Čudnovito Šavla pregonitela preobrnenje poklamkak mu se je Gospon iskazal i Ananijaša k njemu poslal od kojega okrščen počel je vu Damaškusu najoštreše braniti da Ježuš je krištuš, vučeniki pako spustiju ga po zidu zbog zasedov židovskeh, kojega Bar[n]abaš vu Jeruzalemu vodi k apoštolom, otkud opet zbog zasedov ispušče se vu Taržu; Peter vu Lidije ozdravlja Enejaša gubavca, a vu Jope Tabitu oživljuje.
- Šavel pako, kad bi se jošče z grozenjem i vmarjanjem nad Gosponovemi vučeniki hrustil, zašel je k poglavaru aldovničkomu. Gal 1,13.
- I prosil ga je za liste vu Damašk na spravišča da bi on, ako bi koje ovoga navuka muže ali žene našel, nje zvezane vu Jeruzalem zapeljal.
- I kad bi putuval, dogodilo se je da se je približaval Damaškuša i opstrla je na njega naglom svetlost iz neba.
- I opal je na zemlju i čul glas koj mu je rekel: „Šavel, Šavel, zakaj me preganjaš?“
- On reče: „Gdo si, Gospone?“ A on (odgovori): „Ja sem Ježuš kojega ti preganjaš. Teško se je tebi proti podbodu braniti.“
- On drhtajuč i presenečen reče: „Gospone, kaj hočeš da včinim?“
- I Gospon reče njemu: „Stani se ter hodi vu varaš i onde se pove tebi kaj imaš činiti.“ Ljudi pako oni koji su z njim putuvali stali su osupnjeni ar su doisto čuli glas, nikoga pako nesu videli. “ Zdol 22,9; 26,14.
- Stal se je pako Šavel iz zemlje i kad bi oči bil otprl, ni nikaj videl. Popali su ga pako za ruku i otpeljali ga vu Damaškus.
- I bil je onde tri dni da nikaj ni videl i ni jel niti pil.
- Bil je pako vu Damaškusu nekoj vučenik imenom Ananijaš i reče njemu vu viđenju Gospon: „Ananijaš!“ A on reče: „Nut, ovo sem, Gospone!“
- I Gospon reče njemu: „Stani se i hodi vu vulicu koja se zove Ravna i opitaj se vu Judaševi hiži za nekojega po imenu Šavla Tarzeuskoga ar, nut, on moli.“
- (I videl je Šavel nekojega človeka po imenu Ananijaša k sebi nuter iti i ruke na se postavljati da bi vid nazad dobil.)
- Odgovori pako Ananijaš: „Gospone, ja sem od vnogeh čul od ovoga človeka, kuliko zla je on tvojem svetem vu Jeruzalemu včinil.
- I ovde ima od poglavarov aldovničkeh oblast povezati vse koji zazavaju tvoje ime“.
- Gospon pako reče njemu: „Hodi, ar ov je ovem izebrana posuda da nosi moje ime pred poganini i kralji i sini izraelskemi
- ar ja njemu pokažem kulika bude moral on za ime moje trpeti.“
- I odide Ananijaš i dojde nuter vu hižu i položi na njega ruke i reče: „Šavel, brate, Gospon Ježuš, koj se je tebi skazal na putu kojem si došel, je mene poslal da pregledaš i napuniš se z Duhom Svetem.“
- I sproti opale jesu iz njegoveh očih kakti luske i on je pregledal i stal se je gore i bil je okrščen.
- I kad bi on bil založil, okrepil se je. Ostal je pako pri vučenikih koji su bili vu Damašku nekuliko danov.
- I mahom je vu spraviščah nazveščal Ježuša da je on Sin Božji.
- Presenetili su se pako vsi koji su čuli i govorili su: „Ne li ovo on koj je v Jeruzalemu preganjal one koji su zazivali ovo ime i sim je zbog toga došel da bi nje zvezane peljal k poglavarom aldovničkem?“
- Šavel pako je se zmir bolje objačuval i osramočuval Židove koji su stanuvali vu Damaškušu pokehdob je potvrđaval da je ov krištuš.
- Kad bi se pako spunilo vnogo dnevov, tolnač držali jesu med sobum Židovi da bi njega vmorili.
- Znani pako včinjeni jesu Šavlu zasedi njihovi. Stražili su pako takaj na vratah den i noč da bi njega vmorili.
- Vzemši pako njega vučeniki v noči, prek zida deli su njega spusteči vu košari.
- Kad bi pako došel bil vu Jeruzalem, skušaval se je pridružiti vučenikom i vsi su se ga bojali neverujuči da bi bil vučenik.
- Barnabaš pako poprijemši njega peljal je k apoštolom i povedal je njim kak na putu bi bil videl Gospona i da z njim je govoril i kak vu Damašku srčeno je baratal vu imenu Ježuševem.
- I bil je z njimi vnuter i van iduči vu Jeruzalemu i srčeno baratajuči vu imenu Gosponovem.
- Govoril je takaj poganinom i pregovarjal se je z grki, oni pako iskali su vmoriti njega.
- Kaj kad bi bili zezvedeli brati, otpeljali su ga v Cezareju i poslali vu Tarzuš.
- Cirkva zadnjič po celoj Judeji, Galileji i Samariji imela je mir i napreduvala hodeča vu strahu Gosponovem i z obatrivenjem Duha Svetoga napunjavala se je.
- Dogodilo se je pako da bi Peter, kad je vse obišel, došel je k svecem koji su stanuvali vu Lidu.
- Našel je pako onde človeka nekojega z imenom Enejaš, od osem let ležečega na posteli, koj bil je z gutum vudren.
- I reče njemu Peter: „Enejaš, ozdravlja te Ježuš Krištuš. Stani se i prestri tebi!“ I sproti se je stal.
- I videli su njega vsi koji su stanuvali vu Lidi i Saroni, koji se obrnuli jesu k Gosponu.
- Vu Jope je pako bila nekoja vučenica z imenom Tabita koja rastolnačena zove se ‘Dorkas’. Ova bila je puna dobreh del i almuštvih koja je činila.
- Dogodilo se je pako vu dnevih oneh da je obetežala i vumrla. Koju kad bi bili oprali, položili su nju vu večeralnicu.
- Pokehdob pako blizu bi bila Lida k Jopi, vučeniki čujuči da bi bil Peter vu njoj, poslali su dva človeka k njemu proseče: „Naj ti se ne veđa dojti tja do nas.“
- Podigši se pako Peter išel je z njimi. I kad bi bil došel, peljali su njega vu gostilnicu i okolo njega stale jesu vse vdovice plačuče i kazuče njemu halje i oprave koje načinila je njim Dorkas.
- Izegnavši pako van vse, Peter, pokleknuvši na kolena, molil je i obrnuvši se k trupli, rekel je: „Tabita, stani se!“ A ona otprla je oči svoje i vidivša Petra, gore je sela.
- Podavši pako njoj ruku, dignul je nju i kad bi bil dozval svece i vdovice, postavil je nju pred nje živu.
- Znano pako postalo je po celoj Jopi i veruvali su vnogi vu Gospona.
- Dogodilo se je pako da bi se vnogo dnevov zadržaval vu Jopi pri Šimonu nekojem kožaru.
