Knjiga Prirečjah — Del I.

Prirečja Šalomona, Davidovoga sina, izraelskoga kralja,
da bi se spoznala mudrost i redno držanje,
da bi se razmele reči razbornosti i da bi se prijel navuk podvučanja, pravica, rasuđenje i pravednost,
da bi se malehnem podeljila pametnost, mladencu znanje i razum.
Muder, ako nje bude poslušal, bude mudreši postal i ako nje bude razmel, bude vu stališu sebe i druge ravnati.
On bude pazil na prirečja, tolnačenje, na reči mudreh i njihove zganjke.
Gosponov strah je početek mudrosti; bedaki zamečeju mudrost i navuk.
Moj sinko, poslušaj podvučanje svojega oca i ne zapuščaj zakon svoje matere
da se na glavu tvoju postavi kinč i okol tvojega vrata zlati lancek.
Moj sinko, ako tebe budu vabili grešniki, ne privoljuj k njim.
Ako oni rečeju: „Hodi z nami! Čakajmo otajno na človečansku krv i nastavljajmo nedužnomu lečke prez zroka!
Požerimo njega živoga kakti pekel i celoga kakti kakvoga koj dole vu jamu stupljuje,
ovde najdemo ves dragi imetek i naše hiže budemo napunili z plenami.
Hiti z nami kocku,^* vseh nas naj bude jedna mošnja!“
Moj sinko, ne hodi z njimi, stegni svoju nogu od njihoveh stezah
ar njihove noge bežiju na zlo i oni se paščiju da prelejeju krv. Izaijaš 59,7.
Zahman pako rasprestira se mreža pred očmi ptic.
Oni takaj sami sebe strežeju na svoju krv i svojem dušam natavljaju lečke.^*
Ovakve steze^* jesu vsakoga skupca,^* one otimlju ladajučem živlenje.^*
Mudrost nazvešča vani,^* ona daje svoj glas čuti na vulicah.^*
Ona kriči na čelu spravišča ljudih, pred varaškemi vratmi^* naprvo donaša svoje reči ter veli:
„Deca, kak dugo budete ljubila dečinstvo, kak dugo budu bedaki poželjuvali ona koja njim jesu škodljiva i nepametni odurjavali znanje?
Obrnite se na moj opomenek: nut, ja vam hoču očituvati mojega duha i moje reči hoču vam znane včiniti!^*
Kajti ja vas jesem zvala, a vi se jeste suprotstavljali, kajti ja moju ruku jesem pretezala i nikoga ni bilo koj bi se na nju bil ogledal, Izai 65,12; 66,4; Jer 7,13,
kajti vi vsaki moj tolnač jeste zavrgavali i moja pokaranja zanemarili,
tak se takaj ja budem smejala nad vašem pogublenjem^* i ja vas budem osmehavala kada zvrhu vas bude nadošlo ono česa se jeste bojali.
Kada nenadejano bude navaljila nevolja i pogublenje kakti viher nahrupi, kada traplenje i stiska zvrhu vas nadojde,
onda budu nazivali mene, ali ja nje ne budem posluhnula, oni se budu rano stajali,^* ali me ne budeju našli
zato kajti su bogoljubno strahuvanje odurjavali i Gosponov strah nesu prijeli
niti nesu pristajali k mojemu tolnaču i vsako moje pokaranje za nikaj držali.
Zato naj jeju sad svojega puta i od svojeh tolnačov naj se zasičuju.^*
Odmetničtvo^* bude skončalo nerazumne i bedake bude skončala njihova sreča.^*
Koj pako mene posluša, bude prez straha počival, bude se vžival obilnosti niti se nikakvoga zla ne bude imal bojati.“

Objašnjenje

*
Budi naše sreče delnik. ↩︎
*
17. i 18. red mora se ovak razmeti: kak goder ptičar zahman rasprestira svoje mreže pred očmi ptic, kajti ptice, kada spažuju pogibel, ogibljeju se, ravno tak malo budu napeljiteli stignuli svoj cilj, dapače njihovi zasedi budu se proti njim samem obračali, oni budu, pokehdob drugem na pogublenje šetuju, sami vu pogublenje prepali. ↩︎
*
Ovakva sreča. ↩︎
*
Za ludskem blagom lakomoga. ↩︎
*
One (steze) peljaju krivične ladavce vu pogublenje i više puti zavdavaju telovnu smrt. ↩︎
*
Očivesto. ↩︎
*
To je: vsigdi vu živlenju, ako se opažuje ljudih držanje ter se k njemu prispodablja njihova od njega viseča sreča, moreju se ljudi navčiti mudrost. ↩︎
*
Kam se vse ljudstvo na trštvo i sud skup shađa, ona proti vsakomu slednjemu govori. ↩︎
*
Mudrost očekiva da bedaki nasleduju njejine pozivanje, ali k njoj nigdo ne dohađa. Zato ona zlovoljna veli dalje: „Kajti vi moje pozivanje zametavate i osmehavate, budem se takaj ja smejala nad vašum nesrečum.“ ↩︎
*
Nad nesrečum. ↩︎
*
Da me iščeju. ↩︎
*
Kaj je gdo posejal, to takaj naj ženje. Galat 6,8. ↩︎
*
Od mudrosti. ↩︎
*
Njihova segurnost, vkanljivi pokoj. ↩︎