Šoltar XXXII.

Šoltar Davidov

 XXXII.

1. Radujte se, pravični, vu Gosponu, pravednem dostoji se (njega) hvaliti.
2. Hvalite Gospona z citarami, pojte Gosponu hvalu na šoltarnici deset strun.
3. Pojte njemu novu pesem, dobro njemu pojte z veselem i vzdignjenem glasom.
4. Ar pravedna je reč Gosponova i vsa dela njegova verna.
5. On ljubi milosrdnost i pravicu, Zemlja je puna milosrdnosti Gosponove.
6. Z rečjum Gospona jesu Nebesa vtvrđena^*Žid. včinjena. i z sapum vust njegoveh vsa jakost njihova.
7. On zbira kakti vu meh vode morja i vire vod skriva vu glibočinah Zemlje.
8. Vsa Zemlja naj se boji Gospona, vsi pako koji na svetu prebivaju, naj pred njim trepečeju.
9. Ar on je rekel i vsa su včinjena, on je zapovedal i vsa su stvorjena.
10. Gospon razmeta tolnače narodov, zahitava mislenja pukov i zameče sklepe poglavarov.
11. Gospon pako tolnač ostane naveke i misli srca njegovoga od pokolenja do pokolenja.
12. Blaženi narod koj ima Gospona za Boga svojega, puk kojega si on za odvečtvo svoje je izebral.
13. Gospon gleda iz Nebes dole, vidi vse sine človečanske.
14. Iz pripravljenoga sebi prebivališča^*Žid. Iz svoje najtvrdeše stolice itd.gledi na vse koji na Zemlji prebivaju.
15. On je koj je vsakoga srce poseb stvoril, koj vsa njihova dela pozna.
16. Kralj si ne pomaga z svojum velikum vojskum, niti ris ne pomaga si z svojum velikum močjum.
17. Konj je vkanljiva pomoč, njegova još tak velika moč ne bude njemu pomagala.
18. Nut oči Gosponove gledaju na one koji [se] boje njega i na one koji se ufaju vu njega.
19. Da duše njihove od smrti oslobodi ter nje vu vremenu glada prežive.
20. Duša naša čaka na Gospona^*On je pomoč naša i obramba naša. ar on je naš pomočnik i branitel.
21. Kajti vu njem bude se srce naše veselilo i vu sveto ime njegovo ufali se jesmo.
22. Naj bude, Gospone, milosrdnost tvoja zvrhu nas kak smo se vu te ufali.

Objašnjenje

• *
  Žid. včinjena. ↩︎
• *
  Žid. Iz svoje najtvrdeše stolice itd. ↩︎
• *
  On je pomoč naša i obramba naša. ↩︎