Arhive: Poglavlja (Page 1 of 30)

1. Spomenek Jozije je kakti zmožno kadilo koje začimbar iz dišučeh stvarih je napravil.
2. Dapače, spomenek njegov je vu vsakeh vust sladek kakti med i kakti složnoglasje pri vinskem goščenju.
3. On je bil od Boga postavljen da bi ljudstvo k pokori pripeljal i odurnost nepobožnosti odnel.
4. On je srce svoje k Gosponu ravnal i vu dnevih grešnikov objačil pobožnost.
5. Vsi (kralji) zvun Davida, Ezekijaša i Jozija jesu greh (bolvanomolstva) činili
6. Ar kralji od Judeje jesu zapustili zapoved Višnjega i strah Božji zametavali.
7. Pokehdob su kraljestvo svoje drugem (Kaldejancem) dali i diku svoju tuđemu narodu.

[…]

1. I vstal se je Elijaš prorok kakti ogenj i reč njegova je gorela kakti baklja.
2. I vpeljal je na nje glad i pokehdob su njega z nenavidnostjum svojum razdražili, je njih malo postalo ar oni nesu mogli zapovedi Gosponove podnašati.
3. Z rečjum Božjum je zdržal nebo i trikrat je ogenj iz neba dole hitil.
4. Tak je Elijaš po čudačinih svojeh glasovit postal. I gdo se more tak hvaliti kak ti (Elijaš).
5. Koj si po reči Gosponovi mrtvoga iz glibljine i smrtne oblasti otel.
6. Koj si kralje vu pogublenje ishitil i moč njihovu zevsema lehko zatrl i glasovite iz postelje njihove (zvrgel).
7. Koj čuješ na gori Sina kaštiganje i na gori Horeb sud fančenja.
8. Koj mažeš kralje na pokorjenje i proroke činiš namesnike za tobum.
9. Koj si v vihru ognjenem i na vozu z konji ognjenemi proč vzet.
10. Koj si postavljen bil ob vremenu svojem po kaštiganju srditost Gosponovu vtišiti, srce očevo z sinom pomiriti i pokolenja Jakopova opet vstanoviti.
11. Blaženi jesu koji jesu (i budu) tebe videli i koji su bili (ter budu) z prijatelstvom tvojem odičeni jesu.
12. Ar mi lestor vu ovem živlenju živemo, po smrti pako ne bude tak ime naše živelo.
13. Elijaš bil je doisto z vihrom pokrit, ali Elizejuš bil je z duhom njegovem napunjen, vu živlenju svojem ne se poglavara vstrašil i nigdo ni bil mogučneši kak on.
14. Niti nikakova reč ni njega obladala i mrtvo telo njegovo je prorokuvalo.
15. Vu živlenju svojem je strašila činil i po smrti čuda opravljal.
16. Vu vseh oveh ne se kajalo ljudstvo i nesu odstupili od grehov svojeh dok su bili iz zemlje svoje ishičeni i po vsem svetu raspršeni
17. i ostavljeno je ljudih maloi poglavar vu Davidovi hiži.
18. Nekoji zmed njih jesu činili kaj se je Bogu dopalo, drugi pako vnoge včinili jesu grehe.
19. Ezekijaš ogradil je varaša svojega z tvrdnem zidom i kopal pečinu z železom i zezidal je za vodu zdenec.
20. Vu dnevih njegoveh izišel je Senakerib i poslal je Rabsacena i podignul.
21. Onda su strepela srca njihova i ruke njihove i tuguvali su kakti porodne žene.
22. I zazivali su Gospona milostivnoga i pretegnuvši ruke svoje, zdignuli su je proti nebu i sveti Gospon Bog hitro je posluhnul glas njihov.
23. Ne se spominal iz grehov njihoveh niti je ni predal neprijatelom njihovem, nego je nje po ruki svetoga proroka Izaijaša očistil.
24. Razmetal je šatore asirijanske i angel Gosponov je nje zatrl.
25. Ar Ezekijaš je včinil kaj se je Bogu dopalo i objačeno je hodil po putu Davida, oca svojega, kak mu je zapovedal Izaijaš, velik i veren prorok vu nazočnosti Boga.
26. Vu dnevih njegoveh išlo je Sunce nazad i kralju je bilo živlenje podugšano.
27. On (Izaijaš) je z velikem duhom videl poslednja i batrivel je tugujuče v Sionu. Tja do veka.
28. Pokazal je buduča i zakrita predi nego su se pripetila.

