Svetoga Petra apoštola list prvi — Del IV.

Pokehdob anda Krištuš vu telu je trpel,^* tak se z ovem istem mišlenjem oboružete^* kajti koj trpi vu telu, on prestaje grešiti,^*
tak da on^* to ostalo jošče vreme vu telu^* več ne žive poleg človečanskeh poželenjih, nego poleg Božje volje. Efez 4,23.
Ar zadosta je da oni^* prešesno živlenja vreme jesu sprevađali po volji poganinov, oni koji jesu živeli vu nečistoči, poželenjih, pijanščinah, ožiranju, opijanju i neslobodnem bolvanomolstvu.
Zato se oni i čudiju da vi z njimi v red ne bežite vu onu istu praznosti zmutnju i (zato) vas oni blazniju.
Ali oni budeju morali račun dati onomu koj je pripraven suditi žive i mrtve^*
ar zato je bil takaj mrtvem nazveščen Evangelijum, tak da se oni doisto pred ljudmi sudiju biti vu telu, pred Bogom pako živeju primerom duha.^*
Vseh pako stvarih je se približal konec!^* Budite anda pametni i skoznujte vu molitvah! Luk 21,36.1; Jan 2,18.
Pred vsem pako ljubete se med sobum ar ljubav zakriva vnožinu grehov.^* Prir 10,12.
Jeden drugoga prijemljite na stan prez morguvanja! Rim 12,13,17; Filip 2,14.
Jeden drugomu služete, vsaki z miloščum koju je prijel kakti dobri razdeljitelji vnogovrsneh božanskeh milošč. Rim 12,6.
Ako gdo vuči, tak naj vuči poleg Božje reči, ako gdo ima službu, tak nju naj obnaša kakti iz kreposti koju podeljuje Bog:^* da se vu vseh stvarih diči Bog po Ježušu Krištušu^* kojemu budi dika i gospodstvo od veka do veka. Amen!
Preljubljeni, naj se vam ne vidi čudno kada vas pečeju nevolje z kojemi budete skušavani kak bi se vam kaj novoga događalo!
Dapače, veselete se pokehdob jeste delniki Krištuševeh trplenj da se takaj vi pri očituvanju njegve dike^* morete veseliti i raduvati.
Blaženi jeste ako se opšanujete zaradi Krištuševoga imena^* ar poštenje, dika, božanska krepost i njegov duh počiva nad vami.^*
Zmed vas pako naj nigdo ne trpi kakti ljudomorec ali tat ali preklinjavec^* ali ludskoga blaga poželjitel.^*
Ako pako on trpi kakti krščenik,^* tak se naj ne sramuje. Dapače, naj diči Boga vu ovem imenu!^*
Ar je vreme da se sud započme od Božje hiže.^* Ako se pak on najprvič pri nas započimlje, kakov konec bude oneh koji ne veruju Božjemu evangelijumu?
I ako se pravični komaj zveliči, gde se bude mogel nepobožni i grešnik kazati?^* Prir 11,31.
Zato takaj moraju oni koji poleg Božje volje trpiju, svoje duše Bogu kakti vernomu Stvoritelu po dobreh delih preporučati.^*

