- Šoltar Asafov
LXXII.
Kak dober je Bog Izraela onem koji su srca pravednoga.
- Noge pako moje bi bile skorom spodletele, skoro su koračaji moji spodrknuli.
- Kajti sem nenaviden bil proti krivičnem, videči pokoj grešnikov.
- Ar je nikaj ne spomenuje na smrt njihovu i traplenja njihova ne trpe dugo.
- Ne trudiju se i ne delaju kak drugi ljudi i ne budu se z drugemi ljudmi kaštigali
- zato je nje gizdost prevzela, pokriti su z krivicum i nepobožnostjum svojum.
- *Žid. r. 7. Oči njihove stupile su van pred debeločum ter su več dobili nego su mislili. Izišla je kakti iz tušče krivica njihova, povdali su se željam srca njihovoga.
- Zmišljavali su i govorili hudobnost, krivice su očivesto govorili.
- Vzdignuli su vusta svoja zvrhu nebes i jezik njihov nikomu ni otprostil.
- Zato se bude ljudstvo moje sim obrnulo ter bude pri njih vsega obilno našlo.
- I rekli su: „Kak zna Bog i je li zna Višnji vsa?“
- Nut sami grešniki i koji vu obilnosti živeju, skup spravili su bogatstvo.
- Zato sem rekel: „Anda sem zahman opravičil srce moje i ruke moje z nedužnemi vmival?“
- Ter vendar bil sem bičuvan celi den, z jutrom (začimlje se) pokorenje moje.
- Ali sem rekel:„Ako tak govoril budem, nut roda sinov tvojeh pogubil sem.“
- Ja sem sam pri sebi mislil kak bi ja to zezvedel, ali to je bilo meni preteško.
- Dok nesem vleznul v svetotajstvo Božje i njihov (grešnikov) konec spoznal.
18.*Žid. zaisto.Ali zaradi prevare nastavil si im zanjke, kada su se vzdignuli, hitil si je dole.
- Kak brzo su zatreni, najedenkrat su nestali, poginuli su zaradi krivičnosti svoje.
- Kak senje, kada se gdo prebudi, zgineju, tak budeš ti, Gospone, njihovu namišljenu sreču na nikaj spravil.
- Srce pako moje je se vu meni vužgalo i bubreki moji jesu nepokojni postali
- i na nikaj spravljen sem ter nesem znal.
- Postal sem pred tobum kakti nemo živinče vendar sem se tebe vsigdar držal.
- Ti si mene za moju desnu ruku držal i po tvojoj volji vodil i prijel si me z dikum.
- Kaj imam v Nebesih (prez tebe) i kaj sem hotel od tebe na Zemlji (kak tebe)?
- Telo moje i srce moje jesu ginula, ti, Bože, jesi Bog srca mojega i del moj naveke.
- Ar nut! Koji se odalečuju, budu poginuli, pogubil si vse koji se tebi zneverili jesu.
- Za me pako je dobro da se Boga držim i vu Gospona Boga ufanje moje postavljam.
Da vsa dela tvoja med vratmi kčere sionske nazveščam.
