Del XIII.

1. Koj se smole dotekne, bude se od nje zamazal i koj se druži z gizdavcem, bude gizdav postal.
2. Koj se z preštimanešem kak je on druži, bude si trha naložil. Ne budi pajdaš bolje bogatoga kak si ti.
3. Kaj ima kotel i lonec skupa? Ar kada se med sobum trkneju, razbije se.
4. Bogatuš činil je krivo, pak se je ljutil, siromak pako vražen bude mučal.
5. Doklam mu daval budeš, bude te prijemal, a kada ne budeš imel, bude te ostavil.
6. Ako imaš, bude se živaril z tobum i bude te spraznil, a ti se njemu ne budeš smilil.
7. Ako budeš njemu potreben, bude te potkapal i nasmehavajuči se tebi ufanje daval i vsa dobra obečaval ter rekel: „Kaj potrebuješ?“
8. On bude tebe z goščenjem napeljal (za njega naproti gostiti) doklam te bude dva- ali trikrat na nikaj spravil i nazadnje bude te zesmehaval i potlam, kada bude videl (da si obožel), bude te zapustil i z glavum zvrhu tebe kimal.
9. Ponizi se pred Bogom i čekaj na njegovu ruku.
10. Pazi da ne budeš zapeljan i po bedastoči ponižen.
11. Ne budi ponizen vu mudrosti tvojoj da ponižen ne zapeljaš se vu bedastoču.
12. Pozvan od mogučnoga othađaj ar zato z tem bolje bude tebe pozival.
13. Ne budi preveč gusto pri njem da te ne odrine, takaj se preveč od njega ne drži da na te ne pozabi.
14. Ne razgovarjaj se predugo z njim kakti z tebi jednakem niti ne ufaj njegovem vnogem rečjam kajti z svojem vnogem govorenjem bude te skušaval i nasmehavajuči se bude tebe ispitaval od tvojeh otajnostih.
15. Njegovo nemilostivno srce bude reči tvoje čuvalo i ne bude ti otprostil od traplanjih i vuzih.
16. Čuvaj se i marljivo poslušaj ar vu pogibeli skončanja hodiš.
17. Kada ga poslušaš, budi ravno kak da bi v spanju gledal i budeš skoznuval.
18. Vu vsem živlenju tvojem ljubi Boga i zazivaj ga na pomaganje tvoje.
19. Vsako živinče ljubi sebi spodobnoga, ovak takaj vsaki človek svojega bližnjega.
20. Vsako meso bude se združilo z sebi spodobnem i vsaki človek bude se z sebi jednakem družil.
21. Vuk se ne bude nigdar z janjcem družil, tak niti grešnik z pravičnem.
22. Kakovo druženje ima sveti človek z psom? Ali kakov del ima bogatuš z siromakom?
23. Lov oroslanov je divji osel v puščini, tak takaj bogatušev paša jesu siromaki.
24. I kak je poniznost gizdavcu odurnost, tak je takaj bogatušu siromak mrzota.
25. Bogatuš kada se pomekne, objačuje se od prijatelov svojeh, ponizen pako kada opade, bude takaj od poznancev othičen.
26. Kada se bogatuš vkani, vnogi mu pomažeju, kada je oholno govoril, opravičili su njega.
27. Kada je ponizni vkanjen, bude zvun toga jošče pokaran; ako pametno govori, njegovo govorenje mesta ne najde.
28. Kada bogatuš govori, vsi mučiju i reči njegove tja do oblakov izvišavaju.
29. Kada siromak govori, veliju: „Gdo je to?“ i ako zbantuje, prehitili budu njega.
30. Dobro je blago v kojega vesti ni greh, a hudobneše siromaštvo vu vustah nepobožnoga.
31. Srce človečansko premenja lice njegovo ali na dobro ali na zlo.
32. Veseli obraz koj je znamenje dobroga srca budeš teško i z trudom našel.