Šoltar XLIII.

XLIII.

Bože, z vuhi našemi čuli jesmo, oci naši nazvestili su nam delo koje si v dnevih njihoveh i v dnevih starinskeh činil.
Ruka tvoja je narode zatrla ter si nje (oce naše) zasadil, trapil si puke ter nje istiral.
Ar oni zemlju nesu z mečom svojem predobili niti moč njihova je njim pomagala, nego desnica tvoja i rame tvoje i tvoj milosrden pogled pokehdob si nad njimi dopadnost imel.

5.^* Ti si takaj sam moj kralj i moj Bog koj zapovedaš da se Jakopu pomaže.

Z pomočjum tvojum budemo neprijatele naše kakti z rogom razmetali i vu imenu tvojem budemo one koji se proti nam podižeju^* zametali.
Ar se ne budem zanašal na luk moj i meč moj ne bude mi pomagal.
Ar si nas rešil od oneh koji nas trapiju, a one koji nas odurjavaju jesi osramotil.
Z Bogom hočemo se vsaki den hvaliti i imenu tvojemu vekivečnu hvalu spevati.
Sada pako si nas zahitil i osramotil i ne ishađaš pred vojskum našum, o, Bog.
Ti si včinil da smo pred neprijateli našemi bežali i oni koji nas odurjavaju, jesu nas porobili.
Ti si nas pustil pojesti kakti ovce ter si nas med narode raspršal.
Prodal si puka tvojega prez cene i vu kupuvanju malo je za nje davano.
Postavil si nas na opšanost susedom našem i onem koji su okolo nas na sramotu i osmeh.
Ti nas narodom za (opšanljivo) prirečje postavil i puki kimaju (zvrhu nas) z glavami.
Ves dan je sramuvanje moje pred menum i sramota pokriva lice moje.
Pred glasom spoganjajučega i ogovarajučega, pred pogledom neprijatela i^* pregonitela.
Vsa ova su čez nas došla ter vendar nesmo se iz tebe spozabili niti smo zaveze tvoje prekršili.
Srce naše (od tebe) ni odstupilo i nesi dopuščal da bi se noge naše od puta tvojega vmeknule.
Pokehdob si nas v mestu traplenja ponižal i pokrila je nas senca smrti.
Ako smo na ime Boga našega pozabili i ako smo ruke naše proti Bogu tuđemu stegnuli,
je li nas ne bude zaradi oveh pital ar on zna otajnosti srca.

Ar zbog tebe vmarjamo se ves dan i preštimavamo se kakti ovce koje se koleju.

Vstani se! Zakaj spiš, Gospone? Vstani se i ne zavrzi do kraja!
Zakaj odvračaš od nas lica tvojega? Zakaj pozabljuješ na potrepčine naše i trapljenja naša?
Ar ponižena je duša naša tja do praha i trbuh naš sklopil se je z zemljum.
Vstani se, o Gospone, pomagaj nam i oslobodi nas zaradi imena tvojega!