Objašnjenje

*
Vu grčkem: za nas vu telu itd. Ovde se apoštol povrača na 18. red prvešega dela, medtemtoga ovde iz toga ispeljava drugo sledenje. Gore je Krištuševo trplenje naprvo postavil za temelj zakaj takaj mi nezaslužene nevolje moramo trpljivno podnašati, ovde on nad Krištuševem telovnem trplenjem i vumiranjem temelji krotenje našeh telovneh pohotnostjah, hmanjeh, navlastito vu našem telu prebivajučeh poželenj. ↩︎
*
Tak takaj vi stalno dokončajte primerom tela trpeti po obladanju hmanjeh poželenj. ↩︎
*
Ar koj na se jemlje trplenje da svoja hmanja poželenja na križ raspne i njim se odgovori, on več ne greši doklam ovomu namenenju veren ostaje. ↩︎
*
Vu grčkem: tak da vi več ne živete itd. ↩︎
*
Živlenje vu telu na Zemlji. ↩︎
*
Vu grčkem: mi. ↩︎
*
Ravno tak one jošče na Zemlji živuče, kak takaj one koji vre jesu vumrli akoprem veseljih nezasitni poganini štimaju da se z ovem živlenjem vsa dokančaju ter da se preminuči več nikakvoga suca nemaju bojati. ↩︎
*
Ar ravno kajti je jošče jedno drugo živlenje, je bilo takaj preminučem dušam vu pretpeklu nadojduvšega zveličenja veseli glas nazveščen tak da preminuči doisto poleg onoga, neg samo človečanskoga, poganinskoga namenenja, moreju se premišljavati kak da bi samo struhljivo telo bili, oni vendar pred Bogom akoprem primerom tela jesu mrtvi, primerom duha jesu živi. Ovde se apoštol preteže na one vu 3. delu 19. i 20. redu spomenjene preminuče koji primerom tela jesu vumrli, primerom pako duše jesu ostali živi. ↩︎
*
Ov Sud (red 5.) pako, z kojem je združen ovoga sveta konec, je se približal, je gledeč na vreme vre bliže došel. ↩︎
*
Ljubav je vsigdar pripravna pomenjke bližnjega oprostiti makar bi jošče tulike bile. Ali naša ljubav zakriva pri Bogu naše pomenjke. ↩︎
*
Verno, nakuliko je moguče i primerom vlečenja božanske milošče. ↩︎
*
Da vse neg samo na odičenje Boga služi kaj se po Ježušu Krištušu nad nami i vu nas opravlja. ↩︎
*
V. gore 1, 7. ↩︎
*
Kakti krščeniki, za volju krščanskeh namenenj. ↩︎
*
Ar vu krščanskem namenju imate vi duha koj je zalog vaše buduče časti i dike (Rim 8,11,12; Efez 2,18; Tesal 4,8). Vu grčkem jesu jošče ove reči pridane: „koj se po njih blazni, po vas pako časti“. ↩︎
*
Vu grčkem: hudodelnik. ↩︎
*
Vu grčkem: puntar opčinskoga mira. Znamenuvanje: samo naj nigdo sam sebi ne privlači zasluženo trplenje. ↩︎
*
Nedužno kajti je krščenik ↩︎
*
Naj diči Boga da je ovo ime zadobil. Vu grčkem: Boga vu toj stranki. ↩︎
*
Trplenja zaradi krščanstva moraju sada nadojti ar sada je vreme vu kojem se ovo mora vu svet vpeljati. Ništar manje to se drugač ne more opraviti kak po vnogovrsneh borenjih pokehdob se svet njemu iz vseh močih bude suprotstavljal i preganjal one koji nje valuju. Anda mora sud, trplenje, pregoni, nesreča najprvič zvrhu Božjega kaljestva, Cirkve nadojti. Zadnjič bude stignula kaštiga njegve neprijatele, neverne. Reč „ar“ preteže se na 12. red. Ne dajte se po trplenjih zbluditi vendar sada je vreme da morate po traplenjih pohađani i zveđani biti. Reč „sud“ stoji ovde vu dvojvrsnem znamenuvanju: gledeč na krščenike koji nedužno trpiju, stoji namesto nesreče da Bog ovakva skušavanja prepušča. Gledeč pako na neverne, stoji namesto kaštige dopitanja. ↩︎
*
Ako pravični neg samo z velikem trudom vu podnašanju vnogeh suprotivčin moreju zadobiti vekivečno blaženstvo, tak anda gde bude nepobožni, kada zvrhu njega nadojde kaštiga, segurno našel vtekališče? Ovde je vzeta pelda od hudodelnika kojega kaštiga povsud preganja i koj nigdi ni za svoje živlenje seguren. ↩︎
*
Nedužno kakti kršeniki, ne zaradi zločinstvih. ↩︎