1. Zatem podignul se je Natan prorok vu dnevih Davidoveh.
2. I kak se tušča od mesa odlučuje, tak je bil David izmed sinov izraelskeh (odlučen).
3. V mladosti svoji igral se je z oroslani kakti z kozliči i z medvedi je ravno tak činil kakti z janjci ovčemi.
4. Je li ni Golijata vubil i sramotu od ljudstva svojega odnel?
5. On je ruku svoju zdignul i je z kamenom iz preče oholnoga Golijata vubil
6. ar zazval je vsamogučega Gospona i dal je v desnicu njegovu moč da je jakoga človeka na boj dole složil i izvisil moč ljudstva svojega.
7. Zato je njega (ljudstvo) kakti obladavca deset jezer ljudih velikodičilo i njega zaradi blagoslovov Gosponoveh hvalilo kada je (Gospon) njemu dike korunu dal
8. ar zatrl je vse neprijatele povsud i Filistijance, koji su tja do denešnjega dneva suprotivniki, skončal i moč njihovu tja zanaveke zatrl.
9. Za vsako delo je Svetomu i Višnjemu z dičnum rečjum hvalu dal.
10. Gospona je iz celoga srca hvalil i Boga stvoritela svojega ljubil i dal je njemu proti neprijatelom oblast,
11. on je takaj pevce pred oltar postavil ter je pustil da su po glasu svojem vugodne pesme spevali.
12. On je naredil da su se svetki zmožno opslužavali i da su se do konca živlenja njegovoga lepo obdržavali letni svetki z hvalenjem imena Gosponovoga i z juternjem izvišavanjem svetosti Božje.
13. Gospon je grehe njegove očistil i čar njegovu zanaveke izvisil i naredil je z njim zaveza da kraljestvo i stolica dike naveke vu Izraelu ostane.
14. Za njim vstal se je njegov mudri sin i zaradi njega je (Bog) vsu mogučnost neprijatelov rashital.
15. Salamo je v mirnem vremenu kraljuval, kojemu Bog vse neprijatelje pothitil da bi imenu njegovomu hižu zezidal i svetotajstvo zanaveke napravil kak si ti (Salomon) v mladosti tvoji podvučen bil
16. i bil si kakti potok z mudrostjum napunjen i duša tvoja^*16. je zemlja (z mudrostjum) pokrita. je sve otkrila kaj je na Zemlji.
17. I napunil si z prispodobami zganjke, tja do međimorjih daleko je ime tvoje razglašeno i zaradi mira tvojega jesi ljubljen.
18. Zemlje čudile su se zvrhu tvojeh pesmih i prirečjih i prispodobih i razlaganjih
19. i vu imenu Gospodina Boga, kojemu pridovek je Bog Izraela,
20. ti si zlata tuliko skup zebral kakti brunca i srebra tuliko skup spravil kakti kotlovine
21. i prignul si boke tvoje k ženam i vzel si jesi oblast zvrhu tela tvojega.
22. Ti si diku tvoju pogrdeli seme tvoje oskrunil i zaradi toga si zvrhu dece tvoje srditost privlekel i kaštiganje zaradi bedastoče tvoje
23. pokehdob si včinil da je kraljestvo razdvojeno bilo i da je Efrajim tvrdo kraljestvo postalo.
24. Bog pako ne bude zapustil milosrdnost svoju i ne budepokvaril niti pogubil dela svoja niti zatrl z korenikum vnuke izebranoga svojega i seme onoga koj ljubi Gospona ne bude skončal.
25. Ostanek pako je začuval Jakopu i Davidu od korenike njegove.
26. I dokončal je Salomon živlenje svoje z oci svojemi.
27. I ostavil je za sobum od semena svojega naroda bedastoču
28. i pomenjšanoga vu razumnosti Roboama koj je po svojem (nespametnem) tolnaču ljudstvo od sebe odvrnul
29. i Jeroboama, sina Nabatovoga, koj je Izraela v greh zapeljal i Efrajimu puta k grešenju otprl da se kruto povnožali jesu grehi njihovi.
30. Zaradi kojeh su oni daleko iz zemlje svoje pregnani bili.
31. I iskavali suvsake fele hudobnosti doklam je zvrhu njih fančenje došlo ter je vsem grehom njihovem konec včinjen bil.

