Šavel i Barnabaš na zapoved Duha Svetoga odlučuju se na nazveščenje med poganini. Barježuša pako ili Elimaša coprnjaka, koj se nazveščenju njihovomu je suprotstavljal, na reč Pavla oslepivši, veruju. Sergijus Pavel vu Antiokiji Pisidijanski vu sinagogah obilneše nazvešča od Krištuša, ali pokehdob Židovi blaznili i pregon proti njim obudili, obračaju se k poganinom poleg proročanstva Izajijaševoga.
- Bili su pako vu cirkvi koja je bila vu Antiokije proroki i navučiteli med kojemi je bil Barnabaš, Šimun, koj se je zval Niger, Lucijuš Cirenejski i Manahen, koj je bil z Herodešem četrtostrančnikom otkojen, i Šavel.
- Kad bi pako ovi Gosponu svetu službu opravljali ter postili, reče njim Duh Sveti: „Odlučete mi Šavla i Barnabaša na delo na koje ja nje jesem prijel.“
- Onda su oni postili i oni su molili i položili na nje ruke i otpustili su nje.
- I oni zadnjič poslani od Duha Svetoga odišli jesu v Seleuciju i odonud prebrodili su vu Cipruš.
- I kada bi bili došli vu Salaminu, nazveščali jesu reč Božju vu sinagogah židovskeh. Imeli su pako takaj Ivana vu službi.
- I kada bi bili obišli celo međim[orj]e tja do Pafusa, našli jesu nekojega človeka, coprnjaka, krivoga proroka, Židova, kojemu ime je bilo Barjezu,
- koj bil je z večnikonamesnikom Sergijušem Pavlom, z človekom razumnem. Ov, prizvavši Barnabaša i Šavla, željel je čuti reč Božju.
- Suprotstavljal se je pako njim Elimas coprnjak (ar tak se rastolnačuje ime njegovo) iščuči odvrnuti večnikonamesnika od vere.
- Šavel pako, koj se takaj Pavel zove, napunjen z Duhom Svetem, pogledavši vu njega,
- rekel je: „O, pun vse prevare i vse vkanljivosti, sin vražji, neprijatel vse pravice, ne prestaješ prevračati ravne pute Gosponove.
- I, nut, sada je ruka Gosponova nad tobum i budeš slep, nevideči Sunca do stanovitoga vremena.“ I sproti opala je na njega temnost i tmica i okolo hodeči iskal je koj bi mu ruku dal.
- Onda večnikonamesnik, kak bi bil videl kaj se je pripetilo, veruval je čudeči se nad navukom Gosponovem.
- I kada bi bili od Pafuša odbrodili, Pavel i koji z njim bili jesu, došli su v Pergu Pamfilije. Ivan pako odiduči od njih, povrnul se je v Jeruzalem.
- Oni pako iduči čez Pergu, došli jesu vu Antiokiju Pizidije i vleznuvši vu sinagogu sobotni dan, seli su.
- Po čtenju pako Zakona i prorokov poslali jesu poglavari sinagoge k njim govoreči: „Ljudi bratja, ako je reč vu vami na opominanje ljudstva, povečte!“
- Stavši se pako Pavel i z rukum mučanje nazvestivši, reče: „Ljudi Izraelci i koji se bojite Boga, posluhnete!
- Bog puka izraelskoga odebral je oce naše i puka izvisil kad bi bili prihodniki vu zemlji egiptonski i z rukum visokum ispeljal je nje iz ove
- i čez četrdeset let vremena šege njihove podnašal je vu puščini.
- I zaterivši pukov sedem vu zemlji kananejanski, po sreči razdeljil je njim zemlju njihovu
- kakti za četiristo i pedesetemi letmi i zatem dal im je suce tja do Samuela proroka.
- A od onda prosili jesu kralja i dal im je Bog Saula, sina Cisovoga, človeka od pokolenja Benjaminovoga, četrdeset let.
- I kada bi bil on zvržen, obudil je njim Bog Davida za kralja, kojemu svedočanstvo dajuči rekel je: ʻNašel sem Davida, sina Jesevoga, človeka poleg srca mojega, koj spunil bude vse volje moje.ʼ
- Iz ovoga semena je Bog poleg obečanja obudil Izraela zveličitela Ježuša.
