Šoltar XX.

1. K koncu šoltar Davidov

XX.

2. Gospone, vu moči tvojoj bude se veselil kralj i zaradi pomoči tvoje bude se kruto raduval.
3. Želju srca njegovoga jesi njemu ispunil i prošnju vust njegoveh nesi mu skratil.
4. Ar si mu z tvojem ljubeznivem blagoslovom naprvo došel, postavil si na glavu njegovu korunu iz drageh kamenov.
5. Prosil te je za živlenje i podeljil si mu dužinudnevov za vsigdar i za vse veke vekov.
6. Velika je včinjena po pomoči tvojoj dika njegova, ali ti budeš njemu jošče vekšu čast i lepotu dodeljil.
7. Ar budeš za vsigdar i naveke za blagoslov postavil, budeš ga z veseljem lica tvojega razveselil.
8. Kajti se kralj ufa vu Gospona i po milosrdnosti Višnjega ne bude se zvračal.
9. Ruka tvoja bude vse neprijatele tvoje našla, desnica tvoja naj vse najde koji te odurjavaju.
10. Ob vremenu srditosti tvoje budeš nje kakti razbeljenu peč vpalil, Gospon je bude v srditosti svojoj omamil i ogenj je bude pžrl.
11. Sad njihov na Zemlji i seme njihovo med sini človečanskemi budeš zatrl.
12. Kajti su zlo na te zvrgavali i zmišljavali su tolnače koje nesu ispeljati mogli.
13. Potiral je budeš v beg, vu ostankih tvojeh budeš pripravil obraz njihov.
14. Podigni se, Gospone, vu jakosti tvojoj, budemo popevali i dela moči tvoje hvalili.