Del XL

1. Zabavlanje veliko je vsem ljudem napravljeno i jarem težek je nad sinmi Adamovemi od dneva ishoda njihovoga iz vutrobe materinske tja do dneva pokapanja v (zemlju) mater vseh ljudih.
2. (Skrbi pune) misli i strahi srca domišlavanje budučeh i dan smrti,
3. tak sedečemu zvrhu slavne stolice kak poniženomu v prahu i pepelu,
4. tak oblečenomu z višnjovum svilum i z korunum na glavi kak odevenomu z debelem platnom ljutost, nenavidnost, bučenje, nestalnost i smrtni strah, srdenje stalno i svadenje
5. i vu vremenu pokoja vu spalnici senj nočni izmenja razum njegov.
6. Malo i skoro nikaj ne počiva i kada je vu snu kak da bi po dnevu okolo gledal.
7. On je prestrašen zaradi viđenja srca svojega kakti on koj je na dan boja pobegnul. Kada se vstane, zvun pogibeli se znajde i čudi se da ono kaj se bojal nikaj ni bilo.
8. Tak se godi z vsem mesom, od človeka tja do živine, ali grešniku sedemkrat več.
9. Zvun toga smrt, krvi prelevanje, svađe i meč, stiskanje, glad, skrušenje i bičuvanja:
10. vsa ova jesu zaradi grešnikov načinjena i zaradi njih bil je potop včinjen.
11. Vsa koja su od zemlje, na zemlju preobrneju se i vse vode povrneju se v morje.
12. Vsako (krivično) daruvanje i krivičnost bude skončana, a vera naveke ostane.
13. Krivičneh blago bude kakti potok vsehnulo i bude kakti velika grmljavica koja med dežđem buči.
14. Oni budu veseli kada budu ruke svoje (na daruvanje) otprli, ali (takovi) prekršiteli budu k poslednjemu konec vzeli.
15. Vnuki nepobožneh ne budu vnogo odrastkov imeli i oni jesu kakti nečista korenja koja vrh pečine ropočeju.
16. Trava koja pri vsakoj vodi i vuz kraj potoka raste bude predi pokošena kak vsa druga trava.
17. Dobrotivnost je kakti raj vu blagoslovih i milosrdnost naveke ostane.
18. Živlenje delavca koj zaslužbum svojum za dobro vzeme je slatko i ti budeš v takovem (živlenju) kinča našel.
19. Sine, imeti i varaša izidati čini vekivečni spomenek, ali poštena žena več kak obodvoje.
20. Vino i složnoglasje razveseluje srce, ali ljubav proti mudrosti več kak obodvoje.
21. Piščale i šoltarnica skupa vugoden glas delaju, ali zvrhu obodvojega jezik sladek.
22. Oko tvoje rado gledi kaj je ljubeznivoga i lepoga, ali zelenu setvu rajši kak obodvoje.
23. Prijatel i tovaruš pomagaju si jeden drugomu vu vremenu traplenja, ali muž i žena bolje kak obadva.
24. Bratja si vu vremenu traplenja pomagaju, ali milosrdnost bude bolje kak oni oslobodila.
25. Zlato i srebro potvrđavaju noge, ali zvrhu obodvojega dober tolnač.
26. Bogatstvo i kreposti izvišavaju srce, ali vnogo bolje strah Gosponov.
27. Strahu Gosponovomu nikaj ne menjka i njemu ni potrebno druge pomoči iskati.
28. Strah Gosponov je kakti raj blagoslovljen i zvrhu vsake dike pokriva njega.
29. Sinko, doklam živeš, čuvaj se potrepčine ar bolje je vumreti kak (iz lenosti) potrepčinu imeti.
30. Človek koj se na ludski stol zanaša, ne misli živlenje svoje z svojum hranum zdržavati ar on dušu svoju z ludskemi jestvinami hrani.
31. Razumen pako i podvučen človek čuva se (pred tem).
32. Vu vustih nerazumnoga je pomenjkanje slatko, ali vu trbuhu njegovem bude ogenj gorel.