Raspošiljanje sedemdeset i dveh vučenikov. Jaj nespokorjenem varašom. Povraček vučenikov. Opomenek na poniznost. Prilika od milosrdnoga Samaritanca. Ježuš nahađa se pri Marti i Mariji.
- Zatem pako je Gospon jošče drugeh sedemdeset i dva vučenikov odredil i nje je pošiljal po dva i dva pred sobum vu vsaki varaš i mesto kam je on sam nakanil dojti.
- I reče njim: „Žetva je zaisto obilna, ali delavcev je malo. Prosete anda Gospona žetve da pošlje delavce vu svoju žetvu.
- Hote, nut, ja vas pošiljam kakti janjce med vuke.
- Ne nosete mošnje niti torbe niti obutelji i nikoga na putu ne pozdravljajte.
- Vu koju goder hižu zajdete, najprvič recite: ʻMir budi ovoj hiži!ʼ
- I ako onde bude sin mira, opočine nad njim vaš mir, ako ga pak ne bude, tak se k vam nazad povrne.
- Vu onoj istoj pako hiži ostanite ter ječte i pijte koja se pri njih nahađaju ar je vreden delavec svoje plače. Ne prehađajte od hiže do hiže.
- I vu koj goder varaš zajdete ter vas primeju, ječte koja pred vas deneju.
- I vračete betežne koji su vu njem i recite njim: „Približalo se je k vam Kraljestvo Božje!“
- Vu koj goder pako varaš zajdete ter vas ne primeju, izidite van na njegve vulice i recite:
- ʻTakaj prah, koj se je nas od vašega varaša prijel, stepljemo ga na vas, medtemtoga vendar to znajte da se je približalo Kraljestvo Božje!ʼ
- Velim vam da Sodomi bude vu onem dnevu lekše kak onomu varašu.
- Jaj tebi, Korozajin, jaj tebi, Betšajida, kajti da bi vu Tirušu i Sidonu bila včinjena čuda koja su včinjena pri vas, tak bi bili negda vu vrečah i pepelu sedeč pokoru delali.
- Medtemtoga Tirušu i Sidonu bude na Sudu lekše kak vam.
- I ti, Kafarnaum, koj si tja do nebes izvišen, buš tja do pekla prepal.
- Koj vas posluša, on mene posluša i koj vas zameče, on mene zameče. Koj pako mene zameče, on zameče onoga koj je mene poslal.“
- Povrnuli su se pako sedemdeset i dva z veseljem govoreči: „Gospone, takaj vragi podlažeju se nam vu tvojem imenu.“
- I reče njim: „Videl sem Šatana kakti oblesk iz Neba dole padati.
- Nut, dal sem vam oblast tlačiti kače i škorpione i vsu moč neprijatela i nikaj vam ne bude škodelo.
- Medtemtoga nad tem se najte veseliti da se vam duhi podlažeju, veselete se pako da su vaša imena zapisana vu Nebesih.“
- Vu onoj isti vuri razveselil se je vu Svetem Duhu i rekel: „Zahvaljujem tebi, Otec, Gospon Neba i Zemlje, da si ova skril pred mudremi i spametnemi ter si nje očituval malehnem. Zaisto, Otec, ar tak je bilo dopadno pred Tobum!
- Vsa su meni od mojega Oca predana. I nigdo ne zna gdo je Sin, kak Otec i gdo je Otec, kak Sin i komu bude hotel Sin očituvati.“
- I obrne se k svojem vučenikom i reče: „Blažene oči koje vidiju kaj vi vidite!
- Ar velim vam da su vnogi proroki i kralji ono hoteli videti kaj vi vidite ter nesu videli i ono čuti kaj vi čujete ter nesu čuli.“
- I, nut, stane se nekoj pravdoznanec skušavajuči njega i reče: „Mešter, kaj mi je včiniti da žitek vekivečni zadobim?“
- A on reče njemu: „Kaj stoji vu Zakonu pisano? Kak čteješ?“
- On odgovori i reče: „Ljubi Gospona, tvojega Boga, iz vsega srca tvojega i iz vse duše tvoje i iz vseh močih tvojeh i iz vse pameti tvoje, a tvojega bližnjega kakti samoga sebe.“
- I reče njemu: „Prav si odgovoril. To včini i budeš živel!“
- On pako je hotel samoga sebe opravičiti i reče Ježušu: „A gdo je moj bližnji?“
- Poprime pako Ježuš reč i reče: „Nekoj človek je išel od Jeruzalema dole vu Jeriko i dospel je med tolvaje koji su ga takaj oplenili. I poklamkam bi ga bili oranili, jesu odišli i ostavili su ga napol mrtvoga.
- Dogodilo se je pako da bi onem istem putem dole išel neki aldovnik i kad bi ga bil videl, prešel je mimo,
- spodobno takaj i nekoj dvornik: on dojde do mesta, vidi ga i prejde mimo.
- Putujuči nekoj pako Samaritanec dojde do njega i kad bi ga bil zagledal, genul se je na milosrdnost.
- I pristupi, zaveže njegve rane, vleje olje i vino vu nje i postavi ga na svoje kljuse, dopremi ga na oštariju i imal je na njega skrb.
- I drugi dan zvadi dva desetake i da nje ošterjašu i reče: ʻImaj na njega skrb i kaj god više potrošiš, ja kad nazad pojdem, povrnem tebi.ʼ
- Koj zmed oveh treh vidi se tebi da je bil bližnji onoga koj je bil med razbojnike dospel?“
- On pako reče: „On koj je milosrdnost nad njim včinil.“ I reče njemu Ježuš: „Hodi ter i ti včini spodobno!“
- Včinjeno je pako kad bi išli da je on zašel vu nekoje trgovišče i nekoja žena imenom Marta je njega prijela vu svoju hižu,
- a ova je imala sestru imenom Mariju, koja je takaj sedela poleg nog Gosponoveh i poslušala njegvu reč.
- Marta se je pako skrbela za verno posluženje, koja postane i reče: „Gospone, ti ne maraš da moja sestra je ostavila mene samu dvoriti? Reci anda njoj da mi pomore.“
- I odgovori Gospon ter reče njoj: „Marta, Marta, ti se skrbiš i treš za vnoga.
- Ali neg jedno je potrebno. Marija je najboljši del izebrala koj se ne vzeme od nje.“
