Na kakov način jesu vrleši Židovi zbog včinjenoga njim od Boga obečanja, koje se ispuni premda nekoji zmed njih bili su neverni, vsi pako, i Židovi i poganini, jesu grehu podvrženi od kojega ne oslobađa Zakon, nego vera vu Krištuša pomiritela da se nigdo ne bude zbog Zakona delih dičiti mogel.
- Kaj ima anda več Židov kak drugi koj? Ali kakova je hasen obrezavanja?
- Vnoga povsemvsega. Ar prvič kajti je njim zaufana reč Božja.
- Ar kaj ako nekoji zmed njih nesu veruvali? Je li nevernost njihova vernost Božju na nikaj spravi? Zevsema ne.
- Je li pako Bog istinit, vsaki pako človek lažec, kak pisano je da opravičen budeš v rečih tvojeh i obladaš kada suđen budeš.
- Ako pako krivičnost naša pravičnost božansku izvišava, kaj rečemo? Je li je nepravičen Bog koj se zato srdi?
- (Po človečjem govorim.) To ne ar kak bude sudil Bog sveta ovoga?
- Ar ako istina božanska vu laži mojoj je obiljuvala na diku njegovu, zakaj se jošče i ja kakti grešnik sudim?
- I ne (kak se blaznimo i kak vele nekoji da mi velimo) činemo zla da dojdu dobra kojeh opsuđenje pravično je.
- Kaj anda vrleši jesmo od njih? Zevsema ne. Ar smo tužili i Židove i grke da su vsi pod grehom,
- kak pisano je da „nikoga ni pravičnoga,
- ni razumnoga, ni koj bi iskal Boga.
- Vsi su odstupili, skupa su nehasnoviti postali, ni koj bi včinil dobro, ni tja do jednoga.
- Otprto pokopališče je grlo njihovo, z jeziki svojemi jesu vkanljivo baratali, čemer ljutice kače je pod vusnicami njihovemi,
- kojeh vusta z prokletstvom i žuhkočum puna jesu,
- noge njihove jesu hitre na prelejanje krvi,
- skrušenje i nesreča je na putih njihoveh
- i puta mira nesu spoznali
- ni Božjega straha pred očmi njihovemi.“
- Znamo pako da koja goder Zakon govori, onem koji su vu Zakonu govori da se vsaka vusta zatekneju i podložen postane ves svet Bogu
- ar iz dela Zakona ne opraviči se ni jedno telo pred njim. Ar po Zakonu je spoznanje greha.
- Sada se pako prez Zakona pravica Božja iskazala, posvedočena od Zakona i prorokov.
- Pravica pako božanska po veri Ježuša Krištuša vu vse i na vseh koji veruju vu njega ar neje razluke,
- ar su vsi pregrešili i potrebuju dike Božje.
- Opravičeni zahman po milošči njegovi, po otkuplenju koje je vu Ježušu Krištušu
- kojega je naprvo stavil Bog na pomirenje po veri vu krvi njegovi, na iskazanje pravice svoje, po otpuščenju prešesneh grehov.
- Vu trplivnosti Božjoj na pokazanje pravice svoje vu vezdašnjem vremenu, da je on sam pravičen i opravičujuči onoga koj [je] iz vere Ježuša Krištuša.
- Gde je anda dika tvoja? Ishičena je. Po kakovem zakonu? Činov? Ne, nego po zakonu vere.
- Ar štimamo da se opravičuje človek po veri prez delih Zakona.
- Je li Židovov Bog lestor? Je li ni takaj poganinov? Dapače, takaj poganinov.
- Ar zadnjič jeden je Bog koj opravičuje obrezavanje iz vere, a neobrezavanje po veri.
- Je li anda Zakona zatiramo po veri? Zevsema ne, nego Zakona potvrđavamo.
