Prilika od kraljevskoga goščenja. Dajte Bogu koja su Božja, a cesaru koja su cesarova. Gorestajanje od mrtveh. Najvekša zapoved. Mesijaš je Sin i Gospon Davidov.
- I odgovorivši Ježuš govoril je njim ipak vu prilikah i rekel:
- „Spodobno je včinjeno Kraljestvo nebesko človeku kralju koj je sinu svojemu načinil svadbu.
- I poslal je svoje sluge zvat pozvane na svadbu, a oni nesu hoteli dojti.
- Ipak je poslal druge sluge govoreči: ʻRecete pozvanem: ‘Nut moj obed jesem pripravil, moji telci i živad je poklana i vsa su gotova, hote na svadbu.’ʼ
- Oni pako nesu marali i odišli su nekoji na svoje selo, a nekoji za svojem trštvom.
- Ostali pako jesu pograbili njegve sluge i nje opšanjene jesu pomorili.
- Kralj pako, kad bi to bil čul, je se rasrdil i poslal svoje šerege i skončal je one ljudomorce i
varaš njihov požgal.
- Onda reče svojem slugam: ʻSvadba je zaisto pripravljena, ali koji su bili pozvani, nesu je bili vredni.
- Pojte anda na ishotke putov i pozovite na svadbu koga goder najdete.ʼ
- I njegvi sluge izišli su na pute i skup spravili su vse koje su našli, zle i dobre, i napunila se je svadba z goščeniki.
- Zašel je pako nuter kralj da bi videl sedeče i zagledal je onde človeka koj ni bil z svadbenum svitum odeven.
- I reče njemu: ʻPrijatel, kak si sim nuter došel, a nemaš svadbene svite?ʼ On pako je zanemel.
- Onda reče kralj slugam: ʻZvežite mu ruke i noge ter ga vrzete vu zvanjske tmice. Onde bude plač i zubih škripanje.ʼ
- Ar vnogo je pozvaneh, ali malo izebraneh.“
- Onda su odišli farizejuši i držali tolnač kak bi njega vu govorenju vlovili.
- I poslali su k njemu svoje vučenike z herodijanci govoreči: „Mešter, mi znamo da si istinit i da put Božji vu istini vučiš ter da za nikoga ne mariš ar ne gledaš na osobu ljudih.
- Poveđ nam anda kaj se tebi vidi: je li je slobodno davati daču cesaru ali ne?“
- Ježuš pako, pokehdob je spoznal njihovu himbenost, reče: „Vi, skazlivci, kaj me skušavate?
- Pokažite mi dačni penez.“ A oni jesu njemu dali jeden desetak.
- I reče njim Ježuš: „Čiji je ov kip i napisek?“
- Veliju njemu: „Cesarov.“ Onda reče njim: „Dajte anda koja su cesareva cesaru i koja su Božja Bogu.“
- I kad bi to bili čuli, jesu se čudili i ostavivši njega jesu odišli.
- On isti dan pristupili su k njemu saducejanci, koji veliju da ni gorestajanja, i pitali su njega
- govoreči: „Mešter, Mojžeš je rekel ako gdo vumre, pak nema sina, da vzeme njegov brat njegvu ženu ter obudi odvetka svojemu bratu.
- Bilo je pako pri nas sedem bratov i oženil se je prvi i vumrl je, kajti pako ni imal dece, ostavil je svoju ženu svojemu bratu.
- Ravno tak takaj drugi i tretji tja do sedmoga.
- Najzadnjič pako za vsemi vumrla je takaj žena.
- Ob gorestajanju anda kojega zmed oveh sedmeh bude ona žena ar vsi su ju imali?“
- Ježuš pako odgovorivši reče njim: „Vi bludite pokehdob niti Pisma niti moč Božju ne razmete.
- Ar ob gorestajanju ne budu se niti ženili niti vdavale, nego budu kakti angeli Božji vu Nebesih.
- Kaj se pako gorestajanja mrtveh dotiče, kaj neste čteli kaj je rekel Bog pokehdob vam veli:
- ʻJa jesem Bog Abrahama i Bog Izaka i Bog Jakopa.ʼ Bog pako ni Bog mrtveh, nego živeh.“
- Kad bi ljudstvo to bilo čulo, je se čudilo nad njegvem navukom.
- Kad su pako farizejuši začuli da je on saducejancom vusta zaprl, skup se jesu zebrali
- i opita ga jeden zmed njih, pravdoznanec, skušavajuči njega:
- „Mešter, koja je to najvekša zapoved vu Zakonu?“
- Reče njemu Ježuš: „ʻLjubi Gospona Boga tvojega iz vsega srca tvojega i iz vse duše tvoje i iz vse pameti tvoje.ʼ
- Ova je najvekša i prva zapoved.
- Druga pako je ovoj spodobna: ʻLjubi bližnjega tvojega kakti samoga sebe.ʼ
- Vu oveh dveh zapovedih zadržava se ves Zakon i proroki.“
- Kad bi se pako farizejuši bili skup izišli, pital je nje Ježuš
- govoreči: „Kaj se vam vidi od Krištuša? Čiji sin je on?“ Rečeju njemu: „Davidov.“
- Reče njim: „Kak anda David njega vu duhu oziva Gosponom govoreči
- ʻRekel je Gospon mojemu Gosponu: ‘Sedi se na desnicu moju doklam postavim tvojega neprijatela za klupčicu tvojeh nog.’?ʼ
- Ako anda David njega zove Gosponom, kak je njegov sin?“
- I nigdo mu na to niti jedne reči ni mogel odgovoriti niti se nigdo podstupil od onoga dneva njega več pitati.