Objašnjenje

• *
  16. je zemlja (z mudrostjum) pokrita.

1. Ježuš Nave (to je Jozue), jak vu boju, naslednik Mojžešev vu prorokih, koj je bil po imenu svojem velik,
2. najvekši vu tom da je izebrane Boga oslobodil, neprijatele koji se podignuli jesu obladal da bi prijel odvečtvo Izraela.
3. Kakovu diku je zadobil kada je ruke svoje podigaval i meča proti varaša pretezal?
4. Gdo se je pred njim tak suprotstavil? Ar sam Gospon je njemu neprijatele vu ruke predal.
5. Je li ni po srditosti njegovi Sunce vstanovljeno bilo i jeden dan bil je dug za dva druga?
6. Zazval je Višnjega i najmočnešega kada su ga neprijateli od vseh stran opstirali i poslušal je njega veliki i sveti Bog da su kruto jaki kameni tuče padali.
7. Nadskok je bil včinjen proti narodom neprijatelskem i suprotivnike koji su nadol išli potukel
8. da bi spoznali narodi moč njegovu kajti proti Bogu vojuvati ni lehko. On je zmir za Vsamogučem hodil
9. i vu dnevih Mojžeša včinil je milosrdnost on sam i Kaleb, sin Jefonov, stali su neprijatelu suproti i ljudstvo od grehov zdržali i hmanje mrmranje vtišili.
10. Ovi dva, koji su sami zmed šesto jezer pešcov opčuvani bili, jesu izebrani bili nje vu Obečanu zemlju peljati, vu zemlju koja mleko i medtoči.
11. I dal je Gospon Kalebu istomu jakost i tja do starosti ostala je njemu moč da je gore išel na visoko mesto zemlje koju je seme njegovo za odvečtvo dobilo
12. da bi vsi sini izraelski videli kak dobro je Bogu svetomu pokornomu biti.
13. Takaj su suci bili vsaki po imenu svojem, kojeh srce ni bilo spačeno, koji takaj od Gospona nesu odstupili
14. da bude spomenek njihov vu blagoslovu i kosti njihove naj se iz pokopalščih njihoveh zelene
15. i ime njihovo naj ostane naveke i dika ljudih sveteh naj nad sinmi njihovemi ostane.
16. Samuel, prorok Gosponov, od Boga Gospona svojega ljubljen, ponovil je ladanje ter je poglavare med ljudstvom svojem (z oljem svetem) namazal.
17. On je čete poleg zapovedi Gosponove sudil i Bog se je na Jakopa zaradi njega dobrotivno ogledal i vu veri svojoj bil je iskušan prorok.
18. I znajđenje bil vu rečih svojeh veren ar videl je Boga svetlosti
19. i zazval je Vsamogučega Gospona med alduvanjem janjca prez znamenjke kada su njega vu okrug stoječi neprijateli od vseh stran stiskali.
20. I zagrmel je Gospon iz Nebes i z šumom velikem čujenoga je včinil glasa svojega
21. i potukel je poglavare Tirijancev i vse vođe Filistejancev,
22. predi nego je živlenje svoje dokončal ter se od sveta odlučil, je pred Gosponom i (Saulom) njegovem z kraljevskem oljem pomazanomu svedočil da ni od nijednoga človeka penez niti dapače cepeliše vzel, nego niti nijeden človek ni ga optužil.
23. I zatem je zaspal i obznanil kralju ter nazvestil konec živlenja njegovoga i podignul je glasa svojega iz zemlje prorokujuči da bude nepobožnost ljudstva skončana.

[….]

