Krištuš trs, njegvi vučeniki rozgve. On opomina na stalnost, ljubav i trpljivnost vu suprotivščinah ter ipak obeča Svetoga Duha.
- „Ja jesem pravi trs, a moj Otec je vinogradar.
- Vsaku rozgvu vu meni koja ne donaša sada, nju jemlje proč i vsaku koja donaša sada, nju čisti da več sada doprinese.
- Vi vre sada jeste čisti zaradi rečih koja ja vam jesem govoril.
- Ostanite vu meni i ja (ostanem) vu vas. Kak goder rozgva sama ob sebi ne more doprinesti sada ako ne ostaje na trsu, tak niti vi ako vu meni ne ostanete.
- Ja jesem trs, vi jeste rozgve: koj vu meni ostane i ja vu njem, on vnogo sada donaša ar vi prez mene nikaj ne morete činiti.
- Ako gdo vu meni ne ostane, ov se bude kakti rozgva van hitil i vsehne; ona se pobere, hiti vu ogenj i ona gori.
- Ako ostanete vu meni i moje reči ostaneju vu vas, tak za kaj goder budete hoteli, budete mogli prositi i da se vam.
- Vu tom se bude moj Otec odičil da vi kruto vnogo sada doprinesete i moji vučeniki budete.
- Spodobno kak je mene ljubil Otec, tak i ja vas jesem ljubil. Ostanite vu mojoj ljubavi.
- Ako vi moje zapovedi obdržavate, tak ostajete vu mojoj ljubavi tak kak sem takaj ja zapovedi mojega oca obdržaval i ostajem vu njegvoj ljubavi.
- Ova jesem vam govoril da moje veselje ostane vu vas i vaše veselje zvršeno bude.
- Ovo je moja zapoved da se med sobum ljubite kak ja vas jesem ljubil.Gore 13,34.
- Vekše ljubavi od ove nigdo nema da, najmre, svoje živlenje polaže za svoje prijatele.
- Vi jeste moji prijateli ako činite koja ja vam zapovedam.
- Ja vas vre sada ne ozivam sluge ar sluga ne zna kaj čini njegov Gospon, nego ja vas jesem imenuval prijatele kajti vsa, koja goder jesem čul od mojega Oca, jesem vam na znanje dal.
- Vi neste mene izebrali, nego ja jesem vas izebral i ja jesem vas postavil da idete i sad doprinesete i sad vaš ostane da vam Otec podelji vsa za koja goder budete vu mojem imenu prosili. Mat 28,19.
- Ova ja vam zapovedam da se med sobum ljubite. 1Jan 3,11; 4,7.
- Ako vas svet odurjava, tak znajte da je mene prvlje nego vas odurjaval.
- Da bi vi bili od sveta, tak bi svet kaj je njegvo ljubil, kajti pako vi neste od sveta, nego ja vas od sveta jesem odebral, zato vas svet odurjava.
- Spomenite se iz mojeh rečih koje ja vam jesem govoril: ‛Sluga ni vekši od svojega gospona.’ Ako su mene preganjali, tak budu i vas takaj preganjali. Ako su moje reči obdržavali, tak budu i vaše takaj obdržavali. Gore 13,16. Mat 10,24.
- Ali vsa ova vam oni včine zaradi mojega imena ar oni ne poznaju onoga koj je mene poslal.
- Da ja ne bi bil došel ter njim govoril, tak oni ne bi imali greha, vezda pako oni nemaju izgovora zaradi svojega greha.
- Koj mene odurjava, on takaj mojega Oca odurjava.
- Da ja med njimi ne bi bil činil dela kakva nigdo drugi ni včinil, tak ne bi imali greha, vezda pako jesu nje oni videli ter vendar odurjavaju mene i mojega Oca. Gore 10,37.
- Ali da se ispuni govorenje koje je vu njihovem Zakonu napisano: ‛Oni mene prez zroka odurjavaju.’
- Kada pako dojde Razveselitel kojega ja vam pošljem od Oca, Duha Istine koj ishađa od Oca, on bude od mene svedočanstvo daval. Luk 24,49.
- I vi takaj budete svedočili kajti vi od početka jeste z menum.“
