Svadba vu Kani. Obračanje vode na vino. Očiščavanje Cirkve. Za znamenje daje Ježuš svoje gorestajanje. Više ih veruje vu njega, ali im se vendar ne zaufa.
- I tretji dan je bila včinjena svadba vu Kani Galileje i Ježuševa mati je bila onde.
- Pozvan je pako bil takaj Ježuš i njegvi vučeniki na svadbu.
- I kad bi vina bilo zmenjkalo, reče Ježuševa mati njemu: „Vina nemaju.“
- Ježuš pako reče njoj: „Žena, kaj je meni i tebi zato? Moja vura jošče ni došla.“
- Onda reče njegva mati dvorjanikom: „Kaj goder vam reče, to včinete.“
- Stalo je pako onde šest kameniteh vodric, na očiščavanje Židovom navadno, zmed kojeh vsaka je držala dve ali tri merice.
- Reče njim Ježuš: „Napunete vodrice z vodum!“ I oni su nje napunili tja do vrha.
- I reče njim Ježuš: „Zajimljite sada i nesite starešini.“ I oni su njemu zanesli.
- Kad bi pako starešina vodu na vino obrnjenu bil pokušal i ni znal otkud bi to bilo (dvorjaniki pako koji su zajimali vodu jesu znali), zove starešina zaručnika
- i reče njemu: „Vsaki človek sprvimce postavlja dobro vino, kad se pako opiju, onda ono koje je gorše, a ti si dobro vino do sada obdržal.“
- Ov početek čudačinov je včinil Ježuš vu Kani Galileje i očituval je svoju diku i veruvali vu njega njegvi vučeniki.
- Zatem je išel dole vu Kafarnaum, on i njegva mati i njegvi brati i njegvi vučeniki, ali ovde su oni samo nekuliko danov ostali.
- I bil je blizu židovski Vuzem i Ježuš je išel gore vu Jeruzalem.
- I najde vu Cirkvi ljudi koji su vole, ovce i golube prodavali i penezomenjavce koji su ovde sedeli.
- I on si napravi bič iz vužincov i vse je van iz Cirkve izegnal, takaj ovce i vole, i peneze menjavcev je rasipal i stole prevrnul.
- Onem pako koji su golube prodavali, reče: „Odnesete ova odovud i najte hižu mojega Oca načiniti hižu trgovine.“
- Onda se jesu njegvi vučeniki spomenuli kaj je pisano: „Goruča želja za tvoju hižu je me jela.“ Šolt 68,10.
- Židovi pako odgovoriju i rečeju njemu: „Kakvo nam znamenje pokažeš da ti ova činiš?“
- Ježuš odgovori i reče njim: „Zrušete ovu Cirkvu i ja nju vu treh dnevih nazad podignem.“
- Onda rečeju Židovi: „Ova Cirkva je četrdeset i šest let zidana, a ti nju vu treh dnevih nazad podigneš!“
- On pako je govoril od cirkve svojega tela.
- Kad bi se anda od mrtveh bil gore stal, spomenuli su se njegvi vučeniki da je on to rekel i veruvali su Pismu i govorenju koje je Ježuš izvustil.
- Kad bi pako o Vuzmu, na svetečni dan, bil vu Jeruzalemu, vnogi su vu njegvem imenu veruvalipokehdob su videli njegva čuda koja je on činil.
- Sam pako Ježuš ni zaufal samoga sebe njimzato kajti je nje vse poznal
- i kajti njemu ni bilo potrebno da bi mu gdo svedočanstvo daval od človeka ar je on sam znal kaj bi bilo vu človeku.
