Šoltar CXXXIV.

1. Aleluja

CXXXIV.

Hvalete ime Gosponovo, hvalete slugi Gospona!

2. Koji stojite vu hiži Gosponovi, vu predvorih hiže Boga našega.
3. Hvalete Gospona ar je Gospon dobrotiven, spevajte hvalu imenu njegovomu ar je vugodno.
4. Kajti Gospon je Jakopa sebi izebral i Izraela za ladanje svoje.
5. Ar sem ja spoznal da velik je Gospon i da Bog naš je zvrhu vseh bogov.
6. Gospon je vsa koja goder je hotel v Nebesih i na Zemlji, v morju i vu vseh glibljinah načinil.
7. On dopeljiva oblake od poslednjeh Zemlje, bliskavice na dežđ premenja. Koj izvađa vetre iz svojeh skriteh krajov.
8. Koj poražal je vse prvorođeno Egiptuša od človeka tja do živinčeta.
9. I poslal je znamenja i čuda vu sredinu tvoju, Egipt, na faraona i na vse sluge njegove.
10. Koj vnoge narode je potukel i mogučne kralje pomoril.
11. Sehona, kralja amorejanskoga, i Oga, kralja bazanskoga, ter vsa kraljestva kanaanejanska (razdeljil).
12. I dal je zemlju njihovu za odvečtvo, za odvečtvo Izraelu, puku svojemu.
13. Gospone, ime tvoje (ostane) naveke, Gospone, spomenek tvoj (ostane) pokolenja do pokolenja!
14. Ar Gospon sudil bude puka svojega ter se od slugov svojeh naprositi dal bude.
15. Bolvani poganinov jesu srebro i zlato, delo ruk človečanskeh.
16. Vusta imaju, pak ne govore, oči imaju, pak ne vide.
17. Vuha imaju, pak ne čuju niti ni vu vustih njihoveh sape.
18. Njim spodobni naj postaneju koji nje delaju i vsi koji se vu nje zaufaju.
19. Vi (pako) od Izraelove hiže, blagoslavljajte Gospona, vi od Aronove hiže, blagoslavljajte Gospona!
20. Vi od Levijeve hiže, blagoslavljajte Gospona, vi koji se bojite Gospona, blagoslavljajte Gospona!
21. Blagoslovljen budi Gospon iz Siona koj v Jeruzalemu stanuje!