Svetoga Petra apoštola list prvi — Del II.

Položete anda dole vsaku hudobnost i vsaku vkanljivost, skazljivost i nenavidnost i vsako ogovarjanje, Rim 6,4; Efez 4,22,
kakti novorođena deca^* poželjujte to spametno i neskazljivo mleko^* da po njem zrastete k zveličenju
ako li samo neg vre jeste pokušali kak sladek je Gospon.^*
Pristuplujte k njemu,^* k živomu kamenu^* koj od ljudih doisto zavržen, od Boga pako odebran i odičen je postal^*
i vi sami kakti živi kamen žiđite se na njega k duhovnoj hiži, k svetomu redovničtvu da budete alduvali duhovne aldove koji jesu Bogu prijetni po Ježušu Krištušu.^*
Zbog česa^* stoji vu Pismu: „Nut, ja polažem vu Sijonu^* najvekši, izebrani i dragi kamen i koj vu njega veruje, ne bude osramočen.“^*
Vam anda, koji verujete, je on na poštenje^*, onem pako koji ne veruju, je kamen kojega zidari jesu zavrgli i koj je vendar za glavič vugla postal. Mat 21,42; Šolt 117,22; Iz 8,14.
I kamen popiknenja i pečina spačke onem koji se popikavaju vu reči i vu nju ne veruju, na kaj vendar jesu odlučeni.^*
Vi pako jeste izebrano pleme,^* kraljevsko redovništvo,^* sveti narod, pridobljeni puk da nazveščate kreposti onoga koj je vas iz tmice pozval na svoju čudnovitu svetlost^*,
koji predi toga neste bili njegov puk, vezda pako jeste Božji puk, koji predi toga neste stignuli milosrdnost, sada pako jeste stignuli milosrdnost. Oz 2,24; Rim 9,25.
Preljubljeni, prosim vas, kakti stranjske i putnike,^* zdržavajte se od telovneh poželenj koja vojuju suproti duši,^*
sprevađajte med poganini dobro živlenje da oni, koji od vas kakti hudodelnikov zlo govoriju, vidiju vaša dobra dela i dičiju Boga na dan pohađanja.^*
Budite anda podložni vsakomu človečanskom stvorjenju^* za Božju volju,^* budi kralju kakti prezvišenomu,
budi oblasnikom kakti takvem koji od njega jesu poslani na kaštiganje hudodelnikov, a na naplačenje dobreh,
ar ovak je Božja volja da vi po dobročinenju neznanost nespametneh ljudih zanemite^*
kakti takvi koji jesu slobodni, a ne kakti takvi koji se sloboščine za žastor hmanjice zlo vživaju, nego kakti službeniki Božji.^*
Poštujte vse,^* ljubete bratinstvo,^* bojte se Boga, častete kralja!
Vi, slugi, budite gospodarom podložni vu vsem strahu, ne lestor dobrem i krotkem, nego takaj hudem, Kol 3,22; Ef 6,5,
ar ovo je milošča ako gdo iz dušne vesti za Božju volju podnaša suprotivščine i po krivici trpi.
Ar kakva je to dika ako grešite i za vuha pljuskam podnašate? Nego ako dobro činite ter trpljivno podnašate, to je milošča pri Bogu.^*
Ar na to jeste pozvani^* pokehdob je takaj Krištuš za nas trpel i vam ostavil peldu da nasledujete njegve slede:
„On koj nikakvoga greha ni včinil niti se ni znašla vkanljivost vu njegveh vustah“^*, Iza 53, 9,
koj kada se je preklinjal, ni klel, kada je trpel, ne se nagražal, nego se je prepuščal onomu koj je njega krivično opsudil.^*
Koj je naše grehe na svojem telu sam nosil na drevu da bi mi grehom odmrli i pravici živeli, po kojega ranah jeste vi ozdravljeni. Iza 53,4,6,9; Čin ap 8,28. sl.
Ar vi jeste bili kakti bludeče ovce, ali sada se jeste obrnuli k pastiru i biškupu vašeh duš.^*

