Knjiga Prirečjah — Del XXX.

To su reči onoga koj skup zbira i je sin onoga koj od sebe daje.^*Prorokuvanje koje je govoril človek z kojem je Bog i koj od Boga z njim prebivajučega objačen veli:^*

„Ja jesem najnevučeneši med ljudmi^* i mudost človečanska neje pri meni.
Ja se mudrosti nesem vučil i ne znam^* sveteh znanje.^*
Gdo je zastupil vu Nebesa i dole stupil?^* Gdo je vetra vu svojeh rukah obdržal?^* Gdo je vode kakti vu opravu skup zvezal?^* Gdo je vse međe Zemlji postavil? Kak je njemu ime^* i kak je ime njegvoga sina,^* je li to znaš?
Vsako govorenje Boga je ognjeno,^* ščit onem koji se vu njega ufaju.“ Šolt 11,7.
„Njegvem rečjam nikaj ne pridavaj da ne budeš kaštigan i da za lašca ne budeš znajđen.“ 5Moj 4,2; 12,32.
Ja dvoje jesem prosil tebe, nje ne skrati meni predi nego vumrem.
Himbenost i lažljivo govorenje dalko odvrni od mene, ne daj mi siromaštva niti bogatstva, podelji meni lestor k mojemu zdržavanju potrebna,
da ja morebiti presit ne budem zapeljan da bi zatajil tebe i rekel: ‚Gdo je Gospon?ʻ, ali da mene siromaštvo ne prisili na krađu ali na krivo prisiganje vu imenu mojega Boga.
Ne tuži (prez potreboče) slugu pri njegvem gosponu, da morebiti tebe ne preklinja i da ne opadneš.^*
Je pokolenje^* koje svojega oca kune i svoju mater ne blagoslavlja,
pokolenje koje se samo sebi vidi čisto ter vendar neje oprano od svojeh gnjusobah,
pokolenje koje oči visoko nosi i svoje trepavice na višak drži,
pokolenje koje mesto zubov ima meče i z svojemi kutnemi zubmi žvači da vboge na zemlji i siromake zmed ljudih požere.
Pijavka ima dve kčere koje veliju: ‚Donesi, donesi!ʻ^*Troja jesu nezasitna, a četrto nigdar ne veli: ‚Dosta je.ʻ

Pekel, zaprta vutroba i zemlja koja se ne zasičuje z vodum i ogenj koj nigdar ne veli: ‚Dosta je!ʻ^*
Oko koje svojega oca osmehava i porod svoje matere zametava naj potočni karvani iskljuvaju i mladi orli požreju.
Troja jesu meni teška (za preseči), a četrto je meni zevsema neznano:
orla put na nebu,^* kače put na pečini,^* lađe put na sredini morja^* i človeka put vu mladosti.^*
Takov put je lotrne žene, koja jé i kada si je obrisala vusta, veli: „Nesem nikaj zla včinila!“^*
Po trojem se zgiblje zemlja, a četrto ne more podnesti:
po slugi kada kralj postane,^* po bedaku kada se zasiti z jelom,^*
po odurnoj ženi kada bude v zakon vzeta^* i po službenici kada svoje gospe postane odvetek.^*
Četvera jesu najmenjša na zemlji ter vendar jesu mudreša od mudreh:^*
mravlja, slabi puk koj sebi ob žetvi spravlja hranu;^*
zajček, nemočen puk koj sebi svoj stan na pečini napravlja;^*
kobilice koje nemaju kralja ter vendar skupa na jate van ishađaju;^*
guščeri koji se z svojemi rukami trudiju i vu kraljevskeh hižah prebivaju.^*
Troja jesu koja dobro hodiju, a četrto srečno ide:
oroslan, med vsemi zverinami najjakši, ne plaši se nikoga z kem se goder zestaje;
pevec z košatemi boki^* i oven i kralj kojemu se nigdo ne suprotstavlja.^*
Ako se bedak izvisi, vidi se da je bedak ar da bi bil razmel, bi na svoja vusta bil položil ruku.^*
Koj pako cecke jako stišče da bi izmuzil mleko, van istišče maslo i koj se oštro vsekuje, van istišče krv i koj na srditost draži, obuđuje svađe.^*“

