Mudri iščeju Ježuša kojega najdeju kakti siromaško dete, pak mu se vklanjaju. Herodeš, hotivši skončati Ježuša, decu vmarja. Ježuš beži vu Egiptuš otkud se po smrti Herodešovi nazad vu židovsku zemlju povrača.
- Kad bi se pako bil narodil Ježuš vu Betlehemu Jude vu dnevih Herodeša kralja, nut, došli jesu mudri od Sunčenoga ishoda vu Jeruzalem
- govoreči: „Gde je koj se je narodil židovski kralj? Ar videli jesmo njegvu zvezdu na Sunčenem ishodu i došli jesmo vklanjat se njemu.“
- Kaj kad bi Herodeš kralj bil čul, prestrašil se je, i ves Jeruzalem z njim.
- I skup spravivši vse poglavare aldovničke i pisare ljudstva, zezvedal je iz njih gde bi se roditi imel Krištuš.
- A oni rečeju njemu: „Vu Betlehemu Jude ar je tak pisano po proroku:
- ‛I ti, Betlehem, zemlja Jude,nikak nesi najmenjša med poglavitemi varaši Jude ar iz tebe izide vođa koj bude moje izraelsko ljudstvo ravnal.’“
- Onda Herodeš, otajno dozvavši mudre, marljivo je iz njih zezvedal ono vreme vu kojem se je njim zvezda iskazala.
- I poslavši nje vu Betlehem, reče: „Hote i marljivo spitavajte za detetom i gda je najdete, nazvestete meni da i ja dojdem njemu se vklanjat.“
- Koji, kada bi posluhnuli kralja, jesu odišli. I, nut, zvezda koju su bili videli na Sunčenem ishodu je išla pred njimi doklam dojduča je postala zgora gde je bilo dete.
- Kad su pako oni zvezdu zgledali, jesu se kruto velikem veseljem razveselili.
- I kada su nuter stupili vu hižu, našli su dete z Marijum, materjum njegvum, i pokleknuvši vklanjali su se njemu. I kada bi otprli bili svoje kinče, alduvali su njemu dare: zlato, temnjan i plemenitu mast.
- I kada su vu snu odgovor prijeli da se naj ne povračaju k Herodešu, povrnuli se jesu drugem putom vu svoju državu.
- Koji kad bi bili odišli, nut, angel Gosponov iskazal se je vu snu Jožefu govoreči: „Stani se i vzemi dete i njegvu mater i beži vu Egiptuš i ostani tam dok ti ja povem. Ar hoče biti da Herodeš bude iskal dete na pogublenje.“
- On pako, kad bi se bil gore vstal, vzel je dete i njegvu mater v noči i odišel je vu Egiptuš.
- I ostal je onde tja do Herodešove smrti da bi se ispunilo kaj je rečeno od Gospona po proroku govorečem: „Iz Egiptuša jesem pozval mojega sina.“
- Onda Herodeš, kad bi videl da je napeljan od mudreh, jako se je rasrdil i poslavši vojsku, pomoril je vsu decu koja jesu bila vu Betlehemu i po vseh njegveh krajnjah, od dveh let i niže primerom vremenu koje je bil izvedel od mudreh.
- Onda se je spunilo kaj je rečeno od Jeremijaša proroka govorečega:
- „Glas je vu Rami čujen, plač i narekuvanje veliko. Rakel je oplakuvala svoje sine i né se hotela dati obatriveti zato kajti ih je nestalo.“
- Kad bi pako Herodeš bil vumrl, nut, angel Gosponov je se Jožefu vu snu iskazal vu Egiptušu
- govoreči: „Stani se i vzemi dete i njegvu mater ter hodi vu izraelsku zemlju ar koji su šetuvali detetu na živlenje, jesu pomrli.“
- I podignul se je i vzel dete i njegvu mater i došel je vu izraelsku zemlju.
- Kad bi pako bil čul da Arkelauž namesto svojega oca Herodeša vu Judeji kraljuje, bojal se je tam iti i opomenjen vu snu odišel je na galilejanske strane.
- I tam dojduči, stanuval je vu varašu koj se zove Nazaret da bi se spunilo kaj je rečeno po prorokih da se bude Nazarenec zval.
