Farizejuši morguju proti Ježušu kajti se vzimlje za grešnike. Tri prilike: od pogubljene ovce, peneza i sina.
- Približavali su se pako k njemu publikanuši i grešniki da bi ga poslušali.
- I morguvali su farizejuši i pisci govoreči: „Ov prijemlje grešnike i jé z njimi.“
- On pako reče njim priliku ovu govoreči:
- „Koj je zmed vami takov človek koj ima sto ovac, pak ako zmed njih jednu pogubi, je li ne ostavi devedeset i devet vu puščini ter ide za onum kâ se je zgubila doklam ju najde?
- I kad ju najde, vrže ju z veseljem na svoja ramena
- i kad dojde domom, zezove svoje prijatele i susede govoreči njim: ʻVeselete se z menum ar sem našel moju ovcu koja je bila poginula.ʼ
- Velim vam da ovak bude na Nebu zvrhu jednoga grešnika koj čini pokoru vekše veselje kak zvrhu devedeset i deveteh pravičneh koji nesu potrebni pokore.
- Ali koja žena ka ima deset penezov, ako pogubi jednoga, je li ne vužge sveču i pomete hižu ter marljivo išče dok ga najde?
- I kad ga najde, zezove svoje prijatelice i susedice govoreča: ʻVeselete se z menum ar sem našla penez kojega sem bila pogubila.ʼ
- Ovak, velim vam, bude veselje pred angeli Božjemi zvrhu jednoga grešnika koj čini pokoru.“
- Reče pako: „Nekoj človek je imal dva sine
- i mlajši zmed njih reče ocu: ʻOtec, daj mi del blaga koj na me spada.ʼ I razdeljil je med nje imetek.
- I ne za vnogemi dnevi skup zebere mlajši sin vsa i povdal se je na put vu daleki orsag i onde je nasladno živuč potepel svoj imetek.
- I kad bi vsa bil potrošil, nastal je vu onem orsagu veliki glad i on je počel stradati.
- I odišel je i pridružil se je nekojemu varaščanu onoga orsaga. I poslal ga je na svoje selo da bi pasel svinje.
- I želel je napuniti svojega trbuha z plevami koje su jele svinje i nigdo mu ni dal.
- Onda dojde vu se i reče: ʻKuliki najemniki vu hiži mojega oca obiljuju z kruhom, a ja ovde od glada pogibljem!
- Hoču se podignuti i k mojemu ocu iti i njemu reči: ‘Otec, ja jesem zagrešil proti Nebu i pred tobum,
- ja več nesem vreden da bi se ozival tvojem sinom, včini me kakti jednoga zmed tvojeh najemnikov.’ʼ
- I stane se i dojde k svojemu ocu. Kad bi pako jošče dalko bil, zapazi ga njegov otec i gene se na milosrdnost ter mu naproti drči i obme ga za vrat i kušne.
- Sin pako reče njemu: ʻOtec, zagrešil sem proti Nebu i pred tobum, ja več nesem vreden da bi se ozival tvojem sinom.ʼ
- Otec pako reče slugam svojem: ʻBrzo iznesete najboljšu opravu i oblecete ga i dajte mu prsten na njegvu ruku i obuču na njegve noge
- i dopeljajte pitano tele i zakoljite je i ječmo i gostemo se
- ar ov moj sin je bil mrtev i oživel je, bil je poginul i najđen je.ʼ I počeli su se gostiti.
- Bil je pako njegov stareši sin na polju i kad bi došel ter se k hiži približaval, čul je igranje i plesanje.
- I dozove jednoga zmed slug i pita ga kaj bi to bilo.
- A on reče njemu: ʻTvoj brat je došel i tvoj otec je zaklal pitano tele kajti ga je zdravoga nazad dobil.ʼ
- I rasrdil se je i ni hotel nuter iti. Izišel je anda njegov otec i počel ga je prositi.
- A on odgovori i reče svojemu ocu: ʻNut, tulika leta služim tebi i nigdar nesem prekršil tvoju zapoved ter mi nigdar jošče nesi dal niti jednoga kozleka da bi se bil gostil z mojemi prijateli,
- ali kad je ov tvoj sin koj je svoj imetek z kurvami zatrošil došel, zaklal si mu pitano tele.ʼ
- A on reče njemu: ʻSinko, ti si vsigdar z menum i vsa moja jesu tvoja,
- gostiti se pako i veseliti je bilo potrebno kajti ov tvoj brat je bil mrtev i oživel je, bil je poginul i najđen je.’“
