Peter pregovarjajučem bratom da k poganinom [bi] išel zrok ovoga poveda; kada bi se vnogi vu Antiokije po nazveščenju vučenikov obrnuli bili, pošilja se k njim Barnabaš od cirkve jeruzalemske koj, poklamkak bi bil vnoge obrnul, dopeljal je tam i Šavla iz Tarzuša z kojem pošilja se vu Jeruzalem da zbog glada od Agaba proroka prenazveščenoga almuštvo bratom doneseju.
- Čuli su pako apoštoli i bratja koji bili su vu Judeji da i poganini prijeli jesu reč Božju.
- Kada bi bil pako gore došel Peter vu Jeruzalem, pregovarjali se jesu z njim koji bili jesu iz obrezavanja
- govoreči: „Zakaj si zašel k ljudem obrezavanje neimajučem i jel z njimi?“
- Počemši pako Peter razlagal je njim po redu govoreči:
- „Ja bil sem vu varašu Jope moleči i videl sem vu zameknenju viđenje: dole iduču posudu nekakovu, kakti vilahen velik za četiri skrice spuščen z neba i došel je tja do mene.
- Vu kojega gledajuči premišljaval sem i videl četveronogate živine zemeljske i zverine i lazeče i leteče nebeske.
- Čul sem pako takaj glasa meni govorečega: ʻStani se Peter, zakoli i jeđ!ʼ
- Rekel sem pako: ʻNikak ne, Gospone, ar nikaj opčinskoga ali nečistoga nigdar ni vleznulo vu vusta moja.ʼ
- Odgovoril je pako glas po drugoč iz neba: ʻKoja Bog očistil je, to ti opčinsko ne reči!ʼ
- To pako včinjeno je trikrat i gore potegnjena jesu opet vsa vu nebo.
- I, nut, tri ljudi sproti postali jesu pred hižum vu kojoj bil sem, poslani iz Cezareje k meni.
- Rekel je pako Duh meni da bi išel z njimi nikaj ne dvoječi. Išli su pako z menum i oveh šest bratov i vleznuli jesmo vu hižu človeka.
- Povedal je pako nam kak bi bil videl angela vu hiži svojoj stoječega i rekučega njemu: ʻPošlji vu Jope i pozovi Šimuna koj se zove Peter,
- koj ti povedal bude reči vu kojeh se zveličiš ti i vsa hiža tvoja.ʼ
- Kada bi bil pako počel govoriti, opal je Duh Sveti na nje kak i na nas vu početku.
- Spomenul sem se pako iz reči Gosponove kak je rekel: ʻIvan zadnjič krstil je z vodum, vi pako budete krščeni vu Duhu Svetem.ʼ
- Ako anda onu istu milošču dal je njim Bog kak i nam koji verujemo vu Gospona Ježuša Krištuša, ja gdo sem bil koj bi mogel braniti Bogu?“
- Ova čuvši zamuknuli jesu i dičili su Boga govoreči: „Anda i poganinom pokoru dal je Bog na žitek.“
- A oni zadnjič koji se raspršali bili jesu zbog traplenja koje bilo je nastalo pod Štefanom, okolo hodili jesu tja do Fenicije i Cipra i Antiokije nikomu govoreči reči, nego samem Židovom.
- Bili jesu pako nekoji zmed njih ljudi Ciprijanci i Cirenejanci, koji, kad bi bili zašli vu Antiokiju, govorili su takaj grkom nazveščajuči Gospona Ježuša.
- I ruka Gosponova je bila z njimi i veliki broj oneh koji su veruvali je se k Gosponu obrnul.
- Došel je pako glas zvrhu oveh k vuham Cirkve koja je bila vu Jeruzalemu i poslali su Barnabaša tja do Antiokije.
- Koj kad bi bil tam došel i videl milošču Božju, raduval je se i opominal vse da oni vu naprvovzetju srca stalni opstaneju vu Gosponu
- ar je bil dober človek, pun Svetoga Duha i vere. I bila je Gosponu velika vnožina priložena.
- Barnabaš pako povdal se je na put vu Tarzuš da poišče Šavla kojega, kad bi bil našel, dopeljal ga je v Antiokiju.
- I oni se jesu onde celo leto vu Cirkveni skupčini zadržali i navučali vnožinu veliku tak da se vučeniki vu Antiokije prvič jesu zvali krščeniki.
- Vu oveh pako dnevih došli su proroki od Jeruzalema dole vu Antiokiju
- i stavši se jeden zmed njih po imenu Agabus, obznanil je po Duhu da veliki glad nastal bude po celem svetu, koj se pripetil je pod Klaudijušem.
- Vučeniki pako dokončali jesu da bi vsaki poleg mogučnosti svoje na zdržavanje kaj poslal stanujučem vu Judeji bratom,
- kaj i včinili jesu poslavši na starešine po rukah Barnabaša i Šavla.
