Gdo je blažen. Apoštoli jesu svetlost i sol zemlje. Stalnost Zakona. Navuki i čini. Nova pravičnost. Ljubav i pomirenje. Lotrovanje vu srcu. Spehavanje oka. Nerazdružljivost hižnoga zakona. Radovoljno trplenje. Ljubav neprijatelov. Zvršenost.
- Kad bi pako Ježuš bil videl vnožine, izišel je na goru i poklamkam bi se bil vsel, pristupili su k njemu njegvi vučeniki.
- I otprl je svoja vusta i vučil nje govoreči:
- „Blaženi jesu vbogi vu duhu ar je njihovo Kraljestvo nebesko.
- Blaženi jesu krotki ar oni budu z zemljum ladali.
- Blaženi jesu oni koji se žaloste ar oni budu razveseljeni.
- Blaženi jesu oni koji gladuju i žeđaju za pravicom ar se oni zasitiju.
- Blaženi jesu milosrdni ar oni budeju zadobili milosrdnost.
- Blaženi jesu oni koji su čistoga srca ar oni budu Boga videli.
- Blaženi jesu mirni ar se budu zvali sini Božji.
- Blaženi jesu oni koji preganjanje trpiju zaradi pravice ar je njihovo Kraljestvo nebesko.
- Blaženi jeste vi kada vas ljudi preklinjali i preganjali i vsako zlo suprot vam govorili i lagali budu zbog mene.
- Veselete se i radujte se ar vaša plača je velika vu Nebesih. Ar ravno tak jesu preganjali proroke koji su pred vami bili.
- Vi jeste sol zemlje. Ako se sol skvari, z čem se bude solilo? K ničemu više ne valja, nego da se van hiti i od ljudih potlači.
- Vi jeste svetlost sveta. Varaš koj je na bregu postavljen ne more skriti.
- Niti ne vužižeju sveču ter ju pod polovnjak mečeju, nego na svečnjak da sveti vsem koji su vu hiži.
- Ovak naj sveti vaša svetlost pred ljudmi da vidiju vaša dobra dela i dičiju vašega oca koj je na Nebesih.
- Ne štimajte da sem došel zatirat Zakon ali proroke. Nesem došel nje zatirati, dapače ispuniti.
- Ar stanovito velim vam: doklam ne prejde Nebo i Zemlja, ne bude prešla jedna slova ali jedna piknica od Zakona dok se vsa ne ispuniju.
- Koj anda prekrši jednu zmed oveh zapovedih, akoprem najmenjšeh, i tak bude vučil ljudi, najmenjši se zval bude vu Kraljestvu nebeskom. Koj ju pako bude včinil i vučil, takov se bude velik zval vu Kraljestvu nebeskem.
- Ar velim vam: ako ne bude vaša pravica obilneša nego je piscev i farizejušev, ne zajdete vu Kraljestvo nebesko.
- Vi ste čuli da je rečeno starem: ʻNe vmarjaj! Koj pako vmori, krivec bude suda.ʼ
- Ja pako velim vam da vsaki koj se rasrdi na svojega brata, krivec bude suda. Koj pako reče svojemu bratu: ʻRakaʼ, krivec bude Spravišča. A koj reče: ʻTi šupeljakʼ, krivec bude ognja peklenskoga.
- Ako anda doneseš tvoj dar na oltar, pak se onde spomeneš da tvoj brat ima nekaj proti tebi,
- tak ostavi tvoj dar onde pred oltarom i hodi predi pomirit se z tvojem bratom i onda dojdi ter alduj tvoj dar.
- Z tvojem suprotivnikom naravnaj se hitro dok si z njim na putu da te morebiti suprotivnik ne preda sucu, a sudec te ne preda haharu i v temnicu se ne vržeš.
- Stanovito velim tebi: ne izideš odonud dok ne povrneš zadnji novec.
- Vi ste čuli da je rečeno starem: ʻNe praznuj!ʼ
- Ja pako velim vam da vsaki koj pogleda ženu da nju poželji, vre je praznil z njum vu svojem srcu.
- Ako tebe tvoje desno oko spačuje, spehni nje i hiti od sebe ar je tebi bolje da se pogubi jeden zmed kotrigov tvojeh kak da bi se tvoje celo telo vrglo vu pekel.
- I ako tebe tvoja desna ruka spačuje, odseči nju i hiti od sebe ar je tebi bolje da se pogubi jeden zmed tvojeh kotrigov kak da bi tvoje celo telo dospelo vu pekel.
- Rečeno je pak: ʻKoj otpusti od sebe svoju ženu, naj njoj da raspitni list.ʼ
- Ja pako velim vam da vsaki koj otpusti od sebe svoju ženu, zvun zbog lotruvanja, včini da ona prazni. I koj otpuščenu vzeme za ženu, lotruje.
- „Ipak jeste čuli da je rečeno starem: ʻKrivo ne prisigaj, budeš pako Gosponu tvoje prisege držal.ʼ
- Ja pako velim vam: nikak najte prisigati! Niti po Nebo, ar ono je stolica Božja,
- niti po Zemlji, ar ona je potpetek njegveh nog, niti po Jeruzalemu, ar on je varaš velikoga Kralja.
- Niti na tvoju glavu ne prisigaj kajti ti niti jeden las bel ali črn ne moreš včiniti.
- Vaše pako govorenje naj bude: ʻJe, je – ne, ne!ʼ Kaj je pako več od oveh, od Zloga je.
- Vi jeste čuli da je rečeno starem: ʻOko za oko, zub za zub.ʼ
- Ja pako velim vam: ne suprotstavljajte se zlu, nego ako te gdo vudri na tvoje desno lice, podaj mu i drugo.
- I hoče se gdo s tobum na sudu pravdati i tebi tvoju halju vzeti, otpusti njemu takaj plašč.
- I koj goder tebe bude iti prisilil jednu milju dalko, ti hodi z njim dve milje.
- Koj te prosi, daj mu i koj hoče od tebe na posudbu vzeti, naj mu skratiti.
- Vi jeste čuli da je rečeno: ʻLjubi bližnjega tvojega i odurjavaj neprijatela tvojega.ʼ
- Ja pako velim vam: ljubete vaše neprijatele, dobro činete onem koji vas odurjavaju i molete za one koji vas preganjaju i opšanjuju
45 da budete sini vašega Onca koj je v Nebesih, koj svoje Sunce ishađati pušča zvrhu dobreh i hmanjeh i daje dežđa zvrhu pravičneh i nepravičneh.
- Ar ako vi one ljubite koji vas ljubiju, kakvu plaču budete imali? Ne li to isto činiju takaj publikanuši?
- I ako vi samo vaše brate pozdravljate, kaj obilnoga včinite? Ne li to isto činiju takaj poganini?
- Budite anda zvršeni kak je vaš Otec nebeski zvršen.“