Objašnjenje

*
V. gore 1,3. 23. ↩︎
*
Čisti navuk koj duha novorođene Božje dece tak goji kak mleko naravsko rođene. ↩︎
*
Poželjujte duhovno mleko kaj se segurno je nadejati ako li neg vi vre jeste spoznali kakov blaženi opravek doprinaša vu našem srcu dobrotivnost božanska, njegov otkuplenja posel. Vu grčkem: poželjujte… pokehdob vre jeste kušali itd. Bog, koj istom je ljubav, dopušča onem koji se njemu zevsema predavaju više puti, navlastito vu molitvi, nuternje veselje čutiti koje je opravek zvrhunaravske milošče. Veselje prebiva vu duhu, ništar manje vendar preteže se takaj, kak vuči sveti Tomaš Akvinaš, takaj na nižeše duše moči. ↩︎
*
Vu veri i ljubavi obilni. ↩︎
*
K vugelnomu koj, kajti je najosebujneša stran duhovnoga stanja Cirkve, je na to odlučen da obodva glavne zide, Židove i poganine, i vse posebne strane med sobum zjedini i zajedno kakti temeljni kamen vtemelji. Obilneše ispelavanje ove misli v. Efez 2,20 sl. On se zove „živi kamen“ kajti od njega vse živlenje ishađa. ↩︎
*
U Čin ap 4,11 sl.; Mat 21,42. ↩︎
*
Vsi verni skupa i vsaki za se naj se kakti živi kamen, to je: i kakti takvi koji imaju božansko ljubavi živlenje od Krištuša, k njemu prizidavaju i na njega nadozidavaju da tak vu živem opčinstvu z njim jednu duhovnu hižu, sveto redovničtvo včiniju koje vsaki dan duhovne aldove pokore, krotenja, molitve i vseh krepostih doprinaša Bogu i potom, kajti se ovi aldovi vu Krištušu, vu njegvem namenenju doprinašaju, postaju Bogu Ocu prijetni. Ovem načinom je vsaki krščenik redovnik ar, veli sveti Leo, kaj je več redovničkoga kak Bogu čisto dušno spoznanje i neoskrunjene aldove prave pobožnosti na oltaru srca doprinašati? Kak jako anda bludiju oni koji iz ovoga nuternjega redovničtva jesu ispeljavali da se nikakvo zvanjsko ne nahađa. ↩︎
*
Kajti se po njem je imalo duhovno stanje podignuti. ↩︎
*
Vu Jeruzalemu, gde je bil Krištuš raspet. ↩︎
*
V. Iz 28,26; Rim 9,33. ↩︎
*
Vi jednoč na Sudu ne budete opšanjeni, nego po njem na poštenje, na odičenje dospeli. ↩︎
*
Na kaj vendar takaj jesu pozvani ar vsi jesu pozvani, odlučeni Boga po Krištušu navčiti se spoznati i ljubiti da se jednoč zveličiju. ↩︎
*
Vi pako jeste takvi koje Bog ne samo je pozval, nego koji ovo zvanje jeste nasleduvali, po čem vi jedna odlučena, izebrana skupčina jeste postali kak jednoč Židovi jesu bili zemeljsko ljudstvo Božje, od ostaleh narodov odlučeni (5Moj 26,17.18). ↩︎
*
Vsaki zmed vas je kralj i redovnik: kralj ar on ima svoja čutenja, pohotnosti, nagnenja vu svojoj oblasti i je pozvan vu Kraljestvo nebesko na gospoduvanje z Krištušem. Zato se negda deci na svetem krstu jesu na glavu polagale korunice, onem pako koji jesu bili bermani, privezač na čelo. Od redovničke krščenikov časti v. gore r. 5. ↩︎
*
Da vi služite na odičenje onoga koj je vas iz bludnosti i hudobnosti ispeljal na istinu i krepost. ↩︎
*
Pokehdob vi neste varaščani ovoga poželjivoga sveta, nego stranjski i putniki na njem, varaščani pako jeste Nebes. ↩︎
*
I žitek duše skančaju ako se ne preobladaju. V. Gal 5,17 sl. ↩︎
*
Da njim vaša dobra dela budeju nagon na obrnenje, da postaneju dan milostivnoga pohađanja božanskoga vu kojem oni Boga dičiju zbog miloščih koje on nad ljudmi opravlja. Na on dan, na koj se oni po vašeh peldah obrneju, budeju oni po takvem obrnenju odičuvali Boga i skupa vas opravičuvali. ↩︎
*
Vsakomu poglavarstvu, vsakoj od Boga postavljeni človečanski oblasti. ↩︎
*
Vu grčkem: za Gosponovu volju. Kajti Gospon Bog hoče imati da se podlažemo onem kojem on na Zemlji je predal oblast. V. Rim 13,1 sl. ↩︎
*
Ar ovak hoče Bog da vi po podlaganju proti vsakomu poglavarstvu zavežete zube oneh nespametneh ljudih koji vu svojoj neznanosti potvarjaju krščenike zbog punte. ↩︎
*
Budite podložni kakti takvi koji doisto od jarma grehov jesu prosti, ali se od njega proste obdržati iščeju. (V. Rim 6,11.14; Jan 8,32), koji se pako svoje sloboščine zlo ne vživaju k tomu da po tom punte i tvrdokornosti hmanjicu olepotiju, nego koji se kakti Božji službeniki iskažuju pokorni proti vsem određenjam, posledno takaj proti poglavarom koje on je postavil. ↩︎
*
Rim 13,7. ↩︎
*
Ljubete se med sobum kakti bratja. ↩︎
*
To je Bogu prijetno, vam pako obilneše milošče dobavlja. ↩︎
*
Na križe i trplivnost. ↩︎
*
Koj niti z činmi niti z vustmi ni zagrešil. ↩︎
*
Vu grčkem: nego to je izručil onomu koj pravično sudi. ↩︎
*
K Krištušu Ježušu. ↩︎