Del XIV.

1. Blaženi človek koj ni zagrešil z rečjum vust svojeh i kojega ne zbada žalost zaradi kakovoga greha.
2. Srečen koj ni v duši svojoj žalosti imel i kojega ufanje njegovo ni zmenjkalo.
3. Pohlepnomu i skupomu človeku prez hasne je bogatstvo, a človeku nenavidnomu k čemu je zlato?
4. Gdo skup spravlja kada sam sebi krati, drugem skup spravlja i vu blagu njegovem bude se drugi nasladuval.
5. Komu bude dober koj sebi ni dober? Ne bude se v blagu svojem veselil.
6. Ni hmanješega kak on koj sebi ne vušči i to je povraček za hmanjicu njegovu.
7. Ako takaj dobro činil bude, čini po neznanosti i suprot volji svojoj i k poslednjemu hmanjicu svoju očituje.
8. Oko nenavidnoga je hmanje, on odvrača lice svoje i dušu svoju zameče.
9. Oko pohlepnoga ne bude zasičeno z jednem delom nepravednosti, on ne bude sit doklam se ne vsuši i živlenje svoje ne skonča.
10. Hudobno oko je k zlu (nastavljeno) i ne bude kruha sito, nego bude lačno i žalosno pri stolu svojem.
11. Sinko, ako imaš, čini si dobro i alduj Bogu dostojne dare.
12. Spomeni se da smrt ne mudi i opsuđenje k grobu je tebi obznanjeno ar opsuđenje sveta ovoga z smrtjum premine.
13. Pred smrtjum čini dobro prijatelu tvojemu i poleg moči tvoje podeljuj siromaku.
14. Ne skračuj si dneva dobroga i ni jeden del dobroga dneva ne prepusti mimo tebe prejti.
15. Je li ne budeš ostavil drugem žule tvoje i trude tvoje vu razdelenju jakoga?
16. Davaj i prijemaj i opraviči dušu tvoju.
17. Pred smrtjum zvršavaj pravicu ar v grobu ne nahađa se jestvina.
18. Vse meso vehne kakti trava i kakti zeleni list na sirovem drevu,
19. jeden raste, a drugi dole pada: tak je pokolenje mesa i krvi, jedno se dokanča, a drugo se rodi.
20. Vsa pohabljivo delo nazadnje mine i koj je nje zvršil, pojde z njim.
21. I vsako izebrano delo bude k zadnjemu za takovo spoznano i koj zvršava nje, bude se vu njem hvalil.
22. Blaženi človek koj se mudrosti drži i koj pravicu svoju premišljava ter vu pametnosti svojoj na Božje vse videče oko misli.
23. Koj njejine (mudrosti) puti razmišljava vu srcu svojem i skrovnosti njejine razme i kakti zveđavec za njum hodi i na putih njejineh ostaje
24. i koj pri oblokih njejineh nuter gleda i na vratah njejineh nasluhava,
25. koj poleg hiže njejine ostane, v stenu njejinu kolec zabije i hutu svoju tam postavi i vu toj huti bude blago njegovo vsevdilj pri pri miru.
26. Pod strehu njejinu bude decu svoju spravil, a pod vejami njejinemi stanuval.
27. On bude pod strehum njejinum pred vručinum opčuvan i vu diki njejini počival.