali tri skup spraviju vu mojem imenu, onde sem ja oposred med njimi.“
- Onda pristupivši k njemu Peter reče: „Gospone, kuliko puti budem ja mojemu bratu oprostil ako li on suproti meni zagreši? Sedemkrat?“
- Reče njemu Ježuš: „Ja velim tebi, ne sedemkrat, nego sedemdeset i sedemkrat.
- Zato je Kraljestvo nebesko prispodobljeno k človeku kralju koj je hotel račun včiniti z svojemi slugmi.
- I kad bi bil počel račun delati, bil je pred njega dopeljan jeden koj mu je bil dužen deset jezer talentumov.
- Kajti pako ni imal z čem bi bil naplatil, zapovedal je njegov gospon njega i njegvu ženu i decu i vsa koja je imal prodati ter platiti.
- Sluga pako on je pokleknul i prosil njega govoreči: ʻImaj potrplenje z menum i vsa ti povrnem.ʼ
- I smiluval se je gospon slugi onomu, pustil njega i ves dug je njemu otpustil.
- Kad bi pako ov isti sluga van bil izišel, našel je jednoga zmed svojeh skupslužbenikov koj mu je bil dužen sto denjarov i pograbil je njega i gnjavil govoreči: ʻPlati kaj si dužen!ʼ
- Njegov pako skupslužbenik je pokleknul i prosil njega govoreči: ʻImaj potrplenje z menum i vsa ti platim.ʼ
- On pako ni hotel, nego je odišel i postavil njega na vuzu dok bi dug platil.
- Kad bi pako njegvi skupslužbeniki bili videli koja se jesu dogodila, kruto se jako jesu ražalostili. I došli jesu ter povedali svojemu gosponu vsa koja su bila včinjena.
- Onda ga dozove njegov gospon i reče njemu: ʻTi malovredni sluga! Ja sem tebi ves dug oprostil kajti si me prosil.
- Je li se anda i ti ne bi bil moral smiluvati tvojemu skupslužbeniku kak se i ja tebi jesem smiluval?ʼ
- I rasrdil se je njegov gospon i predal njega haharom doklam bi ves dug platil.
- Ravno tak i moj Otec nebeski včini vam ako ne otpustite vsaki svojemu bratu iz svojega srca.“
