Šoltar CXXXVIII.

1. K koncu Davidov šoltar

CXXXVIII.

Gospone, skušal si me i poznaš me.

2. Ti poznaš sedenje moje i gorestajanje moje.
3. Ti si prerazmel misli moje zdalka, kuda hodim i kada ležim, je tebi dobro znano.
4. Ti si previdel vse pute moje kad jezik jošče nit reči ni govoril.
5. Nut, Gospone, tebi su znana vsa buduča i prešesna, ti si me napravil i ruku tvoju na me položil.
6. Znanost tvoja je za me čudnovita, ona je previsoka, ja ju ne morem preseči.
7. Kam budem išel pred duhom tvojem i pred licem tvojem kam budem pobegnul?
8. Ako zastupim vu Nebo, ti si tam, ako dole stupim na pekel, i onde jesi.
9. Ako kreljuti moje vzemem rano, i prebival budem na kraju morja.
10. Takaj bude mene tam ruka tvoja peljala i desnica tvoja bude me držala.
11. I rekel sem: „Morebiti budu mene tmice pokrile,^*Žid. r. 11. Takaj noč bude svetlost okolo mene. noč bude takaj svetlost v nasladnostih mojeh.
12. Ar tmice ne budu se pomračile pred tobum i noč bude se kakti den presvetila, kak tmica njejina, tak je (tebi) svetlost njegova.
13. Ti si ladal bubrege moje, ti si me vre od vutrobe matere moje prijel.
14. Hvalil budem tebe^*Žid. r. 14. budem te hvalil pokehdob si me k velikomu čudu načinil. kajti si se strahovito izvisil, čudnovita jesu dela tvoja i duša moja spoznaje nje kruto.
15. Kosti moje, koje si na otajnem napravil, nesu bile pred tobum skrite, niti bitje moje kada sem jošče vu spodnješeh^*r. 15. To je v materinskoj vutrobi. zemlje bil.
16. Oči tvoje jesu vre zdavna moj prvi začetek videle, vsi (udi) jesu v knjigi tvoji zapisani, oni budu od dneva do dneva zdelavani i nigdar ni jednoga zmed njih (ne bude zmenkalo).
17. Ali kak preštimani jesu meni prijateli tvoji, o, Bože, gospodstvo njihovo je jako mogučno postalo.
18. Budem je brojil, bude ih više kak peska, (zato) vstal sem se i jošče sem pri tebi.
19. Ako budeš, Bože, grešnike pomoril, (tak anda) odstupete od mene, vi krvoločni ljudi!
20. Koji v mislah vašeh govorite, zahman budu varaše tvoje zavjeli.
21. Je li nesem, Gospone, odurjaval one koji tebe odurjavaju i je li nesem zaradi neprijatelov tvojeh pogibal?
22. Ja sem je potpunoma odurjaval, zato su oni neprijateli moji postali.
23. Skušaj me, Bože, i spoznaj srce moje, spitavaj me, spoznaj steze moje.
24. I poglej je li jesem na putu krivičnosti i zapeljaj me na put vekivečnosti.

Objašnjenje

• *
  Žid. r. 11. Takaj noč bude svetlost okolo mene. ↩︎
• *
  Žid. r. 14. budem te hvalil pokehdob si me k velikomu čudu načinil. ↩︎
• *
  r. 15. To je v materinskoj vutrobi. ↩︎