Kada bi vnogi zmed Židovov i poganinov vu Ikoniji veru vu Krištuša prijeli, obudi se od Židovov halabuka proti apoštolom koji pobegnuli jesu vu Lištru gde Pavel hromoga od vutrobe materinske ozdravlja, zbog kojega čuda puka i aldovnike, koji njim zato božansko poštenje iskazati jesu hoteli, komaj preprečuju, ali spuntana od Židovov nadojdučeh vnožina kamenuje Pavla i kakti zamrtev ostavlja se. Kad bi se bil pako stal, on i Barnabaš vučenike po razlučeneh mestah opominajuči i redovnike redeči povračaju se vu Antiokiju.
- Dogodilo se je pako vu Ikoniji da bi skupa išli vu spravišče židovsko ter govorili tak da bi veruvala Židovov i Grkov obilna vnožina.
- Koji pako neverni bili jesu Židovi, podšuntali jesu i na srditost pobudili duše poganinov proti bratom.
- Vnoga anda vremena jesu se tam zadržavali, srčeno baratajuči vu Gosponu koj svedočanstvo je daval reči milošče svoje i daval znamenja i čuda bivati po rukah njihoveh.
- Razdeljila se je pako vnožina varaša i nekoji zadnjič bili jesu z Židovi, nekoji pako z apoštoli.
- Kada pako bi bilo včinjeno navalenje poganinov i Židovov z poglavari svojemi da bi je opšanili ter kamenuvali,
- zeznavši pobegnuli su vu varaše likaonske, v Lištru i Derben, i vu vse naokol države i onde su nazveščali Evangelijum.
- I nekoj človek vu Lištri, slab na nogah, sedel je, plantav od vutrobe matere svoje, koj nigdar ni hodil.
- Ov poslušal je Pavla govorečega. Koj pogledavši njega i videči da bi veru imel da bi zdrav postal,
- rekel je z velikem glasom: „Stani na noge tvoje ravno.“ I skočil je gore i hodil.
- Vnožine pako, kada bi bile videle kaj činil je Pavel, zdignule su glas svoj likaonski govoreče: „Bogi, spodobni včinjeni ljudem, dole stupili su k nam.“
- I zvali su Barbanaša Jupitra, Pavla pako Merkurijuša pokehdob on bil je vođa reči.
- Aldovnik takaj Jupitrov, koj bil je pred varašem, junce i vence pred vrata donešuči, z ljudstvom hotel je alduvati.
- Kaj kad su čuli apoštoli Barnabaš i Pavel, razrezavši svite svoje, skočili su med vnožine kričeči
- i govoreči: „Ljudi, kaj to delate? I mi vmrtelni jesmo, spodobni vam ljudi, nazveščajuči vam da se oveh čalarneh obrnete k Bogu živomu koj načinil je neba i zemlju i morje i vsa koja vu njih jesu,
- koj vu prešesteh pokolenjih puščal je vse poganine hoditi po putih svojeh.
- Ter vendar né pustil prez svedočanstva samoga sebe, dobročineči z neba, dajuči dežđa i vremena plodna, napuneči z jestvinami i veseljem srca naša.“
- I ova govoreči, komaj su vtišili ljudstvo da im ne bi alduvali.
- Nadošli su pako nekoji od Antiokije i Ikonije Židovi i vputivši vnožine i kamenujuči Pavla, zvlekli su ga zvun varaša štimajuči da je vumrl.
- Kad bi pako opstrli bili njega vučeniki, stavši se zašel je vu varaš i drugi dan povdal se je z Barnabašem vu Derben.
- I kad bi bili nazveščali varašu onomu Evangelijum ter njih vnoge podvučili, povrnuli se jesu vu Lištru i Ikoniju i Antiokiju
- potvrđavajuči duše vučenikov i opominajuči da bi opstali vu veri ter da po vnogeh nevoljah potrebno je nam vleznuti vu Kraljestvo Božje.
- I kada bi bili postavili njim po vseh cirkvah redovnike ter bi bili molili z poštenjem, preporučili su nje Gosponu vu kojega su veruvali.
- I prejduči prek Pizidije, došli su vu Pamfiliju
- i govoreči reč Gosponovu vu Pergi, odišli su vu Ataliju
- i odonud odbrodili su vu Antiokiju otkud su bili izručeni milošči Božji na delo koje su ispunili.
- Kad pako bi bili došli i skup spravili Cirkvu, povedali su kuliko bi bil včinil Bog z njimi i da je otprl poganinom vrata vere.
- Zadržavali se pako jesu nekratko vreme z vučeniki.
