Knjiga Prirečjah — Del XXIX.

Zvrhu človeka koj tvrdokorno zameče onoga koj njega pokara nenadejano nadojde pogublenje i njemu se ne bude moglo pomoči.
Kada se pravični povnožavaju, raduje se puk, kada pako hudobni zadobiju poglavarstvo, tuguje ljudstvo.
Človek koj ljubi mudrost razveseljuje svojega oca, koj pako kurve zdržava, bude pogubil svoj imetek. Luk 15,13.
Pravičen kralj podigava orsag, skup pako človek^* njega na nikaj meče.
Človek koj z priliznemi i lažljivemi rečmi k svojemu bližnjemu govori, rasprestira njegvem korakom mrežu.
Hudoben človek kada greši zaplete se vu zanjke, pravičen pako bude (Boga) hvalil ter se veselil.^*
Pravičen zna kak se vbogomu godi,^* hudoben ne zna nikaj od toga.
Hudobni ljudi^* razoruju varaš, mudri pako odvračaju ljutost.^*
Muder človek, ako se z bedakom pravda, ali se srdi ali se smeje, ne bude našel pokoja.^*
Krvoločni ljudi odurjavaju nedužnoga, pravični pako iščeju njegvo živlenje (opčuvati).
Bedak vsega svojega duha naprvo donaša, muder odvlači i njega za budučnost zdržava.^*
Poglavar koj rad posluša lažljive reči bude samo hudobne službenike imal.^*
Siromak i verovnik^* jesu se zestali: obodveh rasvetlitel je Gospon. Gore 22,2.
Kralj koj vboge po istini sudi, njegva stolica bude naveke potvrđena.
Šiba i strahuvanje podeljuje mudrost, dete pako kojemu se po njegvoj volji pušča osramočuje svoju mater.
Gde je vnogo hudobneh, tam je vnogo zločinstvih i pravični budu videli njihovo pogublenje.
Podvučaj svojega sina i on bude tebe obraduval i tvoju dušu razveselil.
Kada proročanstvo prestane, bude se puk raspršal,^* koj pako obdržava zakon, bude blažen.
Sluga ne more se po rečih poboljšati ako on razme kaj ti veliš, pak iz zametavanja neče odgovoriti.^*
Jesi li videl človeka na govorenje nagloga? Od njega nadejaj se predi bedastoče nego poboljšanja!^*
Koj svojega slugu od mladosti prokšeno goji, bude potlam njega tvrdoglavoga čutil.^*
Človek srditosti podvržen obuđuje svađe i koj se lehko daje razdražiti, bude z tem bolje na grešenje nagnjen.
Za gizdostjum sledi poniženje, koj pako je poniznoga duha, bude diku zadobil. Job 22,29.
Koj z tatom ortači, odurjava svoju dušu; spodobno koj se poziva na prisegu, pak neče odati (tatbine).^*
Koj se boji človeka, bude hitro opal, koj se ufa vu Gospona, bude se izvisil.
Vnogi iščeju lice poglavara,^* ali od Gospona ishađa sud zvrhu vsakoga.^*
Pravični odurjavaju hudobnoga človeka, a hudobni mrziju na one koji na pravem putu jesu.^* Sin koji obrdžava reči ne bude pogubljen.

Objašnjenje

*
Koj na sudu mite prijemlje. ↩︎
*
Zbog svoje sloboščine i blaženosti. ↩︎
*
Najvekše dobročinstvo koje se more vbogomu iskazati stoji vu tom ako se gdo za njegvu pravičnu stvar zavzimlje i njega proti tvrdoga srca optršitelom trsi se braniti, kaj on sam po sebi ni moguč včiniti; ovo bude njemu več hasnelo nego ono malo almuštva koje njemu tvrda ruka skupca podeljuje, ali hudobni od toga nikaj ne zna. ↩︎
*
Vu Žid. vere osmehavec, i tako imenuje se vsaki on koj pobožne ljudi kakti nevučene i praznoverne bedake zameče i ves kaj na službu Božju spada na osmeh postavlja. Ovakvi k porušenju orsaga više doprinašaju nego najsiloviteši krvolok. Ovi od 70 tolnačitelov imenuju se pogibelni ljudi, ljudi prez zakona, ljudi koji se niti Boga niti ljudih ne bojiju. ↩︎
*
To je: volju k zmutnjam nagnjenu. ↩︎
*
Z bedakom ne bude na sudu nikaj dokončal, je li on z njim z dobra ali iz zla bude govoril. ↩︎
*
Bedak pove vse kaj zna, muder pako dobro razmišljeno mučanje obdržava. ↩︎
*
Rominuš veli: „Bolje je služiti sumljivomu nego lehkovernomu poglavaru. Poglavara koj vuhobajavce, ili prišeptljivce, rad posluša, budu vsi pravedni službeniki ostavili.“ ↩︎
*
Jedni: optršitel, drugi: bogatuš, a pak drugi: siromak i bogatuš jesu med sobum skupa, obodveh oči rasvečuje Gospon. Ovdje je hotel Šalomon reči ono kaj se čteje pri Mat 5,45. Bog pušča svoje sunce ishađati zvrhu dobreh i zleh. Ali: on čini da obodva jesu z svojum srečum zadovoljni. ↩︎
*
Ako vera prepada i njejini navuki zamečeju se, postaje ljudstvo razvuzdano i odeljuje se na razlučne nasledbe. Drugi pretežeju ove reči na vezdašnje Židovov raspršenje koje se je dogodilo poklamkam glas božanskoga navuka med njimi je zamuknul. ↩︎
*
Takov je tvrdoglav i mora se po oštroči poboljšati. Drugi: … kaj ti veliš, pak si neče k srcu vzeti. ↩︎
*
Vu Žid. više nadejaj se od bedaka nego od njega. ↩︎
*
Drugi: Ako gdo svojega slugu od mladosti sprokši, zadnjič hoče istom kakti sin biti. ↩︎
*
Vu Žid. koj čuje prisegu. Pri Židovih je bila navada na ime Božje zaprisigati da se istina bude govorila i istom poslušanje ovakvoga zaprisiganja je se jemalo za najvekšu prisegu. V. 3Moj 5,1. Po tom je bil zavezan na valuvanje istine. Kriva prisega je najstrahoviteši greh kojega Bog nigdar prez kaštige ne pušča zato veli Šalomon: „Koj nju včini, je neprijatel svojega živlenja kajti njega Božanska srditost ne mine.“ ↩︎
*
Vnogi iščeju pred poglavara dojti. ↩︎
*
Oni iščeju pravicu dobiti i to se nikomu ne more za zlo prijeti ako neg pravem redom biva. Ako človek svoju pravdu Bogu izruči, on more srca prigibati kak hoče. ↩︎
*
Tomu je zrok razlučni mišlenja način ar kaj krivičen ljubi, to pravičen ne more ljubiti i kaj ov ljubi, to on odurjava. Medtemtoga ovde je govorenje samo od činov, a ne od osobe, zato se veli: „Amicus personae, inimicus causae.“ ↩︎