Del XXXIX.

1. Muder bude mudrost vseh starinskeh izveđal i zadržaval se bude vu prorokih.
2. On bude govorenje glasoviteh ljudih opčuval i skrovnosti prirečjah pregledaval.
3. Skrovna prirečjah bude izveđal ter se vu otajnosti izgovorov zvršaval.
4. Vu sredini velikašev bude dvoril i pred nazočnostjum predsednika pokazal se.
5. Zemlje tuđin bude ophađal i bude dobro i zlo med ljudmi skušaval.
6. Srce svoje bude povda[l] za skoznuvati osvitoma k Gosponu koj stvoril je njega i vu nazočnosti Višnjega bude molil.
7. Otpre vusta svoja vu molitve i za grehe svoje prosil bude.
8. Ar ako Gospon veliki bude hotel, z duhom razumnosti napuni njega
9. i on kakti dežđe spuščal bude govorenja mudrosti svoje i vu molitve hvalil bude Gosponu
10. i on ravnal bude tolnač njegov i navučanje i vu otajneh njegoveh svetuval mu bude.
11. On bude na znanje dal podvučanje koje je navučal i vu zapovedi Zakona Gosponovoga dičil se bude.
12. Hvalili budeju vnogi mudrost njegovu i tja doveka ne izbriše se.
13. Ne prejde spomenek njegov i ime njegovo iziskavalo se bude od pokolenja do pokolenja.
14. Mudrosti njegove pripovedali budu narodi i hvalu njegovu nazveščala opčina.
15. Ako ostane (pri živlenju), bude vekše ime zapustil kak jezero drugeh i ako počinul bude, dobro bude za njega.
16. Budem se jošče premislil da bi jošče kaj povedal ar sem kakti goruče želje pun.
17. Vu glasu veli: „Posluhnete mene, vi Božji rod, i doprinašajte sad kakti vuz potokov zasađena roža.
18. I dajte kakti Liban vugodnu duhu.
19. Cvitajte kakti lilijum i davajte duhu od sebe i zelenete lepo i pojte zahvalnu pesem i blagoslovete Gospona vu delih njegoveh.
20. Velikodičete ime njegovo i hvalete ga z glasom vust vašeh i z pesmami vusnic i z citarami i kada ga hvalite, recete:
21. ʻVsa dela Gosponova jesu prav dobra.
22. Na zapoved njegovu je voda kakti zid stala i na reč vust njegoveh je bila kakti vu vodenem koritu.ʼ
23. Ar za zapoved njegovu zgađa se kaj mu se dopada i na pomoči njegovoj ni pomenjkanja.
24. Vsako delo človečansko je pred njim i pred očmi njegovemi ni nikaj skritoga.
25. Od veka do veka vsa vidi i vu očih njegoveh nikaj ni čudnovitoga.
26. Ne mora reči: „K čemu je to?“ ali: „K čemu je ono?“ ar se vsa ob vremenu svojem budu pokazala.
27. Blagoslov njegov kakti potok je poplavil.
28. Kak je zemlju z potopom zlejal, ovak je srditost njegova del odvečtva narodom koji ga nesu iskali.
29. Kak je vode v sušu premenil, i posušila se je zemlja i kak su puti njegovi putom njihovem ravni, tak su grešnikom po srditosti njegovi popiknenja.
30. Kak je otpočetka za dobre dobro stvorjeno, tak su za najhmanješe dobra i zla.
31. Za živlenje človečansko osebujno potrebne stvari jesu voda, ogenj, železo, sol, mleko, pšenični kruh, med, grozdje, olje i oprava.
32. Kak goder vsa ova svetem na dobro, tak takaj nepobožnem i grešnikom na zlo obračaju se.
33. Jesu duhi koji su na fančenje stvorjeni i vu ljutosti svojoj potvrđavaju muke njihove
34. I vu vremenu skončanja budu moč svoju izdali i budu ljutost onoga koj je nje stvoril vtišili.
35. Ogenj, tuča, glad i smrt: vsa ova jesu za fančenje stvorjena.
36. Zubi ljute zverine i ščipavci, kače i meč je k fančenju na skončanje nepobožneh.
37. Vsa ova z veseljem zapovedi Božje ispunuju i pripravljena su na Zemlji za potreboču i ob vremenu svojem ne budu prekršila reč.
38. Zato sem vre zdavna tvrdno dokončal i pretresel ter premislil i pismeno van dal.
39. Vsa dela Gosponova jesu dobra i on bude vsako delo ob vremenu svojem na hasen obrnul.
40. Ne sme se reči: „Ovo (delo) je gorše kak ono“ ar vsa budu ob vremenu svojem za dobra znajđena.
41. Zato sada z celem srcem i z vustmi hvalete i blagoslavljajte ime Gosponovo.