Prilika od delavcev vu vinogradu. Svoje muke ipak nazvešča. Sine Zebedejuševe kara zbog oholnosti i vuči nje na poniznost i trpljivnost. Dvem slepem podeljuje vid.
- „Spodobno je Kraljestvo nebesko človeku, hižnomu gospodaru koj je v jutro rano izišel najimat delavcev vu svoj vinograd.
- Kad bi se pako z delavci za jeden desetak na dan bil pogodil, poslal je nje vu svoj vinograd.
- Izišel je pako i okolo tretje vure i videl druge na pijacu zahman stati
- i reče njim: ʻHote i vi vu moj vinograd i kaj bude prav, dam vam.ʼ
- Oni pako jesu odišli. Okolo šeste pako i devete je ipak izišel i včinil je jednakem načinom.
- I kad je okolo jedenajste vure izišel, našel je ipak druge stoječ i reče njim: ʻKaj stojite ovde ves dan mangujuči?ʼ
- Veliju njemu: ʻKajti nas nigdo ni najel.ʼ Reče njim: ʻHote i vi vu moj vinograd.ʼ
- Kad bi pako večer bil nastal, reče gospon svojemu vinograda opskrbitelu: ʻDozovi težake ter im daj plaču počemši od zadnjeh do prveh.ʼ
- Kad bi anda bili došli oni koji su okolo jedenajste vure bili najeti, dobili su vsaki po desetak.
- Kad bi pako i prvi bili došli, štimali su da več dobe, ali i oni su vsaki samo jeden desetak prijeli.
- I kad bi ga bili vzeli, morguvali su proti hižnomu gospodaru
- govoreči: ʻOvi zadnji jesu lestor jednu vuru delali ter si nje včinil jednake nam koji smo breme i vručinu dneva podnašali.ʼ
- On pako odgovori jednomu zmed njih i reče: ʻPrijatel, ne činim ti krivice. Je li se nesi za jeden desetak z menum pogodil?
- Vzemi kaj je tvoje ter othađaj. Hoču pako i ovomu zadnjemu tuliko dati kak i tebi.
- Ali ni meni slobodno včiniti kaj hoču? Kaj mora tvoje oko hudobno biti ako sem ja dober?
- Ovak budu zadnji prvi, a prvi zadnji. Ar vnogo je pozvaneh, ali malo izebraneh.ʼ“
- I kad bi Ježuš gore vu Jeruzalem bil išel, vzel je k sebi dvanajst vučenikov na otajnom i reče njim:
- „Nut, gore idemo vu Jeruzalem i Sin Človečji bude izdan aldovničkem poglavarom i piscom i budu ga na smrt opsudili.
- I budu ga izdali poganinom na osmehavanje i bičuvanje i raspinjanje i tretji dan gore stane.“
- Onda je k njemu pristupila mati sinov Zebedejušev z svojemi sinmi, moleča i proseča nekaj od njega.
- On reče njoj: „Kaj hočeš?“ Ona veli njemu: „Reci da ovi dva moji sini budu sedeli jeden na tvojoj desnoj, a jeden na levoj vu tvojem Kraljestvu.“
- Ježuš pako odgovorivši reče: „Vi ne znate kaj prosite. Je li morete piti on pehar kojega ja budem pil?“ Veliju njemu: „Moremo.“
- Reče njim: „Moj kelih zaisto budete pili, sedeti pako na mojoj desnoj ali levoj, ne stoji pri meni ovo vam dati, nego onem kojem je pripravljeno od mojega Oca.“
- Kaj kad bi oni deset bili čuli, rasrdili su se na dva brate.
- Ježuš pako pozove nje k sebi i reče: „Vi znate da poglavari narodov gospoduju nad njimi i oni koji su vekši, oblast zvršavaju zvrhu njih.
- Ali tak naj ne bude med vami, nego koj goder bude hotel med vami vekši postati, naj bude vaš službenik.
- A koj bude hotel med vami prvi biti, naj bude vaš sluga,
- kak goder Sin Človečji ni došel da bi se njemu dvorilo, nego da bi on dvoril i dal svoje živlenje na otkuplenje za vnoge.“
- Kad bi pako iz Jeriko bili van izišli, nasleduvala je njega vnožina ljudstva
- i, nut, dva slepci koji su kraj puta sedeli čuli su da Ježuš mimo prehađa i kričali su govoreči: „Gospone, ti Sin Davidov, smiluj se nam!“
- Ljudstvo pako je nje karalo da bi naj mučali. Ali oni z tem bolje jesu kričali govoreči: „Gospone, ti Sin Davidov, smiluj se nam!“
- I postal je Ježuš i nje k sebi pozval ter rekel: „Kaj hočete da vam včinim?“
- Veliju njemu: „Gospone, da se otpreju naše oči!“
- I smiluval se je njim Ježuš i doteknul se je njihoveh očih i sproti su pregledali i nasleduvali njega.
