Del I.

Božanstvo Reči. Poslanje Krstitela. Vtelovlenje Reči. Odlučenje Krstitela. Njegvo od Ježuša Krištuša svedočanstvo. Njegva dva vučeniki nasleduju Ježuša. Jandraševo, Petrovo i Natanajelovo zvanje na apoštolstvo.

1. Na početku je bila Reč i Reč je bila pri Bogui Bog je bil Reč.
2. Ova je bila na početku pri Bogu.
3. Vsa su po njoj včinjena i prez nje ni nikaj včinjeno kaj je včinjeno.
4. Vu njoj je bilo živlenje i živlenje je bilo svetlost ljudih.
5. I svetlost sveti vu tmici, ali tmica ni nje zavjela.
6. Bil je človek od Boga poslan, kojemu je bilo ime Ivan. Mat 3,5; Mark 1,2.
7. Ov je došel na svedočanstvo da bi svedočanstvo daval od Svetlosti da bi vsi po njem veruvali.
8. On ni bil Svetlost, nego da bi svedočanstvo daval od Svetlosti.
9. Ova je bila prava Svetlost koja rasvečuje vsakoga človeka koj na ov svet dohađa. Odzdol 3, 19.
10. Ona je bila na svetui svet je po njoj včinjen, ali svet je ni spoznal.
11. On je došel vu svoja lastovitai njegvinesu njega prijeli.
12. Vsem pako koji su njega prijeli, je njim dal oblast sinom Božjem postati,onem najmre koji vu njegvem imenu veruju.
13. Koji ne od krvih niti od volje tela niti od volje človeka, nego od Boga jesu rođeni.
14. I Reč je telom včinjena i med nami prebivalai mi smo videli nje diku, diku kakti jedinorođenoga od Oca,puna milošče i istine. Mat 1,16; Luk 2,7.
15. Ivan je daval svedočanstvo od njega, kričal je i govoril: „Ov je bil od kojega ja vam jesem povedal: ‛Koj za menum dojde, ali pred menum je bil ar on je bil predi nego ja.’“
16. I od njegve punosti jesmo mi vsi prijeli milošču zvrhu milošče.
17. Ar Zakon je bil dan po Mojžešu, milošča pako i istina je po Ježušu Krištušu včinjena.
18. Boga ni nigdar nigdo videl, jedinorođeni Sin, koj je vu naručaju Oca, on je nam nazvestil. 1Tim 6,16; 1Jan 4,12.
19. I ovo je Ivanovo svedočanstvo kad su Židovi iz Jeruzalemak njemu poslali aldovnike i dvornike da bi ga pitali: „Gdo si ti?“
20. I on je valuval i ni tajil i valuval je: „Ja nesem Krištuš!“
21. I pitali su njega: „Kaj si anda? Jesi li ti Elijaš?“ I on reče: „Nesem.“ „Jesi li ti Prorok?“ I on odgovori: „Nesem!“
22. Rečeju anda njemu: „Gdo si? Da damo odgovor onem koji su nas poslali. Kaj ti od samoga sebe veliš?“
23. On reče: „Ja jesem glas kričečega vu puščini. ‛Ravnajte put Gosponov’, kak je rekel Izajijaš prorok.“ Iz 40,3; Mat 3,3; Mark 1,3; Luk 3,4.
24. Oni pako koji su bili poslani, bili su zmed farizejušev.
25. I pitali su njega i rekli su njemu: „Zakaj anda krstiš ako ti nesi Krištuš niti Elijaš niti Prorok?“
26. Ivan odgovori njim i reče: „Ja krstim z vodum ali sredi med vami stoji on kojega vi ne poznate.
27. Ov isti je on koj za menum dojde, koj je bil pred menum i kojemu ja nesem vreden razvezati remenje njegve obutelji.“ Mark 1,7; Luk 3,18; Čin Ap 1,5; 11,16; 19,4.
