Pavel pred aldovniki i celem spravišču poglavara aldovničkog koj zapovedal je njega pljuskati imenuje stenu pobeljenu, ali ispriča se da ni znal da bi on bil poglavar aldovnički i kada bi bil onde povedal da je farizejuš i da se zbog gorestajanja mrtveh sudi, izišla je med farizejuši i saducejanci velika svađa. Gospon po noči Pavla objačuje prenazvesteči da takaj vu Rimu bude od njega svedočil; kad bi se bilo zeznalo vnogeh za skončanje Pavlovo skupprisežje, jezernik pošlje ga vu Cezareju z vojniki opkoljenoga k Feliksu velikovečniku z pisanem na njega listom koj se ovde naprvo donaša.
- Vuprvši pako Pavel oči vu spravišče, reče: „Ljudi bratja, ja sem z vsum dobrum vestjum služil Bogu tja do dneva denešnjega.“
- Poglavar pako aldovnički Ananijaš zapovedal je poleg njega stoječem da ga naj po vustih vudriju.
- Onda Pavel rekel je njemu: „Vudri te Bog, stena pobeljena! I ti sedeči sudiš me poleg Zakona ter proti Zakonu zapovedaš me vudriti?“
- I koji su okolo njega stali, rekli su: „Velikoga aldovnika Božjega kuneš?“
- Rekel je pako Pavel: „Nesem znal, bratja, da je poglavar aldovnički. Ar pisano stoji: ʻPoglavara puka tvojega ne prekuni.ʼ
- Znajuči pako Pavel da jedna stran bi bila saducejancev, a druga farizejušev, iskriknul je vu spravišču. „Ljudi bratja, ja sem farizejuš, sin farizejušev, zbog ufanja i gorestajanja mrtveh ja se sudim.“
- I kada bi bil to rekel, nastala je svađa med farizejuši i saducejanci i razišla se je vnožina.
- Ar saducejuši vele da ni gorestajanja niti angela niti duha, farizejuši pako obodvoja valuju.
- Nastal je pako veliki krič. I stavši se nekoji zmed farizejušev borili su se govoreči: „Nikaj zla ne nahađamo vu človeku ovem, kaj ako je duh govoril z njim ali angel?“
- I kad bi bila velika svađa nastala, boječi se jezernik da se ne bi rastrgal Pavel od njih, zapovedal je vojnikom dole dojti i njega zmed njih van potegnuti i otpeljati vu šatore vojničke.
- Buduču pako noč pristupivši k njemu Gospon reče: „Stalen budi ar kak si svedočil od mene vu Jeruzalemu, tak ti je potrebno vu Rimu svedočiti.“
- Kad je pako dan nastal, skup spravili se jesu nekoji zmed Židovov i zaprisegli govoreči da niti jesti niti piti nečeju doklam ne bi Pavla vmorili.
- Bilo je pako več kak trideset ljudih koji su prisegu ovu včinili,
- koji su išli k poglavarom aldovničkem i starešinam ter rekli: „Mi smo se z prisegum zaprisegli da nikaj nečemo pokušati doklam ne vmorimo Pavla.
- Sada anda vi znano včinete jezerniku i spravišču da ga k vam dopelja kak da bi kaj zvršeneše od njega zezvedeti hoteli. Mi pako prvlje nego se približi pripravni smo skončati njega.“
- Kaj kad bi čul bil sin sestre Pavlove zasede, došel je i vleznul vu šatore vojničke i obznanil je Pavlu.
- Dozvavši pako Pavel k sebi jednoga zmed stotnikov, reče: „Mladenca ovoga zapeljaj k jezerniku ar mu ima nekaj nazvestiti.“
- I on zadnjič vzemši njega vodil je k jezerniku i reče: „Zvezani Pavel prosil je mene da bi mladenca ovoga zapeljal k tebi koj ima tebi nekaj povedati.“
- Prijemši pako jezernik ruku njegovu, odstupil je z njim na stran i pital njega: „Kaj je, kaj mi imaš nazvestiti?“
- On pako rekel je: „Židovi su se dogovorili prositi tebe da na zutrašni dan naprvo staviš Pavla vu spravišče kak da bi kaj stanovitešega iz njega zezvedeti hoteli,
- ti pako ne veruj njim ar mu zaseda zmed njih ljudih više kak četrdeset koji se jesu zaprisegli da ne budu jeli niti pili doklam ne skončaju njega i sada su pripravni čekajuči na obečanje tvoje.“
- Jezernik anda otpustil je mladenca zapovedajuči njemu da ne bi komu povedal da njemu ova obznanil.
- I pozvavši stotnike, rekel je njim: „Pripravete dvesto vojnikov da idu do Cezareje i konjanikov sedemdeset i kopjanikov dvesto od tretje vure noči
- i živinu pripravete da gore posadivši Pavla zdravoga zapeljaju k Feliksu velikovečniku!“
- (Ar se je bojal da ga ne bi pograbili Židovi i vmorili, a on potlam opšanost bi podnašal kak da bi bil peneze prijel.)
- Pisuči lista zadržavajučega ova: „KLAUDIJUŠ Lizijaš najboljšemu oblasniku Feliksu pozdravlenje.
- Človeka ovoga pograbljenoga od Židovov, kojega su vre skončati hoteli, nadojduči z šeregom strgnul sem zezvedivši da je Rimljan.
- Hotejuči zeznati zroka zakaj ga tužiju, zapeljal sem ga vu spravišče njihovo.
- Kojega našel jesem optuženoga zbog pitanjih Zakona njihovoga, nikakove pako krivnje nemajučega koja bi smrti ali železja vredna bila.
- I kad bi mi povedano bilo od zasedov koje su njemu pripravili, poslal sem ga k tebi obznanujuči takaj optužitelom da naj tužbu pri tebi naprvo doneseju. Zdrav budi.“
- Vojniki anda, kak je njim zapovedano bilo, vzemši Pavla, peljali su ga po noči vu Antipatriž.
- Drugi pako dan, otpustivši konjanike da bi z njim išli, povrnuli se jesu vu šatore vojničke.
- Koji kad bi došli bili vu Cezareju i predali lista oblasniku, postavili su pred njega i Pavla.
- Kad bi pako prečtel bil ter pital iz koje države bi bil i zeznavši da je od Cilicije:
- „Posluhnem te“, reče, „kada optužiteli tvoji dojdeju.“ I zapovedal ga je vu Herodešovi sudbenoj hiži čuvati.
