Optužen Pavel pred Feliksom, oblasnikom od Tertuluša, židovskoga blagorečnika, odgovara taječi priložene sebi pregreške valujuči vendar sebe krščenika ter da se zbog gore[sta]janja mrtveh sudi; Feliks i tovarušica njegova Židovkinja poslušaju Pavla od vere krščanske govorečega pokehdob pako ne bi dobil od Pavla penez, ostavil ga je zvezanoga dobivši namesnika Porcijuša Feštuša.
- Za petemi pako dnevi išel je dole poglavar aldovnički Ananijaš z starešinami nekojemi i Tertulušem, nekojem blagorečnikom, koji se pred oblasnika proti Pavlu vstavili jesu.
- I dozvavši Pavla, počel ga je tužiti Tertuluš govoreči: „Pokehdob mi po tebi vu velikem miru živemo ter se vnoga popravljaju po previdnosti tvoji,
- vsigdar i povsud prijemljemo to, najbolši Feliks, z vsum zahvalnostjum.
- Da pako duže tebe ne zadržavam, prosim nakratkom posluhni nas poleg milostivnosti tvoje.
- Našli smo človeka ovoga kužnoga i obuđujučega punte med vsemi Židovi po vsem svetu i početnika punte krivoverstva nazarenskoga
- koj takaj Cirkvu oskruniti skušaval je, kojega i pograbljenoga hoteli jesmo poleg Zakona našega suditi.
- Nadojduči pako jezernik Lizijaš z velikum silum otel ga je iz ruk našeh
- zapovedivši optužitelem njegovem pred te dojti, od kojega budeš mogel sam sudeči vsa ona zezvedeti zbog kojeh ga mi tužimo.“
- Priložili su pako i Židovi govoreči da se ova tak imaju.
- Odgovoril je pako Pavel (kada je njemu oblasnik namegnul da bi govoril): „Pokehdob znam da ti vre vnogo let sudec ovoga naroda jesi, budem z pokojnem srcem za me odgovarjal.
- Ar moreš spoznati da ni več kak dvanajst dnevov kak sem gore išel vu Jeruzalem moliti
- ter niti me vu Cirkvi našli nesu da bi se z kem pregovarjal ali da bi skupstekanje ljudstva načinil niti vu spraviščah
- niti vu varašu niti posvedočiti moreju tebi zbog česa me sada tužiju.
- Valujem tebi pako ovo da poleg vere, koju krivoverstvo imenuju, tak služim Ocu i Bogu mojemu da vsa koja su vu Zakonu i Prorokih pisana verujem,
- ufanje imajuči vu Boga, koje i oni sami čakaju, da bude gorestajanje pravičneh i nepravičneh.
- Vu tom se takaj sam trsim nevraženu vest imeti pred Bogom i pred ljudmi vsigdar.
- Za vnogemi pako letmi došel sem almuštva činiti narodu mojemu i aldove i zagovore.
- Vu kojeh su mene našli očiščenoga vu Cirkvi, ne z vnožinum niti z halabukum.
- Nekoji pako iz Azije Židovi koji bi morali pred tobum ovde biti ter tužiti ako bi kaj proti meni imeli
- ali naj ovi sami poveju ako su kaj našli vu meni nepravičnoga kada stojim pred spraviščem
- kak samo zaradi ove reči koju kričal sem med njimi stoječi da se zbog gorestajanja mrtveh ja sudim denes od vas.“
- Odlučil je pako nje nadalje Feliks, najsegurneše zveđavajuči od Puta, ovoga govoreči: „Kada jezernik Lizijaš dole dojde, posluhnem vas.“
- I zapovedal je stotniku čuvati njega i pri miru pustiti niti nikomu od svojeh braniti njemu postreči.
- Za nekulikemi pako dnevi dojduči Feliks z Druzilum, tovarušicum svojum koja bila je Židovka, pozval je Pavla i poslušal ga je od vere koja je vu Ježuša Krištuša.
- Kad bi se pako on pregovarjal od pravice i čistoče i od Suda budučega, prestrašen Feliks odgovoril je: „Kaj se zasada dostoji, othađaj, ob prigodnem pako vremenu budem te pozval.“
- Skupa takaj ufajuči se da se penezi njemu daju od Pavla zbog česa takaj gustokrat pozivavši njega, razgovarjal se je z njim.
- Kada se pako dva leta spunila jesu, dobil je namesnika Feliks Porcijuša Feštuša. Hotejuči pako milošču iskazati Židovom, Feliks ostavil je Pavla zvezanoga.
