Del XIX.

1. Zvrhu hudobneh pako je nadošla srditost prez milosrdnosti tja do pogublenja ar on je previdel kaj budu naskorom včinili,^*Bog je previdel njihovu tvrdokornost.
2. da se najmre budu kajali poklamkam njim^*Izraelcom. jesu dopustili iziti, dapače z velikem trsenjem nje proč otpravili i da za njimi budeju šetuvali.
3. Ar dok bi jošče bili tuguvali i pri pokopališčih svoje mrtve oplakuvali, jesu došli na drugu noru misel da jesu kakti bežeče preganjali one koje oni vendar med prošnjami jesu odegnali. 2Moj 14,5.
4. Ali na ov konec je nje zapeljala nesreča koju jesu bili zaslužili. Oni se jesu spozabili iz onoga kaj se njim je bilo dogodilo da bi se po daljnešeh mukah nadomestilo kaj njim jošče od njihovoga kaštiganja je menjkalo,
5. da bi tvoj puk čudnoviti prehod^*Čes Črleno morje. dovršil, oni pako novem načinom smrt našli.
6. Ar vse stvorjenje je bilo primerom svoje započetne lastovitosti prestvorjeno^*Prijelo je započetnu lastovitost koju je pred grehom imalo, najmre lastovitost človeku služiti. na ispunjenje tvoje zapovedi da se tvoja deca nevražena opčuvaju.
7. Onda je oblak opsenčil njihova taborišča i gde je predi stala voda, je se iskazala suha zemlja i vu Črlenem morju put prez prečke i vu nezmernoj gljubljini zeleno polje
8. čes koje je prek prešlo vse ljudstvo koje je branila tvoja ruka gledajuč tvoja čuda i znamenja.
9. Oni jesu išli kakti konji na paši i dukali kakti janjci i velikodičili tebe, Gospone, koj nje jesi oslobodil.
10. Ar se oni jošče jesu spominali iz oneh koja se jesu događala dok jošče med njimi jesu bili tuđine, kak je najmre zemlja namesto živine muhe i voda namesto rib vnožinu žab ishitila.
11. Napokonec konca jesu jošče novu ptic felu videli kada jesu od poželenja napeljani za obuzne jestvine prosili. 2Moj 16,13; 4Moj 11,31. Gore 16,2.
12. Ar na zadovolenje njihoveh želj jesu njim od morja doletele prepelice. Zvrhu grešnikov^*Egiptoncov. jesu nadošle kaštige, ne vendar prez naprvoidučeh znamenj koja jesu z silnem treskanjem^*Koja jesu egiptonskem traplenjem naprvo išla. bivala ar oni jesu trpeli kaj je njihova hmanjica po pravici zaslužila
13. ar oni jesu z svojemi prihodniki jošče gorše baratali.^*Nego Sodomitanci koji se ovde Egiptoncom prispodabljaju. Drugi^*Sodomitanci. najmre nesu prijemali nepoznane prihodnike,^*Najmre angele koji jesu njim nepoznani bili. 1Moj 19. oni pako jesu dobre prihodnike^*Drugi: prihodnike koji njim jesu iskazali dobročinstva, po Jožefu egiptonskem dobročinitelu. vu sužanstvo podganjali.
14. I ne samo to: pri oneh^*Sodomitancih. se mora jošče i na to gledati da prihodnike jesu neradi^*Ne kakti prihodnike, nego kakti neprijatele. prijemali,
15. dok ovi^*Egiptonci. jesu one z najkrvoločnešemi mukami trapili koje oni jesu z veseljem prijeli i svojeh pravic puščali vživati se.^*Egiptonci jesu Izraelce pri njihovem došetju z velikem veseljem prijeli, 1Moj 45,18–20, ali naskorom, poklamkam bi se oni kakti mirovni podložniki bili vživali orsačkeh pravic, jesu z njimi baratali kakti z sužnjemi i nje z najtežešem delom tršili.
16. Ali oni jesu bili vudreni z slepotum,^*Z onum trojdnevnum tmicum. kak oni^*Sodomitanci. pred vratmi pravičnoga,^*Lota. z naglum tmicum jesu bili pokriti da je vsaki iskal kud bi pri svojeh vratih nuter išel.^*More se i na Sodomitance i na Egiptonce pretegnuti. 1Moj 19,11.
17. Predstvari jesu bile med sobum pomešane kak pri šoltarnici višeputi zadnjič menja se glasa fela, ali vse svoj glas obdrži. Kak se lehko vidi nad tem kaj se je bilo on isti krat dogodilo
18. pokehdob zemeljska živina je bila premenjena vu vodnu živinu i plavajuča živina je ishađala na zemlju.^*Črede Izraelcov jesu prešle prek Črlenoga morja, žabe jesu vu Egiptušu po suhom vse na jate okolo đipale, dapače vu isteh stanjih.
19. Ogenj je očituval svoju moč jošče bolje vu vodi i voda je se spozabila iz narave koju ima ogenj pogasiti.^*V. gore 16,17.19.
20. Suprotivno, plamen ni požrl meso oneh tak lehko struhljiveh živin, akoprem vu njem jesu okolo hodila,^*V. gore 16, 18. niti ni rastaljil onu dobru jestvinu,^*Drugi: jestvinu nevmrtelneh. akoprem je lehko kakti led za rastaljiti bila.^*V. gore 16, 20. Gospone, ti jesi vu vsem tvojega puka odičil i očastil i nesi njega zametaval nego jesi vsaki čas i na vsakem mestu bil njegov pomočnik.^*Ovak dokanča sveti pisec svoje opominanje na mudrost da svoju bratju na stalnost vu veri svojeh ocov obudi i nje od bolvanomolstva, kojega bedastoču i škodljivost on zevsema očivesto je opisal, na vsaki moguči način zdrži i odvrne.

