Vuči da Krištuš od mrtveh je gore stal ter vnogem i zadnjič Pavlu, koj se najmenšega zmed apoštolov imenuje, je iskazal i naše ovde gorestajanje pokažuje ter red i način njegov, skupa z razlučnum obuđeneh dikum, ne lestor na duši, nego takaj na telu, smrt pako vu gorestajanju požere se.
- Ja vas pako, bratja, spomenujem iz Evangelijuma kojega sem vam nazveščal, kojega ste takaj prijeli i vu kojem opstajete, Galat 1,11,
- po kojem se takaj zveličite, ako se ga tak obdržite kak sem ga ja vam nazvestil, zvun ako ste zahman veruvali.
3.Ar prvič jesem vam predal kaj sem i ja prijel: da je Krištuš vumrl za naše grehe poleg Pisem, Iza 53,5,
- i da je bil pokopan i da se je tretji dan gore stal poleg Pisem
- i da se je iskazal Kefašu i zatem jedenajstem.
- Potlam se je iskazal izviše kak petsto bratom zajedno zmed kojeh jošče vnogi živeju do denešnjega dana, nekoji pako jesu pomrli.
- Zatem se iskazal Jakopu, zatem vsem apoštolom.
- Zadnjič pako, za vsemi je se takaj meni, kakti izvršku, iskazal.
- Ar ja sem najmenši zmed apoštolov koj nesem vreden da se imenujem apoštolom pokehdob sem preganjal Cirkvu Božju. Čin Ap 8,1. sled. Ef 3,8.
- Ali po milošči Božjoj jesem to kaj jesem i njegova milošča ni bila prazna vu meni ar ja sem več kak vsi drugi posluval, ništer manje ne ja, nego milošča Božja z menum.
- Ar ali oni ali ja, tak prodekujemo i tak ste veruvali.
- Ako se pako Krištuš nazvešča da se od mrtvih je gore stal, kak nekoji veliju med vami da gorestajanje mrtveh neje?
- Ako pako gorestajanje mrtveh neje, niti se Krištuš ni gore stal.
- Ako se pako Krištuš ni gore stal, prazno je anda prodekuvanje naše, prazna je i vera vaša,
- nahađamo se pako i krivi svedoki Božji kajti smo svedočili od Boga da je obudil Krištuša kojega ni obudil ako mrtvi gore ne stajeju.
- Ar ako mrtvi gore ne stajeju, niti se Krištuš ni gore stal.
- Ako se pako Krištuš ni gore stal, prazna je vera vaša ar jošče jeste vu grehih vašeh.
- Anda i koji su zaspali vu Krištušu, poginuli jesu.
- Ako samo vu ovem živlenju ufanje imamo vu Krištuša, nevoljneši smo od vseh ljudih.
- Sada pako Krištuš gore stal se je od mrtveh prvina spečeh.
- Pokehdob zadnjič po človeku je smrt i po človeku gorestajanja mrtveh.
- I kak vu Adamu vsi vumiraju, tak i vu Krištušu vsi se oživeju.
- Vsaki pako vu redu svojem: prvina je Krištuš, zatem oni ki su Krištuševi, ki su na došestek njegov veruvali.
- Potlam je konec kada predal bude kraljestvo Bogu i Ocu, kada pod nikaj spravil bude vse poglavarstvo i oblast i mogučnost.
- On pako mora kraljuvati doklam spravi vse neprijatele pod noge svoje.
- Poslednja pako neprijatelica skončana bude smrt ar vsa podložil je pod noge njegove. Kada pako veli:
- „Vsa su podvržena njemu“, prez dvojmbe zvun onoga koj podvrgel je njemu vsa.
- Kada pako podvržena budu njemu vsa, onda i sam Sin podvržen bude onomu koj je njemu vsa podvrgel da bude Bog vse vu vseh.
- Ar drugač kaj bi činili koji krstiju se za mrtve ako se nikak mrtvi gore ne staneju? Zakaj se anda za nje krstiju?
- Zakaj i mi pogibamo vsaku vuru?
- Vsaki dan vumiram za vašu diku, bratja, koju imam vu Krištušu Ježušu, Gosponu našem.
- Ako sem (to govorim po človečanski šegi) vu Efezu z zverinami vojuval, kaj mi hasni ako se mrtvi gore ne staju? Jeđmo i pijmo ar sutra vumremo.
- Ne dajte se zapeljati: pokvaruju dobro držanje spomenki zločesti.
- Prebudete se pravični i najte grešiti ar nekoji ne znaju za Boga, na sramotu vam velim.
- Ali reče gdo: „Kak se gore staneju mrtvi? I v kakovem telu dojdu?“
- Nespametni, ti kaj seješ, ne ožive ako predi ne vumre.
- I kaj seješ, ne seješ telo koje buduče je, nego golo zrno, kak štimaj pšenice ali kojega zmed ostaleh.
- Bog pako da njemu telo kak hoče i vsakomu zmed semenj lastovito telo.
- Neje vsako meso jednoisto meso, nego drugo je zadnjič človečje, drugo pako maršeče, drugo ptičje, a drugo ribje.
- Jesu i nebeska tela i zemeljska tela, nego drugo je zadnjič nebeskeh dika, drugo pako zemeljskeh,
- druga je svetlost Sunca, druga je svetlost Meseca i druga je svetlost zvezd. Ar zvezda od zvezde razlučava se vu svetlosti,
- tak i gorestajanje mrtveh. Seje se vu sprhljivosti, stane se vu nesprhljivosti.
- Seje se vu prostoči, stane se vu diki, seje se vu slabosti, stane se vu močnosti.
- Seje se telo živinsko, stane se telo duhovno. Ako je živinsko telo, je i duhovno, kak pisano je:
- „Včinjen prvi človek Adam vu duši živuči“, poslednji Adam na duh oživlenja.
- Ali ni predi kaj je duhovno, nego kaj je telovno, potlam kaj je duhovno.
- Prvi človek je iz zemlje, zemeljski, drugi človek iz Neba, nebeski.
- Kakov je zemeljski, takovi su i zemeljski i kakov je nebeski, takovi su i nebeski.
- Anda kak smo nosili kipa toga zemeljskoga, nosemo i kipa toga nebeskoga.
- To pako velim, bratja, da meso i krv Kraljestvo Božje ladati ne moreju, niti sprhljivost nesprhljivosti ladati.
- Nut, skrovnost vam povedam: mi se vsi gore stanemo, ali se vsi ne premenimo.
- V jednem hipu, v očnem megnenju, na glas poslednje trumbente, bude se to dogodilo ar trumbenta bude zatrubila i mrtvi se gore staneju nesprhljivi i mi se premenimo.
- Ar ovo sprhljivo mora na se vzeti nesprhljivost i ovo vmrtelno obleči nevrmtelnost.
- Kada pako ovo vmrtelno obleče nevmrtelnost, onda se spuni govorenje koje je pisano: „Požrta je smrt vu preobladanju.“
- „Smrt, gdje je tvoje probladanje? Smrt, gde je tvoj žalec?“
- Žalec pako smrti je greh, krepost pako greha je Zakon.
- Bogu pako hvala, koj je nam dal preobladanje po našem Gosponu Ježušu Krištušu.
- Anda, draga moja bratja, budete stalni i negenjeni, obilujuči vu delu Gosponovem vsigdar, znajuči da trud vaš ne bude zahman vu Gosponu.