16. Z njim ni bil nigdar tuđina oblečen, negdo lestor sami sini njegovi i vnuki njegovi čes vsa vremena.
17. Aldove njegove je ogenj vsaki dan požigal.
18. Mojžeš je ruke njegove ispunil i njega z svetem oljem pomazal.
19. Z njim je zavez vekivečni načinjen i z semenom njegovem doklam neba dnevi stoje da bude (on i seme) redovničtva službu opravljal, hvalu spevali i ljudstvo njegovo vu imenu njegovem blagoslavljali.
20. Njega je zmed vseh živučeh izebral da bi Bogu aldove alduval, kadilo, dobru dušu da bi se on iz ljudstva svojega spomenul i njemu milostiven bil,
21. dal je njemu oblast obznanuvati zapovedi njegove i dužnost zaveza da bi Jakopa svedočanstva njegova vučil i Izraela vu Zakonu njegovem rasvetil.
22. Pokehdob se tuđine proti njemu podignuli jesu i zaradi nenavidnosti opstrli su njega ljudi vu puščini koji su bili z Datanom i Abironom i skupčina Koreova vu srditosti.
23. Gospodin Bog je to videl i ni mu se dopalo i bili su vu silnoj srditosti požrti.
24. Činil je nad njimi strašna čuda i skončal je nje z plamnom ognjenem.
25. I pridal je Aronu jošče vekšu diku i dal mu je odvečtvo i prvine sada zemeljskoga je njemu odlučil.
26. On je njim (Aronu i drugem redovnikom) po prvini obilno kruha pripravil ar takaj od Gosponoveh aldovih jesu jeli koje je on njim i semenu njihovomu dal.
27. Ali njemu ni bilo odvečtvo vu zemlji narodov niti ni del med narodom odlučen ar on sam (Gospon) je bil njegov del i odvečtvo.
28. Finejes, sin Elejazarov, je bil tretji vu časti nasledujuč njega (Arona) vu strahu Gosponovem,
29. On je pri nesramneh delih ljudstva negenjen ostal, po svojem dobrem i gorečem srcu je Izraela z Bogom spravil.
30. Zato je (Bog) z njim zavez mira načinil, njega za poglavara sveteh i ljudstva svojega napravil da bi pri njem i pri semenu njegovem čast redovničtva vekoma ostala,
31. takaj je zaveza načinil z Davidom kraljem, sinom Jese iz pokolenja Judaševoga, (da bi kraljestvo bilo) njemu i semenu njegovem za del odvečtva, da bi dal mudrost v srce naše za pravično suditi ljudstvo njegovo, da ne bi se blago njihovo dokončalo i diku njihovu je vu narodu njihovem vekivečno včinil.

1. O, smrt, kak žuhek je spomenek tvoj človeku koj se imetka svojega vu miru vživa,
2. človeku pokojnomu i kojemu vu vseh dobro ide i koj jošče jesti more!
3. O, smrt, kak dober je sud tvoj človeku koj je v potrepčini i koj se pomenjšava vu močih,
4. koj je star i vsake fele skrbi ima i je nezaufan ter je trpljivnost pogubil!
5. Ne boj se suda smrtnoga. Spomeni se kaj je bilo pred tobum i kaj za tobum bude došlo, ovo je sud od Gospona zvrhu vsega mesa.
6. I kaj se tebi poleg dobre volje Višnjega bude zgodilo? Ali deset ali sto ali jezero let.
7. Ar v grobu se ne pita od živlenja (kak dugo je gdo živel).
8. Sini odurnostih bivaju sini grešnikov, ravno tak takaj oni koji se vu hižah nepobožneh gusto nahađaju.
9. Sinov grešneh odvečtvo bude poginulo, a z semenom njihovem bude vsevdiljna opšanost.
10. Zvrhu oca nepobožnoga tužiju se sini pokehdob zaradi njega jesu opšanjeni.
11. Jaj si ga vam, nepobožni ljudi, koji ste zapoved Višnjega Gospona zapustili.
12. Kada budete rođeni, budete v prokletstvu prijeti i kada vumrete, bude prokletstvo del vaš.
13. Vsa koja su iz zemlje, na zemlju se obrnula budu, tak ideju nepobožni iz prokletstva vu pogublenje.
14. Zvrhu ljudih se žaluje pri truplu njihovem (kada bude pokopano) ime pako nepobožneh bude pozabljeno.
15. Skrb imaj za dobro ime tvoje ar ovo bude tebi bolje stalno ostalo kak jezera drageh i velikeh kinčev.

[….]

