Da po otprtosrčenem apoštolov prodekuvanju reč Božja vsem je očituvana zvun oneh kojeh pameti zaslepljene jesu, da vnoge suprotivčine podnašaju apoštoli, nigdar vendar ne zdvojivaju, hipno pako traplenje veliku i vekivečnu diku doprinaša.
- Zato, imajuči službu po kojoj smo milosrdnost zadobili, ne pomenjkavamo,
- nego se otpovedamo skrovnem delam sramote nehodeči vu šegavosti niti kvareči reč Božju, nego vu očituvanju istine preporučajuči same nas po vsakoj dušnovesti ljudih pred Bogom.
- Ako pako takaj zakrit je Evangelijum naš, tak je pred onemi koji se skvaruju zakrit,
- pri kojeh bog sveta ovoga zaslepil je pameti neverneh da ne sveti njim presvečenje Evangelijuma dike Krištuševe koj je kip božanski.
- Ar sami sebe ne nazveščamo, nego Ježuša Krišuša, Gospona našega, sami sebe za sluge vaše po Ježušu.
- Ar Bog, koj rekel je iz tmice svetlosti sijati, on je zasijal vu srcah našeh na presvečenje spoznanja božanske svetlosti vu obrazu Krištuša Ježuša.
- Imamo pako kinča ovoga vu posudah zemljenih da izvišenost bude kreposti božanske i ne iz nas.
- Od vsikud traplenje trpimo, ali se ne stiskamo, pomenjkavamo, ali se ne raspuščamo,
- preganjanje trpimo, ali ne zaostavljamo se, tlačimo se, ali ne poginemo,
- vsigdar vmarjanje Ježuša Krištuša vu telu našem okolo noseči da se i živlenje Ježuša očituje vu telah našeh.
- Ar se vsevdilj mi, koji živemo, na smrt predajemo zaradi Ježuša da se i živlenje Ježuševo očituje vu telah našh vmrtelneh.
- Anda smrt vu nami opravlja, življenje pako vu vami.
- Imajuči pako jednoistoga duha vere kak pisano je: „Veruval sem zbog česa sem govoril“, i mi smo veruvali zbog česa i govorimo
- znajuči da koj obudil je Ježuša, i nas z Ježušem obudi i naprvo stavi z vami skupa.
- Ar vsa su zaradi vas da milošča obiljujuča po vnogeh vu hvale davanju obiljuje na diku Božju.
- Zbog česa ne pomenjkavamo, ali akoprem on, koj zvana je človek naš, zrušava, vendar on koj znutra je, ponavlja se od dneva do dneva.
- Ar ono kaj vu nazočnosti je hipno i lehko traplenja našega, preko mere vu izvišenosti vekivečnu dike zmehščinu opravlja vu nas.
- Pokehdob mi ne gledimo koja vidiju se, nego koja ne vidiju se. Ar koja vidiju se vremenita jesu, koja pako ne vidiju se, vekivečna jesu.