- Kada prvlje nazveščal je Ivan pred licem došestka njegovoga krsta pokore vsemu puku izraelskomu.
- Kada bi pako dokončal Ivan tečaj svoj, rekel je: ʻZa koga mene štimate, nesem ja, ali, nut, ide za menum kojemu nesem vreden obutelji nog njegoveh odvezati.ʼ
- Ljudi bratja, sini pokolenja Abrahamovoga i koji se med vami Boga bojiju, vam je reč ovoga zveličenja poslana.
- Ar oni koji su stanuvali vu Jeruzalemu i njihovi poglavari, pokehdob da nesu spoznali ovoga, spunili su po svojem opsuđenju reči prorokov koje se vsaku sobotu čteju.
- I akoprem oni vu njem nikakov zrok smrti nesu našli, tak su vendar prosili Pilatuša da bi ga vmorili.
- I kad bi bili ispunili vsa koja su od njega pisana bila, zneli su ga dole iz dreva i položili vu grob. Mat 27,59. i sled.
- Ali Bog je prebudil njega na tretji dan od mrtveh i on se je iskažuval vnogo dnevov onem
- koji su skupa z njim od Galileje vu Jeruzalem gore došli, koji do sada jesu njegovi svedoki pri ljudstvu.
- I mi vam nazveščamo ono obečanje koje je včinjeno našem ocem
- ar ovo je Bog ispunil deci našoj pokehdob je obudil Ježuša, kak i vu drugem šoltaru pisano stoji: ʻTi si moj sin, ja sem tebe denes porodil.ʼ
- Da ga je pako obudil od mrtveh i da se več ne bude vu sprhnenje povrnul, tak je rekel da ʻdal budem vam sveta Davidu vernaʼ.
- I zato takaj drugde veli: ʻNe budeš dal svetomu tvojemu videti sprhnenje.ʼ
- Ar David vu pokolenju svojem kada bi bil doslužil, poleg volje Božje je zaspal i položen je k ocem svojem i videl je sprhnenje.
- Kojega pako Bog obudil je od mrtveh, ni videl sprhnenje.
- Znamo anda naj bude vam, ljudi bratja, da se po ovem vam otproščenje grehov nazvešča i od vseh od kojeh se neste mogli vu zakonu Mojžeševem opravičiti,
- vu ovem se vsaki koj veruje opraviči.
- Pazete anda da ne nadojde zvrhu vas kaj rečeno je vu Prorokih:
- ʻViđte, zametavci, i čudite se i poginete ar delo opravljam ja vu dnevih vašeh, delo koje ne budete veruvali ako vam gdo pove.ʼ“
- Poklamkak bi bili izišli, prosili jesu da buduču sobotu bi govorili njim reči ove.
- Kada bi se pako razišlo bilo spravišče, nasleduvali jesu vnogi zmed Židovov i preobrnjeneh prihodnikov Pavla i Barnabaša koji govoreči nagovarjali su nje da bi opstali vu milošči Božji.
- Buduču pako sobotu skoro ves varaš skup izišel se je poslušati reč Božju.
- Videči pako vnožine, Židovi napunili su se z jalom i protigovorili su onem kojem se od Pavla povedala jesu blazneči.
- Onda su srčeno Pavel i Barnabaš rekli: „Vam je potrebno bilo najprvič govoriti reč Božju, ali pokehdob ju zamečete i nevredne vas sudite žitka vekivečnoga, nut, obračamo se k poganinom.
- Ar ovak zapovedal je nam Gospon: ʻPostavil sem te na svetlost poganinom da njim budeš na zveličenje tja do skradnje zemlje.ʼ“
- Čujuči pako poganini raduvali se jesu i dičili reč Gosponovu i veruvali jesu kuliko ih goder je bilo preodebraneh na žitek vekivečni.
- Rasejavala se je pako reč Gospona po vsoj državi.
- Židovi pako podbadali su žene pobožne i poštene i prvešine varaša i obudili su preganjanje proti Pavlu i Barnabašu i ishitili su nje iz krajov svojeh.
- A oni, stepivši prah nog svojeh na nje, došli su vu Ikoniju.
- Vučeniki takaj napunjavali su se z veseljem i Duhom Svetem.