1. Zabavlanje veliko je vsem ljudem napravljeno i jarem težek je nad sinmi Adamovemi od dneva ishoda njihovoga iz vutrobe materinske tja do dneva pokapanja v (zemlju) mater vseh ljudih.
2. (Skrbi pune) misli i strahi srca domišlavanje budučeh i dan smrti,
3. tak sedečemu zvrhu slavne stolice kak poniženomu v prahu i pepelu,
4. tak oblečenomu z višnjovum svilum i z korunum na glavi kak odevenomu z debelem platnom ljutost, nenavidnost, bučenje, nestalnost i smrtni strah, srdenje stalno i svadenje
5. i vu vremenu pokoja vu spalnici senj nočni izmenja razum njegov.
6. Malo i skoro nikaj ne počiva i kada je vu snu kak da bi po dnevu okolo gledal.
7. On je prestrašen zaradi viđenja srca svojega kakti on koj je na dan boja pobegnul. Kada se vstane, zvun pogibeli se znajde i čudi se da ono kaj se bojal nikaj ni bilo.
8. Tak se godi z vsem mesom, od človeka tja do živine, ali grešniku sedemkrat več.
9. Zvun toga smrt, krvi prelevanje, svađe i meč, stiskanje, glad, skrušenje i bičuvanja:
10. vsa ova jesu zaradi grešnikov načinjena i zaradi njih bil je potop včinjen.
11. Vsa koja su od zemlje, na zemlju preobrneju se i vse vode povrneju se v morje.
12. Vsako (krivično) daruvanje i krivičnost bude skončana, a vera naveke ostane.
13. Krivičneh blago bude kakti potok vsehnulo i bude kakti velika grmljavica koja med dežđem buči.
14. Oni budu veseli kada budu ruke svoje (na daruvanje) otprli, ali (takovi) prekršiteli budu k poslednjemu konec vzeli.
15. Vnuki nepobožneh ne budu vnogo odrastkov imeli i oni jesu kakti nečista korenja koja vrh pečine ropočeju.
16. Trava koja pri vsakoj vodi i vuz kraj potoka raste bude predi pokošena kak vsa druga trava.
17. Dobrotivnost je kakti raj vu blagoslovih i milosrdnost naveke ostane.
18. Živlenje delavca koj zaslužbum svojum za dobro vzeme je slatko i ti budeš v takovem (živlenju) kinča našel.
19. Sine, imeti i varaša izidati čini vekivečni spomenek, ali poštena žena več kak obodvoje.
20. Vino i složnoglasje razveseluje srce, ali ljubav proti mudrosti več kak obodvoje.
21. Piščale i šoltarnica skupa vugoden glas delaju, ali zvrhu obodvojega jezik sladek.
22. Oko tvoje rado gledi kaj je ljubeznivoga i lepoga, ali zelenu setvu rajši kak obodvoje.
23. Prijatel i tovaruš pomagaju si jeden drugomu vu vremenu traplenja, ali muž i žena bolje kak obadva.
24. Bratja si vu vremenu traplenja pomagaju, ali milosrdnost bude bolje kak oni oslobodila.
25. Zlato i srebro potvrđavaju noge, ali zvrhu obodvojega dober tolnač.
26. Bogatstvo i kreposti izvišavaju srce, ali vnogo bolje strah Gosponov.
27. Strahu Gosponovomu nikaj ne menjka i njemu ni potrebno druge pomoči iskati.
28. Strah Gosponov je kakti raj blagoslovljen i zvrhu vsake dike pokriva njega.
29. Sinko, doklam živeš, čuvaj se potrepčine ar bolje je vumreti kak (iz lenosti) potrepčinu imeti.
30. Človek koj se na ludski stol zanaša, ne misli živlenje svoje z svojum hranum zdržavati ar on dušu svoju z ludskemi jestvinami hrani.
31. Razumen pako i podvučen človek čuva se (pred tem).
32. Vu vustih nerazumnoga je pomenjkanje slatko, ali vu trbuhu njegovem bude ogenj gorel.