28. Ova su včinjena vu Betaniji,prek Jordana, gde je Ivan krstil.
29. Drugi dan je Ivan videl Ježuša k sebi dohađati i reče: „Nut, Agnec Božji,nut, koj odjimlje grehe sveta!
30. Ov je on od kojega sem povedal: ‛Za menum dojde človek koj je bil pred menum ar je bil predi nego ja.’
31. I ja ga nesem poznal,ali da on vu Izraelu očivesten postane, zato sem ja došel z vodum krstiti.“
32. I Ivan je svedočil i rekel: „Ja jesem videl Duha kakti goluba iz neba dole iti i on je na njem ostal. Mat 3,16.
33. I ja njega nesem poznal, ali koj je mene poslal z vodum krstit, on je meni rekel: ‛Zvrhu kojega budeš videl Duha dole iti i na njem ostati, ov je on koj krsti z Svetem Duhom.’ Mark 1,10; Luk 3,22.
34. I ja jesem videl i svedočil da ov je Sin Božji.“
35. Drugi dan je Ivan ipak stal ovde i dva zmed njegveh vučenikov.
36. Kad bi pako Ježuša bil videl hoditi, reče: „Nut, Agnec Božji!“
37. I oni dva vučeniki jesu njega čuli to govoriti i nasleduvali su Ježuša.
38. Ježuš se pako obrne i kad bi bil videl da ga nasleduju, reče njim: „Kaj vi iščete?“ Oni rečeju njemu: „Rabbi (kaj se rastolnačeno zove ‘Navučitel’), gde ti stanuješ?“
39. On reče njim: „Hote i poglejte.“ I oni su išli i pogledali gde bi se on zadržaval i on dan su pri njem ostali. Bilo je pako okolo desete vure.
40. Jandraš pako, brat Šimuna Petra, je bil jeden zmed dveh koji su to čuli od Ivana i njega nasleduvali. Mat 4,18.
41. On je prvič našel svojega brata Šimuna i reče njemu: „Našli smo Mesijaša!“ (kaj se rastolnačeno zove Krištuš).
42. I dopelja njega k Ježušu. Kad bi ga pako bil pogledal Ježuš, reče: „Ti si Šimun, Jonašev sin. Ti se budeš zval Cefas, kaj se tolnači Peter.“
43. Buduči dan je hotel on iziti vu Galileju i onde najde Filipa. I reče njemu Ježuš: „Nasleduj mene!“
44. Filip pako je bil iz Betžajide, iz Jandraševoga i Petrovoga varaša.
45. Filip najde Natanajela i reče njemu: „Našli smo od kojega Mojžeš vu Zakonu i proroki jesu pisali: Ježuša, sina Jožefovoga iz Nazareta.“ 1Moj 49,10; 5Moj 18,18; Iz 40,10; 45,8; Jer 23,5; Ezek 34,23; 37,24; Dan 9,24.25.
46. A Natanajel reče njemu: „Je li more iz Nazareta dobroga biti?“ Filip reče njemu: „Hodi pak poglej!“
47. Ježuš je videl Natanajela k sebi prihađati i reče od njega: „Nut, pravi Izraelec vu kojem ni ga vkanljivosti.“ Šolt 31,2.
48. Reče njemu Natanajel: „Otkud me ti poznaš?“ Ježuš odgovori i reče njemu: „Jošče prvlje neg te je Filip zval, kad si pod smokvum bil, ja sem te videl.“
49. Natanajel odgovori njemu i reče: „Rabbi, ti jesi Sin Božji, ti jesi kralj izraelski.“
50. Ježuš odgovori i reče njemu: „Kajti ti ja jesem rekel: ‛Videl sem te pod smokvum’, veruješ. Ti budeš jošče vekša od oveh videl.“
51. I on reče njemu: „Stanovito, stanovito velim vam: vi budete Nebo otprto i angele Božje gore i dole iti videli zvrhu Sina Človečjega.“