Objašnjenje

*
Prav: reči (navuki) Agura, sina Jakeovoga. Ovde stojiju reči: „Agur“ i „Jake“ pretolnačene. Primerom nekojeh tolnačitelov je Agur skup zestavil ov del, primerom drugeh pod Agurom razmeva se Šalomon, koj je bil Davidov sin, koj od sebe je daval božansku mudrost. ↩︎
*
Drugi tolnačiju ovak: „To su reči Agura sina Jakeovoga, navuki i govorenja človeka Lejitijela i Ukala“ (to je: človeka koj ima pri sebi Boga, tak je: koj ima pri sebi Boga i ravno zato je moguč govoriti). Drugi drugač. ↩︎
*
Gledeč na ona kaj ja sam ob sebi znam, koj prez Boga jesem samo tmica i neznanost. ↩︎
*
Iz samoga sebe. ↩︎
*
To isto bi moral vsaki sveta mudroznanec valuvati pokehdob človečanski razum sam ob sebi niti more preseči skrovnost božanskoga bitja niti vu kakvem odnošenju stoji ov svet z ovem bitjem. ↩︎
*
Sada Agur daje zrok zakaj človek, sam sebi prepuščen, nema mudosti kajti nijeden človek ne more vu Nebesa zastupiti i odonud znanje nebeskeh stvarih dole na Zemlju donesti. ↩︎
*
Sam sebi prepuščen človek ne zna narave skrovnosti kajti on z njimi ne more zapovedati, jedino on ima spoznanje narave koj nju je stvoril i koj z njum zapoveda: Bog. ↩︎
*
To je: med oblake, med kraje morja i potokov je zavjel. ↩︎
*
Kakvo je njegvo bitje? ↩︎
*
Mudrosti, koja od veka je bila pri njem (gore 8,22). Prisp. Sud 13,18. ↩︎
*
Po ognju skušano, čisto, po vse istinito. Šolt 17,32. ↩︎
*
Vu Žid. da ti morebiti ne ostaneš krivec (ako li se sluga zbog potvorjene pregreške opraviči). ↩︎
*
Vezda se četverovrsti nečemurneh naprvo stavljaju: nezahvalni, skazljivi, gizdavi i krvoločni. ↩︎
*
Pijavka je nezasitna, ona ima dve kčere, najmre ove dve reči: „Donesi, donesi!“ Njoj se prispodabljaju četvera sledeča. Drugi: Aluka ima dve kčere itd. Po Aluki razmeva se stanovita zver od koje na Istoku pripoveda se da na svojeh prsih nosi dve kčere koje po svojoj nezasitnosti načinjaju takaj svoju mater nezasitnu. Z tem se prispodabljaju sledeča. ↩︎
*
Ovde se po peklu ne razmeva mesto prokleteh, nego pokopališča vu koja se nigdar dosta mrtveh ne polaže. Neplodna žena je nezasitna, koja se zmir ufa da bude zanosila. Zemlja koja, akoprem vnogo dežđa opade, vsu vodu požere. Ogenj pako, ako se na njega jošče tuliko drv deva, vendar vse požge. ↩︎
*
Ar se za njim skup sklaplja zrak i tak nikakov trag za sobum ne ostavlja. ↩︎
*
Ar skupsfrkana duče i tak neje najti njejinega traga. ↩︎
*
Ar se za njum slapi ipak skup shađaju i ni poznati traga. ↩︎
*
Vu Žid. i k devici put človeka na kojem se nikakovo znamenje pogubljenoga devojačtva ne opažuje. ↩︎
*
Kajti muž nikakovo segurno znamenje nad njum ne opažuje da se je njemu zneverila i zato se drži za nedužnu. ↩︎
*
Kajti postane oholen, optršuje ljudstvo i postaje krvoločen iz straha da ne zgubi gospoduvanje. ↩︎
*
Kajti postane prevzeten i drugem postaje nepodnesljiv. ↩︎
*
Kajti takva svađe i nemir obuđuje. Vu Žid. po pretiranoj ženi ako se nazad vu tovaruštvo prime. Od svojega muža zapuščena ali zanemarjena žena (5Moj 22,15–17) goji za čas svojega zavrženja jal i nazlob proti onoj koju njoj njejin muž pretpostavlja. Ako se pako nazad vu milošču prijemlje, onda vsu svoju fantljivost daje svojega muža priložnici počutiti i tak vsu hižu vu nered i nemir postavlja. ↩︎
*
Kajti ovakva navadno postane oholna. Vu Žid. službenica koja svoju gospu je pregnala. ↩︎
*
Sledeča živina je iz svojega naravskoga nagiba mudreša od vseh mudreh koji sebi mudrost iz samoga sebi prepuščenoga razuma pribavljaju (gore red 3,4) ar ova živina ima svoju mudrost od Boga i svoju vmetelnost zvršava z vekšum segurnostjum i stalnostjum nego človek ono kaj se z velikem trudom je navčil. ↩︎
*
Vid. gore 6, 7, 8. ↩︎
*
Stanovita fela zajčekov koji se na jate skupa drže i za svoju segurnost prebivaju vu duplih pečin. ↩︎
*
Kobilice, navadna neprilika na Istoku, one se podižeju redno kakti šereg i kam se dole spustiju, vse pod nikaj mečeju ar su zevsema požeruhne. ↩︎
*
Stanovita fela čemerneh guščerov koji se vu hižah zadržavaju i vu ista kraljevska stanja dohađaju. Drugi: pavuk kojega noge imenuju se ruke kajti z njimi kakti rukami tke pavučinu i vu njoj muhe lovi. ↩︎
*
Drugi: popružen bojni konj. Drugi: hrt z dobremi boki, i pak drugi: divji osel „zebra“ zvani, z pasastemi ili brezastemi boki. ↩︎
*
Agur prispodablja hod kralja k stupanju troje živine, prez dvojmbe njemu na podvučenje da dober kralj mora sebi vu opčinskom ove živine dobre lastovitosti ili sposobnosti pribaviti, najmre: đeđernost oroslana, skoznjivost pevca i primerom ovna mora svojoj čredi naprvo iti i njoj pravoga puta kazati. ↩︎
*
Ne bi se bil postavil na mesto za koje nema sposobnosti. Vu Žid. Ako si bil bedast vu prevzetnosti i namislil zlo činiti, tak postavi ruku na svoja vusta (ne spričavaj se i naj hoteti prav imati). ↩︎
*
Vkroti svoju srditost da, ako se morebiti nameriš na nagloga, svađa ne postane vekša. ↩︎