1. Muder bude mudrost vseh starinskeh izveđal i zadržaval se bude vu prorokih.
2. On bude govorenje glasoviteh ljudih opčuval i skrovnosti prirečjah pregledaval.
3. Skrovna prirečjah bude izveđal ter se vu otajnosti izgovorov zvršaval.
4. Vu sredini velikašev bude dvoril i pred nazočnostjum predsednika pokazal se.
5. Zemlje tuđin bude ophađal i bude dobro i zlo med ljudmi skušaval.
6. Srce svoje bude povda[l] za skoznuvati osvitoma k Gosponu koj stvoril je njega i vu nazočnosti Višnjega bude molil.
7. Otpre vusta svoja vu molitve i za grehe svoje prosil bude.
8. Ar ako Gospon veliki bude hotel, z duhom razumnosti napuni njega
9. i on kakti dežđe spuščal bude govorenja mudrosti svoje i vu molitve hvalil bude Gosponu
10. i on ravnal bude tolnač njegov i navučanje i vu otajneh njegoveh svetuval mu bude.
11. On bude na znanje dal podvučanje koje je navučal i vu zapovedi Zakona Gosponovoga dičil se bude.
12. Hvalili budeju vnogi mudrost njegovu i tja doveka ne izbriše se.
13. Ne prejde spomenek njegov i ime njegovo iziskavalo se bude od pokolenja do pokolenja.
14. Mudrosti njegove pripovedali budu narodi i hvalu njegovu nazveščala opčina.
15. Ako ostane (pri živlenju), bude vekše ime zapustil kak jezero drugeh i ako počinul bude, dobro bude za njega.
16. Budem se jošče premislil da bi jošče kaj povedal ar sem kakti goruče želje pun.
17. Vu glasu veli: „Posluhnete mene, vi Božji rod, i doprinašajte sad kakti vuz potokov zasađena roža.
18. I dajte kakti Liban vugodnu duhu.
19. Cvitajte kakti lilijum i davajte duhu od sebe i zelenete lepo i pojte zahvalnu pesem i blagoslovete Gospona vu delih njegoveh.
20. Velikodičete ime njegovo i hvalete ga z glasom vust vašeh i z pesmami vusnic i z citarami i kada ga hvalite, recete:
21. ʻVsa dela Gosponova jesu prav dobra.
22. Na zapoved njegovu je voda kakti zid stala i na reč vust njegoveh je bila kakti vu vodenem koritu.ʼ
23. Ar za zapoved njegovu zgađa se kaj mu se dopada i na pomoči njegovoj ni pomenjkanja.
24. Vsako delo človečansko je pred njim i pred očmi njegovemi ni nikaj skritoga.
25. Od veka do veka vsa vidi i vu očih njegoveh nikaj ni čudnovitoga.
26. Ne mora reči: „K čemu je to?“ ali: „K čemu je ono?“ ar se vsa ob vremenu svojem budu pokazala.
27. Blagoslov njegov kakti potok je poplavil.
28. Kak je zemlju z potopom zlejal, ovak je srditost njegova del odvečtva narodom koji ga nesu iskali.
29. Kak je vode v sušu premenil, i posušila se je zemlja i kak su puti njegovi putom njihovem ravni, tak su grešnikom po srditosti njegovi popiknenja.
30. Kak je otpočetka za dobre dobro stvorjeno, tak su za najhmanješe dobra i zla.
31. Za živlenje človečansko osebujno potrebne stvari jesu voda, ogenj, železo, sol, mleko, pšenični kruh, med, grozdje, olje i oprava.
32. Kak goder vsa ova svetem na dobro, tak takaj nepobožnem i grešnikom na zlo obračaju se.
33. Jesu duhi koji su na fančenje stvorjeni i vu ljutosti svojoj potvrđavaju muke njihove
34. I vu vremenu skončanja budu moč svoju izdali i budu ljutost onoga koj je nje stvoril vtišili.
35. Ogenj, tuča, glad i smrt: vsa ova jesu za fančenje stvorjena.
36. Zubi ljute zverine i ščipavci, kače i meč je k fančenju na skončanje nepobožneh.
37. Vsa ova z veseljem zapovedi Božje ispunuju i pripravljena su na Zemlji za potreboču i ob vremenu svojem ne budu prekršila reč.
38. Zato sem vre zdavna tvrdno dokončal i pretresel ter premislil i pismeno van dal.
39. Vsa dela Gosponova jesu dobra i on bude vsako delo ob vremenu svojem na hasen obrnul.
40. Ne sme se reči: „Ovo (delo) je gorše kak ono“ ar vsa budu ob vremenu svojem za dobra znajđena.
41. Zato sada z celem srcem i z vustmi hvalete i blagoslavljajte ime Gosponovo.

[….]

