Nikodemuš razgovarja se z Ježušem obnoč ter se od njega zvrhu duhovnoga preporođenja i od potreboče vu njega veruvati podvuča. Ivan krsti ter ipak daje svedočanstvo od Ježuša.
- Med farizejuši pako je bil nekoj človek imenom Nikodemuš, židovski poglavar.
- Ov je bil došel v noči k Ježušu i rekel njemu: „Mešter, mi znamo da si ti navučitel koj si došel od Boga ar nigdo ne more činiti ova čuda koja ti činiš ako ni Bog z njim.“
- Ježuš odgovori i reče njemu: „Stanovito, stanovito velim tebi: ako se gdo ipak ne preporodi, tak ne more videti Kraljestvo Božje.“
- Reče njemu Nikodemuš: „Kak se more roditi človek kada je star? Je li more on jošče jedenkrat vu vutrobu svoje matere vlesti ter ter se preporoditi?“
- Ježuš odgovori: „Stanovito, stanovito velim tebi: ako se gdo ne preporodi iz vode i Duha Svetoga, tak ne more vlesti vu Kraljestvo Božje.
- Kaj je od tela rođeno, to je telo, a kaj je od Duha rođeno, to je duh.
- Ne čudi se da sem ti rekel: ‛Vi se morate znovič roditi’.
- Veter puše gde hoče: ti čuješ njegov šum, ali ne znaš otkud dohađa ali kam othađa. Tak je z vsakem koj se od Duha porađa.“
- Nikodemuš odgovori i reče njemu: „Kak to more biti?“
- Ježuš odgovori i reče njemu: „Ti si vu Izraelu navučitel, pak toga ne znaš?
- Stanovito, stanovito velim tebi: mi govorimo kaj znamo i svedočimo kaj smo videli, ali vi ne prijemljete naše svedočanstvo.
- Ako ja zemeljska povedam, pak ne verujete, kak budete veruvali ako vam povem nebeska?
- I nigdo ne zastupljuje gore vu Nebo, nego koj je iz Neba dole stupil, najmre Sin Človečji koj je vu Nebu.
- I kak je goder Mojžeš vu puščini izvisil kaču, tak se mora izvisiti Sin Človečji
- da vsi koji vu njega veruju, ne pogineju, nego imaju žitek vekivečni.
- Ar Bog je tak ljubil svet da je svojega jedinorođenoga Sina dal da vsi koji vu njega veruju, ne poginu, nego da imaju žitek vekivečni.
- Ar Bog ni poslal svojega Sina na svet da sudi svet, nego da se svet po njem zveliči.
- Koj vu njega veruje, on se ne bude sudil, koj pako ne veruje, vre je opsuđen kajti ne veruje vu ime jedinorođenoga Sina Božjega. Gore 1,9.
- Ovo je pako sud da je došla Svetlost na svet i ljudi su bolje ljubili tmicu nego svetlost ar su njihova dela bila zločesta.
- Ar vsaki koj čini zlo, odurjava svetlost i nejde na svetlost da se ne kaštiguju njegva dela. Dole 5,1.
- Koj pako čini istinu, ishađa na svetlost da se njegva dela očituju kajti su vu Bogu včinjena.“
- Zatem dojde Ježuš i njegvi vučeniki vu zemlju Judeju i onde je z njimi prebival i krstil.
- Krstil je pako i Ivan vu Enoni vuz Salem kajti je ovde vnogo vode bilo i dohađali su i bili su krščeni.
- Ar Ivan jošče ni bil vu vuzu postavljen.
- Med Ivanovemi pako vučeniki i Židovije bilo nastalo pitanje od očiščavanja.
- I dojdu k Ivanu i rečeju njemu: „Mešter, on koj je bil z tobum prek Jordana i kojemu si ti daval svedočanstvo, nut, ov krsti i vsi ideju k njemu.“
- Ivan odgovori i reče: „Človek nikaj ne more vzeti ako mu ni dano iz Neba.
- Vi sami dajete meni svedočanstvo da sem ja rekel: ‛Ja nesem Krištuš’, nego da sem ja pred njim poslan.
- Koj ima zaručnicu, on je zaručnik,prijatel pako zaručnika, koj stoji i njega čuje, kruto se veseli nad glasom zaručnika. Ovo anda moje veselje je spunjeno.
- On mora rasti, a ja se moram pomenjšavati.
- Koj odzgor dohađa je zvrhu vseh, koj je od Zemlje, on je od Zemlje i govori od Zemlje. Koj dohađa iz Neba, je zvrhu vseh.
- I kaj je videl i čul, to svedoči, ali njegvo svedočanstvo nigdo ne prijemlje.
- Koj pako njegvo svedočanstvo prijemlje, on zapečačuje da je Bog istinski.
- Ar kojega je Bog poslal, govori reči Božje ar Bog ne daje Duha na meru.
- Otec ljubi Sina i vsa je vu njegve ruke predal.
- Koj veruje vu Sina, ima žitek vekivečni, koj pako ne veruje Sinu, ne bude videl žitek, nego srditost božanska ostaje zvrhu njega.“
