Opomina da prijetu naj ne zapuste milošču pokažuči kuliko se je trudil da bi se skušanoga službenika Božjega iskazal i opomenuvši da se naj od skupnoga živlenja i tovaruštva odružiju.
- Pomagajuči pako opominamo vas da ne primete zahman milošče Božje.
- Ar on veli: „Vu prijetnom vremenu jesem posluhnul tebe i vu dnevu zveličenja ja sem pomogel tebi. Nut, sada je vreme prijetno, nut, sada su dnevi zveličenja!“
- Nikomu ne davajmo nikakove spačke da se ne kudi naša služba,
- nego se vu vsem iskažujmo kakti Božji službeniki z velikum trpljivostjum vu trudih, vu potrebočah, vu stiskah,
- vu vudarcih, vu vuzah, vu smutnjah, vu trudih, vu skoznuvanjih, vu postih,
- vu čistoči, vu znanosti, vu dugotrpnosti, vu Duhu Svetem, vu neizličnoj ljubavi,
- vu reči istinski, vu kreposti Božjoj, po oružju pravice zdesna i zleva,
- po diki i priprostoči, po zločestem i dobrem glasu, kakti napeljavci, ter vendar istinski, kakti neznani, ter vendar poznani,
- kakti vumirajuči i, nut, mi živemo, kakti kaštigani, ne vendar vmorjeni,
- kakti žalosni, ter vendar vsigdar veseli, kakti vbogi, koji vendar vnoge obogati, kak da ne bi nikaj imali, a vendar vsa ladamo.
- Vusta naša jesu proti vam otprta, o, Korijantinci, srce naše je raširjeno.
- Ne stiščete se vu nami, stiščete se pako vu srcah vašeh.
- Jednoistu pako imajuči plaču, kakti sinom govorim: „Raširete se i vi!“
- Najte jarem vleči z neverniki. Ar kakovo delničtvo ima pravica z krivičnostjum? Ali kakovo je opčinstvo svetlosti z tmicum?
- Kakovo pako je skupspravlanje Krištuša z Belijalom? Ali kakov del je vernoga z nevernem?
- Kakvo pako je slaganje cirkve Božje z bolvani? Ar vi jeste cirkva Boga živoga, kak veli Bog: „Pokehdob prebival budem vu njih i med njimi hodil budem i budem njihov Bog i oni budu moj puk.
- Zaradi toga izidete iz sredine zmed njih i odlučete se, veli Gospon, i nečistoga ne doteknete se
- i ja nazad primem vas i budem vam za Oca i vi budete meni za sine i kčere, veli Gospon vsamoguči.“