9. Sinko, ne zapusti samoga sebe vu betegu, nego prosi Gospona i on te bude ozdravel.
10. Odvrni se od greha i ravnaj ruke ter od vsakoga pregrešenja očisti srce tvoje.
11. Alduj dobro dišeče kadilo i čistu pšeničnu melju na spomenek i včini masten aldov i potlam pozovi vračitela
12. ar Gospon je njega stvoril i ne pusti ga od sebe doklam pomoči njegove potrebuješ.
13. Pokehdob dojde vreme ob kojem njim (vračitelom) vu ruke dospeš,
14. oni pako budu Gospona prosili da bi on počinek njihov i ozdravlenje ravnal zaradi službe svoje.
15. Koj greši vu nazočnosti onoga koj ga je stvoril, opal bude vu ruke vračitela.
16. Sinko, nad mrtvecom toči suze i počmi se plakati kakti da bi se bilo kaj zla pripetilo i pokopaj truplo njegovo po navadi i ne pusti pokop njegov v nemar.
17. Da se pako od tebe ne bude zlo govorilo, žuhko se žaluj zaradi njega jeden dan i potlam žalost tvoju vtiši.
18. I da se ne bude zlo od tebe govorilo, žaluj se jeden dan ali dva poleg zasluženja njegovoga (i nikaj ne delaj)
19. ar žalost doprinaša hitru smrt i oslabi moč i žalost srca i zvine vrata.
20. Žalost samočnomu ostane i živlenje potrebnoga je poleg srca njegovoga.
21. Naj žalost srce tvoje ne prevzeme, nego ju odganjaj od tebe i spomeni se iz poslednjih.
22. Ne spozabi ar (mrtvomu) ni več povračka i njemu (z žalostjum) nikaj ne pomoreš, sam sebi pako veliku škodu činiš.
23. Spomeni se iz suda mojega ar ovak bude takaj tvoj: včera meni, a tebi denes.
24. Kada mrtvec počiva, pusti takaj spomenek na njega počivati i batrivi njega vu ishađanju duha njegovoga.
25. Pisarova mudrost dobiva se ob vremenu pokoja i koj malo opravkov ima, bude mudrost zadobil; z kakovum mudrostjum bude napunjen
26. koj drži plug i rad z bičom vole goni ter nje z šilom zbada i z delom se njihovem zabavlja ter ne zna od drugoga kak od teleta i junca govoriti.
27. On bude v srcu mislil kak bude brazde delal i skrb njegova bude krave dobro pitati.
28. Tak vsaki drevodelavec i zidarski mešter koj noč kakti dan sprevađa, koj dube izdubljene pečati i kojega vsediljno trsenje je napraviti vsake fele spodobe, on bude srce svoje na to podal da bi po drugeh spodobah osnoval ter po skoznuvanju svojem bude delo dokončal.
29. Ovak kovač sedi pri nakovalu i misli na kovanje železa, zapara od ognja meso njegovo pripeka i on se z vručinum iz peči trudi,
30. štropot kladiva njemu vse zmir po vušesih razbija i oko njegovo gleda na spodobu po kojoj posudu dela,
31. on srce svoje na to obrača kak bi mogel delo svoje dovršiti i po skoznuvanju svojem ovu istu potpunoma lepo čini.
32. Tak lončar pri delu svojem sedi, kolo z nogami svojemi obrača, on je zaradi dela svojega vsevdilj v skrbi i vse posluvanje njegovo je na broj,
33. z rukum svojum spodobuje blato i z nogami svojemi ovoga istoga tvrdoču rashodi.
34. On srce svoje na to obrača da posudu dobro pocinja i peč skrbljivo očisti.
35. Vsi ovi zanašaju se na ruke svoje i vsaki je v meštirji svojoj muder.
36. Prez vseh oveh ne zeziđe se varaš.
37. Ni ne budu (ljudi) vu ovem istem prebivali i okolo hodili i vu spravišču visoko stupili.
38. Na sudbenoj stolici ne budu sedeli i zakon suda ne budu razmeli, takaj ne budu navuk od dobroga držanja i kaj je prav naprvo donašali i vu prirečjah ne budu znajđeni,
39. nego objačali budu vremenita stvorjenja i želje njihove na to idu da bi delo svoje prav izdelali, (čisto drugač on) koj misli svoje na zapoved Višnjega obrača i nju premišljava.