Objašnjenje

• *
  Bog je previdel njihovu tvrdokornost. ↩︎
• *
  Izraelcom. ↩︎
• *
  Čes Črleno morje. ↩︎
• *
  Prijelo je započetnu lastovitost koju je pred grehom imalo, najmre lastovitost človeku služiti. ↩︎
• *
  Egiptoncov. ↩︎
• *
  Koja jesu egiptonskem traplenjem naprvo išla. ↩︎
• *
  Nego Sodomitanci koji se ovde Egiptoncom prispodabljaju. ↩︎
• *
  Sodomitanci. ↩︎
• *
  Najmre angele koji jesu njim nepoznani bili. 1Moj 19. ↩︎
• *
  Drugi: prihodnike koji njim jesu iskazali dobročinstva, po Jožefu egiptonskem dobročinitelu. ↩︎
• *
  Sodomitancih. ↩︎
• *
  Ne kakti prihodnike, nego kakti neprijatele. ↩︎
• *
  Egiptonci. ↩︎
• *
  Egiptonci jesu Izraelce pri njihovem došetju z velikem veseljem prijeli, 1Moj 45,18–20, ali naskorom, poklamkam bi se oni kakti mirovni podložniki bili vživali orsačkeh pravic, jesu z njimi baratali kakti z sužnjemi i nje z najtežešem delom tršili. ↩︎
• *
  Z onum trojdnevnum tmicum. ↩︎
• *
  Sodomitanci. ↩︎
• *
  Lota. ↩︎
• *
  More se i na Sodomitance i na Egiptonce pretegnuti. ↩︎
• *
  Črede Izraelcov jesu prešle prek Črlenoga morja, žabe jesu vu Egiptušu po suhom vse na jate okolo đipale, dapače vu isteh stanjih. ↩︎
• *
  V. gore 16,17.19. ↩︎
• *
  V. gore 16, 18. ↩︎
• *
  Drugi: jestvinu nevmrtelneh. ↩︎
• *
  V. gore 16, 20. ↩︎
• *
  Ovak dokanča sveti pisec svoje opominanje na mudrost da svoju bratju na stalnost vu veri svojeh ocov obudi i nje od bolvanomolstva, kojega bedastoču i škodljivost on zevsema očivesto je opisal, na vsaki moguči način zdrži i odvrne. ↩︎