Pavel pred Agripum pravdu svoju brani povedajuči svoje k Krištušu obrnenje po redu ter pokažuči da on Židovom i poganinom pod obrambum božanskum je prodekuval i Feštušu, koj rekel je da od prevelike znanosti nori, odgovarja i želi da bi vsi postali krščeniki; Agripa veli da bi se mogel spustiti da se ne bi bil na cesara pozval.
- Agripa pako reče Pavlu: „Dopuščeno je tebi da sam za se govoriš.“ Onda Pavel stegnuvši ruku počel se je zagovarjati.
- „Zvrhu vseh zbog kojeh se tužim od Židovov, kralj Agripa, držim se za blaženoga da se pred tobum denes branil budem.
- Najbolje zato pokehdob znaš vsa i koje su pri Židovih navade i ispitivanja, zbog česa prosim, trplivno me posluhni.
- I zadnjič, živlenje moje od mladosti koje se[m] od početka med narodom mojem sprevodil vu Jeruzalemu znano je vsem Židovom.
- Poznajuči mene vre predi od početka (ako hočeju svedočanstvo dati) da sem poleg najsegurneše nasledbe vere naše živel kakti farizejuš.
- I sada zaradi ufanja obečanja koje ocem našem včinjeno je od Boga stojim sudu podvržen
- k kojemu dvanajst pokolenj našeh, noč i dan služečeh, ufaju se dojti. Zbog ovoga ufanja tužim se, o, kralj, od Židovov.
- Kaj, je li se neveruvljivo sudi pri vas ako Bog mrtve zbuđava?
- I ja zadnjič bil sem štimal da ja proti imenu Ježuša Nazarenskoga vnoga suprotivna činiti moram.
- Kaj i činil jesem vu Jeruzalemu i vnoge zmed sveteh jesem ja vu vuzu zaprl pokehdob sem od poglavarov aldovničkeh oblast prijel i kada bi se vmorili, donesel sem dopitanje.
- I po vseh spraviščah gustokrat kaštigujuči nje, priganjal sem je blazniti i jošče više stokujuči proti njim, preganjal sem je tja vu stranjske varaše.
- Z kojeh kada bi išel vu Damaškus z oblastjum i dopuščenjem poglavarov aldovničkeh,
- od poldnevu na putu videl sem, o, kralj, da me je z neba od svetlosti Sunca vekša svetlost opsijala i one koji bili su z menum
- i mi vsi kada bi bili na zemlju opali, čul sem glasa govorečega meni v židovskem jeziku: ʻŠavel, Šavel, zakaj me preganjaš? Teško je tebi proti podbadi brcati se.ʼ
- Ja pako rekel jesem: ʻGdo si Gospone?ʼ Gospon pako rekel je: ʻJa sem Ježuš kojega ti preganjaš.
- Nego stani se i stupi na noge tvoje ar zato sem se tebi iskazal da te postavim službenika i svedoka oneh koja si videl i oneh z kojemi se iskažem tebi
- otevši te od ljudstva i narodov med koje te je sada pošiljam.
- Otpri oči njihove da se obrneju od tmice k svetlosti i iz oblasti Šatanove k Bogu da dobe otpuščenje grehov i odvečinu med sveci po veri koja je vu meni.ʼ
- Zato, o, Agripa kralj, nesem bil neveren nebeskomu viđenju.
- Nego onem koji jesu vu Damašku prvič i vu Jeruzalemu i po vsoj državi Judeje i poganinom nazveščal jesem da bi pokoru delali i obrnuli se k Bogu vredna pokore dela čineči.
- Iz ovoga zroka jesu mene Židovi, kada sem vu Cirkvi pograbljenoga, skušavali su vmoriti.
- Z pomočjum pako Božjum objačen tja do dneva denešnjega stojim svedočeči manjšemu i vekšemu, nikaj zvun toga negovoreči, kak ona koja su proroki i Mojžeš govorili da se budu dogodila.
- Ako je Krištuš trpeti mogel, ako je prvi iz gorestajanja mrtveh da bude nazveščal ljudstvu i poganinom.“
- Kada bi ova govoril on ter zagovarjal, Feštuš z velikem glasom rekel je: „Noriš, Pavel, velika vučenost je tebe pameti mentuvala“
- A Pavel: „Ne norim“ (veli) „najbolši Feštuš, nego istinitosti i treznosti reči govorim
- ar zna od oveh kralj pred kojem takaj stanovito govorim ar da bi njemu zmed oveh kaj skritoga bilo, ne verujem. Ar nikaj ni od oveh po kuteh včinjeno.
- Je li veruješ, kralj Agripa, prorokom? Ja znam da veruješ.“
- Agripa pako Pavlu: „Zamalo da me ne nagovoriš krščenikom postati.“
- A Pavel: „Želim od Boga i vu malem i vu vnogem da bi ne lestor ti, nego takaj vsi koji poslušaju, danas postali takovi kakov i ja jesem, zvun železja ovoga.“
- I gore stal se je kralj i predsednik i Bernice i koji su z njimi sedeli.
- I kada bi bili odišli, spominali se jesu med sobum govoreči da človek ov nikaj smrti ali vuze vrednoga ni včinil.
- Agripa pako Feštušu rekel je: „Človek ov bi se otpustiti mogel da se ne bi bil pozval na cesara.“