1. Koj se Gospona boji, tomu se nikaj zla ne bude pripetilo, nego ga Bog vu skušavanju bude opčuval i od zla oslobodil.
2. Muder ne odurjava zapovedi i pravice i ne bude kakti čun sim pak tam prehitavan od vihra.
3. Človek pameten veruje zapovedi Božji i zapoved je njemu verna.
4. Koj hoče na pitanje dobro odgovoriti i reč predi pripraviti i tak kada bude za odgovor oprošen, bude posluhnjen, on bude navuk opčuval i onda bude prav odgovoril.
5. Srce bedaka je kakti kolo pri vozu i misli njegove kakti os koja se okolo vrti.
6. Prijatel koj se zesmehava je kakti pastuh koj hrže pod vsakem koj na njega zasede.
7. Zakaj nadlada dan dana i opet svetlost drugu svetlost i leto leta premda od jednoga Sunca dohađa?
8. Mudrost Gosponova je nje razlučila po tom pokehdob je Sunce načinjeno bilo i red svoj obdržava.
9. On je vremena i svetke njihove odlučil i onda su (ljudi) svetke ob vuri određenoj opslužavali.
10. Iz oveh (dnevov) je Bog jedne povekšal i velike činil i druge je postavil med broj navadneh dnevov. I vsi ljudi jesu iz istoga praha i zemlje iz koje je bil Adam stvorjen.
11. Gospon je nje po vnogovrsnoj mudrosti razlučil ter njim pute odlučil.
12. Zmed njih nekoje je blagoslovil i izvisil, zmed njih je posvetil i za svoje prijel,
13. kakti blato lončara vu rukah njegoveh koj on izdelava i spodobuje.
14. I iz kojega vsa dela poleg dopadanja svojega napravi: tak je človek vu rukah onoga koj ga je stvoril i bude njemu podeljil kak se njemu dobro vidi.
15. Proti zlu je dobro, a proti smrti živlenje: tak takaj suprot pravičnomu grešnik. I ovak pregledaj vsa dela Višnjega. Dvoje i dvoje i jedno proti drugomu.
16. I ja sem se najzadnji zbudil i bil sem kakti on koj pobira za trgači jagode.
17. Vendar sem se i ja na blagoslov Božji ufal i napunil sem preše kak on koj je v bratvi.
18. Poglejte da nesem sam za se delal, nego za vse koji bi se radi navčili.
19. Poslušajte me, velikaši i vsi puki i ravniteli spraviščih, poprimete me z vuhi.
20. Sinu i ženi, bratu i prijatelu ne daj doklam živeš zvrhu tebe gospoduvati niti ne daj drugomu ladanja tvoja da se ne bi morebiti kajal i nje nazad prositi moral.
21. Doklam živeš i dišeš, ne pusti se od nijednoga človeka premeniti.
22. Ar bolše je da te sini tvoji prosiju kak da bi ti moral vu ruke sinov tvojeh gledati.
23. Vu vseh delih tvojeh ostani najvišeši.
24. Ne všini si znamenjku diki tvojoj. Na dan skončanja živlenja tvojega i ob vremenu ishađanja tvojega, razdelji odvečtvo tvoje.
25. Na osla spada krma, palica i tovor, slugi pako hrana, spokorjenje i delo.
26. On dela kada je spokorjen i išče počivati se; ako ga pustiš manguvati, bude iskal sloboščinu.
27. Jarem i vuzda zvijaju tvrdi vrat, slugu pako vsevdiljno posluvanje prigiblje.
28. Za zlovoljnoga slugu je peza i spone, daj njemu dela da ne bude manguval.
29. Ar manguvanje je velika zla navučilo.
30. Naloži njemu dela ar to njemu služi. Ako te ne bude posluhnul, prigni ga sponami, vendar preveč ni jednomu ne nakladaj, takaj prez rasuđenja nikaj važnoga ne čini.
31. Ako vernoga slugu imaš, naj bude on tebi kak si sam sebi (ljubljeni), barači z njim kakti z bratom pokehdob si ga za potreboču živlenja tvojega zadobil.
32. Ako ga krivično vraziš, bude pobegnul.
33. Ako pako vzdigši se pobegne, koga bi za njega pital i na kojem putu bi ga iskal, ne znaš.

[….]